一般手機的調音工具－均衡器，操作複雜
大家好，我係 ePrice 測試員 Andrew，今日我就想同大家介紹一下，HTC 10 的新功能，如何能夠讓你用自己對耳，私家嘅耳機，都可以享受最適合自己的聽覺體驗。事實上，今時今日大部份的手機，都有內置音樂均衡器 (Equaliser，簡稱 EQ)，作用就是用來調整各頻段的增益值。一般而言，在均衡器面板上有多少頻段讓你調校，我們就會稱之為多少段均衡器，例如好似某熱門日系品牌手機，有 5 個頻段調校，所以亦即是「5 段均衡器」。頻段愈多，調音的精確度就愈高，但同時難度亦會相對增加。
而對於不在行的網友來說，調音的過程是相當複雜的，因為你要知道，每段的頻率背後所蘊含的意義都不一樣。舉個例說，8k－12k 呢個頻段是屬於音樂的高音區，適當突出呢個頻段的話，會對音樂層次方面有幫助，但又唔可以過火，因為太多又會增加雜訊，太少則會影響聲音的感染力。又如 300－500 呢個頻段入面，則係用來表現人聲，增強聲音的厚度。
或者會有人說，聽音樂最好就不要用均衡器，這樣才可以聽到音樂的原味。這句話說得不錯，然而，一個人覺得好聽，並不是每個人都覺得好聽，可能有些人會覺得欠缺了一些 feel，所以就要均衡器幫手調音。當然，如果你真係唔識得調音的話，一般手機的均衡器都有一些內定的選項，如搖滾、流行、古典等等，而每個選項，其實都代表了不同的頻率分配，你可以視乎個人的耳感去揀適合自己的選項。
▲ 如果係出面專業級的均衡器，可以有好多好多不同的頻段，調較起上黎會非常吃力。而手機上內置的 EQ 均衡器，一般都只有 5 段左右，可以降低調較的難度。
唔洗識調音! HTC 10 兩種方法，讓你聽最適合你的音樂
對於唔識調音的網友，你可能會話：喂 Andrew，我睇極都睇唔明，乜野幾多 k 至幾多 k 就代表高音區，幾多 k 至幾多 k 又用黎表現人聲，我睇到一頭霧水喎! 無錯，HTC 就知道有大部份人都未必識得調音，對這方面沒有任何基礎的認識，所以就特地在 HTC 10 上，加入了一項新功能－「Personal Audio 個人專屬音效設定」，呢項功能有少少類似其他手機的均衡器咁，都係用黎調整至最好聽的音樂。然而，HTC 10 呢個調音方法，相比其他手機黎講更個人化，而且簡單得多。
要開啟「個人專屬音效設定」，首先你得插入耳機，不然無法進入接着下來的選項。如果係第一次插耳機嘅，仲會提醒你建立個人專屬音效添。不過之前唔小心揀咗略過而，Skip 咗都唔緊要，只要在「設定」中，你會見到有一個「HTC BoomSound 配備杜比音效」的選項，下方寫着「為您的耳機增強音效」，而右邊則有開關的設定。按進去，就會見到「杜比耳機音效」以及「個人專屬音效設定」。在「個人專屬音效設定」中，你會見到有兩個自訂的「調音」方法，分別為「回答問題」以及「聆聽頻率」，前者相對較快，但未必咁準，而後者則相對準確，但相對需要花多一點時間。
▲ 設定時緊記，一定、一定、一定要插入耳機。
▲ 在設定中，按進「HTC BoomSound 配備杜比音效」，就會見到「個人專屬音效設定」這個選項。而入面你會見到有兩種「調音」方式，一種是「回答問題」，而另一種則是「聆聽頻率」。
方法一：回答問題
講左簡單的先，如果你選擇「回答問題」再按「開始」，系統就會問你一系列的問題，例如：「您幾歲?」、「您每天使用耳機聽多久的音樂?」、「使用耳機聽音樂時，您周遭平均的噪音音量為何?」等一共四道問題，答完之後，你可以試聽調教後音樂的變化，並能夠調整左右聲道的平衡，睇下你自己想加強哪一邊的音效。呢個方法，真係非常快捷，但缺點係，佢未必係你「專屬」音效的最佳選擇。
▲ 回答 4 條關於你個人喜好的簡單問題，然後系統會調整適合你的音效，呢個方式雖然係快，不過就唔多準確。
方法二：聆聽頻率（推薦使用！）
更準確的方法，一定是「聆聽頻率」，用你自己對耳，加上私家耳機去聽，系統會依照個人的聽力，建立最適合的音效設定。系統會播放左右耳高中低頻的聲音，讓用家能夠根據自己的聽力，調節最低可以聽到的音量。初次設定的確係非常麻煩，但係呢個方法卻又相當簡單，而且的確能夠調教到你個人專屬的音量以及頻率。不過在這裡要提提大家，呢個方法係需要在一個相當聆靜的環境下進行，如果唔係...... Andrew 試過，在一個嘈雜的環境下進行「聆聽頻率」的個人化設定，調教完之後出黎的音樂係非常大聲，Andrew 當場嚇左一跳。
補充一點，如果你選用了「個人專屬音效設定」，Andrew 認為其實關掉杜比耳機音效，亦未嘗不可。因為事實上「個人專屬音效設定」本身已經幫你調教到最適合你聽的音樂，如果再開啟杜比耳機音效的話，聽落去 Andrew 會覺得音樂的低音會重左啲。不過這都是個人的主觀意見，你是可以依自己需要進行選擇的。
最後，想提醒大家的是，當你利用「聆聽頻率」進行調較之後，呢個設定就係你個人以及耳機專用，如果你俾其他人聽或者換左另一部耳機聽的話，聽感就會唔同左，到時你係需要再重新設定一次的。好彩呢個設定可以比你儲存多款唔同耳機嘅音效設定，最啱成日戴唔同耳機出街嘅朋友使用。
Andrew 試聽後感：HTC 10 跟機耳機
Andrew 自己都建立了一個最適合自己的音效設定，然後嘗試聆聽一下，到底開左個人專屬音效設定，同關左會有甚麼分別。而 Andrew 發現，如果關了個人專屬音效設定之後，會覺得音樂同人聲都好似好遠咁，而且感覺上音樂同人聲都撈埋一舊，欠缺了層次感。而開啟個人專屬音效設定之後，會明顯聽得出個分別，唔知可唔可以話聲音大左，或者可以咁講，開左之後音樂同人聲會變得近左，人聲好似在我耳邊唱咁。同時，而樂器特別是鼓聲部份，我感覺每一下都變得有力左，增加了果種澎湃的感覺。不過咁，即使是同一首歌，每個人聽到的感覺都會有差別，以上我所表達的，都只是個人的主觀感受，並不代表，一定要開左個人專屬音效設定，先至叫好，畢竟可能會有朋友覺得，其實唔開都一樣咁好聽。不知大家試過，又有沒有 Andrew 聽的這種感覺呢?
來源：ACID 調音 (EQ) 與混音 (MIX)
資料由客戶提供
