開箱
爲何會入手此機？ 長老玩厭左部舊機 U12 Life 想換新機，而版主 Keith 分享的文章中 Desire 20 Pro 係比其他對手好。由於此機將會送人，所以網友們提出「心口碎手機」、「冰火七重天」等測試建議一律拒絕。 根據版主坤哥的預言，早前光速透過「誠哥」購入 Desire 20 Pro 一部，仲送埋個套 + 屏幕貼。 「叮噹」，誠哥送上門了！
▲ 黑色機身配黑色盒，仲飄住一陣剛生產的工廠味。
▲ 呢個就係「誠哥」送的套和貼。
▲ 盒背寫上 Desire 20 Pro 部分賣點，包括多 RAM、多電、四鏡頭等等。
▲ 留意翻，全新行貨係會有呢條封條；本 YK 都唔知 HTC HK 幾時換成 Falcon 做代理。
▲ 原裝配件如圖；基本料如卡針、說明書、耳機、火牛電線都齊全。
▲ 由於 Desire 20 Pro 支持 QC 3.0 快充協議，HTC 跟機附送的火牛亦係支持 QC 3.0 協議。
▲ 令人感動又尷尬係呢個耳機：感動係因爲入門機好多廠都唔再送耳機，而 Desire 20 Pro 係罕有地支持 FM 收音機功能，所以開箱無耳機唔得架；但尷尬係 X 你個 HTC 啊，耳機整到十足生果咁，你以爲用黑色就無人覺得似嗎？
機身佈局一覽
睇發佈會時最搶眼係個背斜紋，但正面穿窿大芒睇落去比較平實。 本身預計Desire 20 Pro 同 U12 Life 差不多水平，畢竟係「半後繼機」； U12 Life 的廉價塑膠感雖然唔令人討厭，但揸住 Desire 20 Pro 覺得點解後者造工會好咁多。。。 所以話遲買永遠好享受！
▲ 官方稱爲「錯視漸層設計」，無法理解個名，但真機睇落去係型係靚。
▲ 入門機但比你 3.5mm 耳機孔，底部亦有 USB-C 和單喇叭； 單喇叭聲大唔拆，但本 YK 聽慣旗艦 Boomsound 覺得 Desire 20 Pro 一如所料無低音得大聲。
▲ 機身頂部、底部各有一個收音孔；金屬質感框加塗料，絕對比 U12 life 的塑膠來得紮實。
▲ 過往都有不少手機玩按鈕配色，改紅改綠咁其實好難睇； 但 Desire 20 Pro 黑配金的組合卻讓我想起 RX-0 2 號機，型！ 而按鍵清脆反饋穩定，造工非常紮實。
▲ 三選二的卡槽支持 4G + 4G 制式，亦支持插入 microSD 卡擴充容量；但要留意卡槽對位要好準，歪斜少少都無法順利插入。
▲ 值得稱讚係保留中置實體指紋識別器：識別高效、準度十足；巨大的四鏡組 （ 4800 萬像素主鏡頭 + 800 萬像素超廣角 + 200 萬像素微距 + 200 萬像素景深 ） 讓你能輕鬆拍出各種視角相片，但係咪真係咁好用呢？ 下面會有簡單實測。
▲ 正面係一塊 2340 X 1080 的 6.5 吋 LCD 屏幕； OLED 屏幕對人眼的壞處我就唔再多講了，總之堅持 LCD 就係皇道！
▲ 屏幕左上角穿窿位是一枚 2500 萬像素自拍鏡頭，有 HDR 有美肌功能，但沒有自動對焦。
▲ 至於戴套係樣子就係咁，可以彌補相機凸出的缺點。
▲ 「誠哥」送套開孔也算精準； 但入門機其實上貼上套黎做乜，何況 Desire 20 Pro 的手感爽係需要除套而揸！ 真漢子絕對唔戴套，無套先可以感受到工程師的心思結晶！
性能測試一覽
雖然 Desire 20 Pro 配備高通 S665 處理器，好多人話佢係入門機，正所謂「唔打機就乜 U 都掂，打機就乜 U 都唔掂」，其實宜家 6 字頭的高通處理器足夠一般上網睇片聽歌喇。 今次換機的觸發點係長老話舊機 64GB ROM 唔夠用，所以要搵 128GB 加支持插卡的手機。Desire 20 Pro 預載 Android 10 系統，配備 6GB RAM 和 128GB ROM，實用的 NFC 和 藍牙 5.0 俱備。
▲ 安兔兔的測試中得分有 168819 分，分數跟其他 S665 大家庭成員相若。
