Qualcomm 定制：Quick Charge 制式進入第三代
開始之前，先同大家上一個簡單的理論課。所謂「快速充電」，到底是甚麼一回事?「快速充電」相對「慢充速度」概念。原來，要知道供電子產品充電嘅叉電機，充電速度快慢，有兩組數字一定要知，就是電壓，單位為 Volt 伏特 (V) 及電流，單位為 AMP (A) 。以智能手機而言，一直由 5V / 0.2A 去到 5V / 0.5A、0.75A、0.85A，去到近年嘅 5V / 1A、1.5A 甚至是 2A。而 Volt x AMP = Walt，中文叫瓦數，簡寫 W，代表了充電功率。比較充電功率 W 值，就知道呢個充電機，係咪快充。一般而言，有 10W 嘅充電功率，已可以叫快充。
要知道，部份電子產品，要有足夠電流才充到電。就如 iPad 或一些十吋芒 Android 平板、Windows 平板都要至少 2A 電流才夠力充電，亦即是說，要充 iPad，一定要有 10W 充電功率充電器，而當中的電流，一定要係 2A。但都有相反例子，好似 ePrice 版主早前測試過某 5000mAh 大容量電池手機，但居然只容許 1A 電流充電，所以充電功率，就只有 5W。而理論上，Walt 數越大，充電越快，所以要充起 5000mAh 電池嘅呢部手機要五粒鐘，這一定不是 「快速充電」。
▲ 目前 Qualcomm 最快的充電技術，就是 QC3.0。從上圖可見，其充電速度相比傳統的快很多。
明白「快速充電」數字上嘅演譯，又係睇睇實際運作。係手機世界，「快速充電」有幾個咁多，但大廠比較愛用 Qualcomm Quick Charge 技術，因為只要你用 Qualcomm SoC，原則上已支援，係 SoC 嘅原生功能來，應用到手機度，不是難事。Qualcomm Quick Charge 已進入 QC2.0 至 QC3.0 規格。
無論是 Qualcomm QC 2.0 抑或 QC 3.0，兩者的共同之處，在於提供充電功率大於 5W (5V / 1A) 的充電器。透過提高充電器的輸出電壓以及電流，加快電池充電的速度。至於 QC 2.0 以及 QC 3.0 的分別，主要在於前者提供四種充電電壓，包括 5V、9V、12V、20V，最大充電功率為 18W，而後者則採用了最佳電壓智能協商 INOV (Intelligent Negotiation for Optimum Voltage) 技術，減低功率損耗達 45%，並以 200mV 增量為一檔，在 3.6V 與 20V 之間進行調節，充電功率同樣是 18W，除左能夠進行快速充電，亦可以有效減低電池的損耗。睇到呢到，大家都見到，Qualcomm QC 2.0 / 3.0 都是提供最高 18W 的充電功率，比起 iPad 嘅 10W，數值大了，充電速度，應該加快了。
| QC 2.0 | QC 3.0 | |
| 電壓 | 5V/9V/12V/20V | 3.6V - 20V |
| 最大電流 | 3A | NIL |
| 最大充電功率 | 18W | 18W |
| 處理器 | S200 / S400 / S410 / S615 / S800 / S808 / S805 / S810 | S820 / S620 / S618 / S617 / S430 (注意: QC 3.0 是可向下支援的) |
HTC 10 QC 3.0 充電測試
好了，是時候入正題。不知大家有否曾經有一個疑問，為何不少廠商介紹快充技術時，好多時候只強調充電唔知幾多分鐘，可以由 0% 充到唔知幾多 %，但從來唔會同大家講，充電幾耐可以充滿舊電? 其實係因為，大部份的快充都係一樣，只會在開頭的半小時至一小時增大電壓提升充電速度，但當手機電量超過某個 %，充電器就會自動變壓，充電速度亦隨之減慢，咁樣其實係可以保護手機電池，並延長其壽命。就好像 HTC 10 般，HTC 官方表示，QC 3.0 技術能夠讓手機半小時充電至 50%，相比一般的充電技術還要快，但並不代表，充電一小時就能夠充滿電池。而採用 Qualcomm QC 3.0 嘅 HTC 10，跟機就附上 QC 3.0 的充電器，只要用上跟機充電器，不單充電快，而且可以有保護電池的功能。
▲ HTC 10 跟機的 HTC Rapid Charge, 是支援 QC 3.0 標準嘅充電器，輸出方面有三個規格：5V / 2.5A、9V /1.7A 以及 12V /1.25A。
▲ 首先將 HTC 10 的電池用盡 (0%)，然後使用 QC 3.0 充電器開始充電。為了避免因為網絡連線、背景應用程式等因素影響充電結果，因此整個充電過程都會在關機的狀態下進行。
▲ 充電 15 分鐘，可以見到電量已經由 0% 充至 23 %。
