版主證實 : 大舖偷步預訂 HTC U11！呢個價，大家會否「嘩」一聲

Keith Yim 2017-05-21 20:04 | HTC

版主 Keith 係 HTC U11 發佈嗰陣，都話雖然香港賣 6GB + 128GB 版本，但賣價會比起 Samsung GALAXY S8 4GB + 64GB 版本相約！當時我估應該賣 $5698 左右。今日，網上傳來有大型電器連鎖店，已接受 HTC U11 嘅預訂，仲開出一個驚喜價！

今日版主聽到唔少消息話，有一間大型連鎖電器店，己接受 HTC U11 嘅預訂。當然，我哋唔會聽番來就報導，經過我哋求證，得出嘅消息如下。呢間接受 HTC U11 預訂嘅係豐澤電器，佢地同客人講，賣價係 $5,598，但預訂贈品卻沒算多，只有芒貼及保護套 (其實 U11 跟機已有一個基本透明硬殼）。問佢幾時有貨，佢地話係六月二日。

不過，今次預訂，感覺好「地下」。一來，HTC 香港未有公佈香港發佈會嘅日期，所以豐澤無法子好高調咁擺晒 Stand 及海報推廣，當然 HTC 與豐澤嘅官方 Facebook 都未有任何發佈。咁你會問，呢個價，同推出日子，可信程度有幾大？據版主嘅消息，HTC 香港已定出 HTC U11 本地賣價。跟據上次台北發佈會，HTC 高層張嘉臨講，香港跟台灣上市嘅時間，唔會差好多，所以家陣有價，有上市時間都唔出奇！

講番轉頭 $5,598 一部旗艦手機，你話好平又唔係，但 6GB + 128GB 版本，加上 5.5 吋 2K 屏幕，一個不錯嘅鏡頭，平過 S8 少少，係咪好大競爭力？大家點睇。若果真係呢個價，HTC Fans 會否即衝，其他品牌用家，又會否 Help 番佢一次？