最多平九百
HTC 10 其實推出之後，一直都係減緊價，只係減幅無來得 Sony 與 LG 咁瘋。但幾百幾百咁跌，今日大舖已跌穿了五千呢個心理價位：百老匯與衛訊今日已標價：$4998。但 HTC 10 嘅禮品唔多，除了跟機嘅 Hi-Res 高音質耳機及 QC 3.0 Turbo Charger 外，就只有芒貼、32GB 記憶卡與 Type C 轉換器 (衛訊)。當然，玩開手機都知，大舖價之外，幾間廠商認可嘅深水埗細舖，會賣得更平！版主今日就行過深水埗，HTC 10 標住 $4780，比起大舖平多兩舊水，比起原價已平九百蚊! 而贈品會係 64GB 記憶卡，比起大舖更加實際喎。
▲ 其實有時覺得 HTC 好慘，相信香港 HTC 內部都知道好多網友等緊 HTC 10 紅色版，但好多門市都無真機，只係貼張 Label 話你知有新色。窮到咁，點算好？
▲ 反而細舖就肯擺部真機出來。＄4780 呢口價，仲送 64GB 記憶卡，比起原價，平成九百蚊。
網友爆料 10 仔又有新功能
係前兩日 Andrew 有關 HTC 10 影相效果嘅測試文，居然有網友爆料，都係關於 HTC 10。第一個消息係：香港會推出 64GB 版本，另外一個消息係 10 仔會好快支援各台嘅 VoWiFi。版主收到嘅風，沒有提及 64GB 版本會引入香港，不過，因為今年 HTC 唔會好似上年咁玩雙旗艦，十仔撐天下會有一段時間，個人認為再推出 64GB 版本機會都好大！另外，HTC 10 是少數 iPhone 之外 Android 手機，支援足 csl.、數碼通、CMHK 及 3 香港嘅 VoLTE，而 10 仔更會係 Sony 手機之後，另一款 Android 機用到 VoWiFi。呢個功能更新，都會係稍後推出。所以，點解買機要買大廠，係有原因。用手機，話音質素都好重要。
▲ 代理為 HTC 手機做了一個 Made in Taiwan HTC 嘅標誌。好老實，現在大陸手機，或者 MIC 手機太多了，洋化嘅香港人，都情願信 MIT 多過 MIC。Made in Taiwan 跟 Made in Korea 一樣，突然間成為賣點。細心嘅話，唔係部部 HTC 機都有貼 MIT 呢個 Logo。
▲ 網友 ByT 唔係第一次留言爆料，準確度都好高。HTC 10 香港會出 64GB 版本，其他網友點睇？
HTC 10 於文章發表時，賣價為 $4998，按這裡有更詳細規格及賣價。