▲ 充電大約 30 分鐘，可以見到已經充至 41%。之前版主 Keith 實測都話，HTC 10 中用量一日用到 12 小時，其實你充 30 分鐘，都應該夠用 5 小時，出一個街，睇場戲，食埋戲應該無問題的。
▲ 一小時後，電量為 77%，充電依然保持每 5 分鐘 6 至 7% 的增長。你有時間充一小時 77% 電量，用到八小時左右啦。
▲ 過了 84% 左右，開始感受到充電速度的減慢，到後期愈來愈慢，這是因為 QC 3.0 充電器自動變壓的緣故。大約 1 小時 38 分鐘後，終於成功將 HTC 10 充電至 100%。
▲ 為左更清晰地了解 HTC 10 QC 3.0 的充電速度，Andrew 就由 0% 開始，每 5 分鐘記錄 HTC 10 的電量一次。而從以上的圖表中，大家可以更清楚地看到充電速度的改變，電量由 84% 開始，充電速度開始減慢。原因應是 HTC 跟機嘅充電器，最大充電功率，不是 QC 3.0 嘅 18W，而係約 15.3W，這個應該跟手機充電時充電器與手機發熱有關，情願令充電比最快充速慢一點，加強安全之餘，又不失實用性。Andrew 特別提醒大家，最好還是採用 HTC 跟機的 Type C 線，最主要因為充電功率大，要有適當嘅線材，才能發揮效果，否則，會充不到應有的時間。
跑分軟件試 HTC 10 3000mAh 電續航力
咁測試完 HTC 10 的充電速度，大約 1 小時 38 分鐘就能夠將一部 HTC 10 充滿電池。相信大家都會很好奇，咁充滿電池之後，又能夠用到幾耐呢? HTC 10 的電池容量有 3000mAh，Andrew 今日就打算利用兩款跑分軟件，分別為 ePrice 常用的 Geekbench 3.0 Battery Test 以及 PCmark For Android Battery Test，測試一下 HTC 10 的續航能力。Geekbench 3.0 Battery Test，是用來測試手機由 100% 至 0%，模擬 80% CPU 負荷的情況下，手機的使用時間以及其電池分數。而 PCmark For Android Battery Test，都係類似的測試，會將屏幕調至 200nits 亮度，以睇圖、播片方式進行測試。一齊睇結果啦!
▲ 為了避免 Wi-Fi、4G 訊號強弱影響測試結果，在利用 Geekbench 3 Battery Test 測試續航能力時，我會選擇開啟飛航模式。測試結果顯示，配備 3000mAh 電池的 HTC 10，續航能力有 8 小時 20 分鐘 50 秒的成績，而 Battery Score 亦有 5008 分。要注意的是，以上的結果係模擬緊一個中用量用家在 80% CPU 負荷的情況下的使用時間，如果平時普通一般使用的話，應該都能夠用上一整天的。這個分數，跟 ePrice.HK 版主 Keith 嘅實測差不多，佢話中用量，用到 12 小時的，應該都無錯。
▲ PCMark 個成績就相對 Geekbench 低，只有 7 小時 41 分鐘，不過相距並不算太大。
為何我的 HTC 10 充電那麼慢? 火牛會是其中一個因素
睇完上面的測試，我們大概可以知道，HTC 10 電量由 0% 充電至 100%，所需的時間大約為 1 小時 38 分鐘。呢個時候，或者會有網友問，點解我買左部 HTC 10，但充電的速度同測試嘅時間唔同? 是咁的，影響充電速度的快慢，充電器火牛就是因素之一。
相信不少人都曾經換過多於一部的智能手機，很多時候當你換機的時候，充電器火牛、USB 線大多數都唔會扔，會留番黎繼續使用，畢竟現時大部份充電器，都是可以換線的，microUSB 線唔啱，可以換條 USB Type-C 線落去。但唔知大家知唔知道，並不是所有手機跟機的充電器火牛，都能夠提供 QC 3.0 的充電速度。
這樣的話，我們可以怎樣辨識，到底我個火牛是否支援 QC 3.0? 其實大部份的火牛，都會印有電壓 (V) 以及電流 (A)，只要將電壓乘以電流，就能夠計算出輸出的功率 (W)。功率愈大，充電的速度就愈快。例如紅米手機的充電器只有 5W (5V / 1A)，如果你用來為 HTC 10 充電，速度就一定會受到影響。若果你係 HTC 用家，Andrew 給你一些 Tips: M8 與 M9 跟機是 5V / 1.5A 充電器，有 7.5W 嘅輸出，而剛推出嘅 HTC One X9，都係跟 5V / 1.5A 充電器。但上年 HTC 嘅 MTK CPU 機種，跟機都只係 (5V / 1A) 5W。簡單來說，舊叉機用在 HTC 10 裡面，充電一定慢好多，所以跟機送嘅 QC 3.0 充電器，大家記得珍而重之呀。
▲ 除左睇功率之外，火牛上圓形加閃電的符號，亦都會提示該火牛是否支援快充，甚至在符號的旁邊亦會清楚寫明 Qualcomm Quick Charge 2.0 / 3.0。
來源：Android Authority
資料由客戶提供