▲ 在 Androbench 測試中，配備 eMMC 的 Desire 20 Pro 得分如圖，對比 UFS 制式的旗艦機黎講當然低。 令人意外的是，最重要的隨機寫入速度達 54.79MB/s，比 HTC 自己的中階機 U19e 快幾倍（15.41MB/s）！
▲ 歷時超過 14 小時的 Geekbench 4 續航測試中， 五千電的 Desire 20 Pro 獲得 8464 高分拋離其他同級對手，你可以獲得更持久的 AV 享受 ~
相機簡單實測
對入門級手機的相機表現有乜期待？ 玩機無數的經驗話你知，但求色準、反應正常已經心滿意足。 今次 HTC Desire 20 Pro 大玩多鏡頭，涵蓋超廣角、廣角、景深、微距四大護法。有網友會話無左長焦距鏡頭，但老實講，非旗艦機的長焦鏡頭同你高像素 CROP 出黎其實無乜分別。 呢度預先講個評測體驗感想： 主鏡頭比想象中好，但其他鏡組皆玩具。
主鏡頭相片實拍
▲ 室內燈光不足的情況下影貓，放大後亦可清楚見到對焦點的貓鼻貓鬚； 始終係入門機，對焦點以外的貓咪身軀毛色呈現油畫化。
▲ 在貓店陳列櫃射燈光照下，並無任何明顯的油畫情況：毛色分明、顏色準確。
▲ 主鏡頭大光圈自帶散景效果自然，顏色準確一貫係 HTC 相機的特色。
▲ 面對綠色為主調的場景，容易出現錯色的問題，但 Desire 20 Pro 並沒有出現此問題。
▲ 陰天下的波波地，鏡頭出奇地能夠準確地呈現場地的顏色。
▲ 文字和鏽斑痕跡在放大後依然清楚可見，入門機黎講算係超班了。
▲ 全紅場景下都無走色，柯達樓下的消防警鐘紅，大家都很熟悉吧！
▲ 冷櫃的光管其實都係另一個容易錯色的場景，但 Desire 20 Pro 無令人失望。
▲ 最愛食塞米呀！ 罐頭上的文字有少許鬆散，但尚保留一定清晰的線條，亦無「數碼谷線」的情況。
微距鏡頭實拍
從實際使用的情景黎睇，主鏡頭可以影到的距離已經足夠近，微距反而遇到「近又唔係超級近，遠又同主鏡頭重疊」的窘況，而且有色準問題。大家睇下面兩張圖就知道：
▲ 左圖（上圖）係主鏡頭拍攝的效果，顏色非常準確，而且散景自然好睇； 但右圖（下圖）係微距鏡頭影出黎的相，影出黎大少少，但就變成味精色又無大光圈散景效果。
散景鏡頭實拍
有廠商玩軟件虛擬景深，但 Desire 20 Pro 堅持加翻個景深鏡頭，效果確實係普遍比較穩定同自然，而景深亦係可以即時調整預覽深淺程度。
▲ 左圖（上圖）係主鏡頭拍攝的效果；右圖（下圖）係景深鏡頭拍攝效果。
超廣角鏡頭實拍
Desire 20 Pro 擁有 118 度超廣角鏡頭，但遺憾是廣角鏡頭無法支持 HDR 模式，亦不支持自動對焦功能，所以係無辦法做到戲劇效果般的近距離廣角。 色溫偏冷的超廣角鏡頭的細膩度亦遠不如主鏡頭。
▲ 左圖（上圖）係超廣角鏡頭拍攝；右圖（下圖）係主鏡頭拍攝效果。
▲ 左圖（上圖）係超廣角鏡頭拍攝；右圖（下圖）係主鏡頭拍攝效果。
4800 萬像素模式實拍
近年重新追求超高像素鏡頭的氣氛下，HTC 都直接放入 4800 萬像素的拍攝模式，但需要注意 Desire 20 Pro 的 4800 萬像素模式不支持 HDR 功能。 而且 4800 萬像素下的畫質並沒有太大提升，只是見到畫面中「谷線」的痕跡更明顯。 本 YK 會更偏向採用預設的 1200 萬像素模式進行拍攝。
▲ 開啟 4800 萬像素的相片。
▲ 主鏡頭 1200 萬像素的相片。
使用總結
如果你手上有 2000 大洋，那麼 HTC Desire 20 Pro 會係你最值得選擇的手機（暫時），作為後備機或平價主力機其實都無難度： 擁有 LCD 大屏幕和超強的續航力，影視娛樂輕鬆勝任。 雖然各種玩具鏡頭實用性不高，但主鏡頭成像質素表現穩定，對焦速度亦出乎意料的爽快。
當然，缺點包括無充電信號燈（但提供 iPhone 式亮屏功能）、無防水性能等等。 但你還有 3.5mm 耳機孔、FM 收音機，NFC （支持 GooglePay）和投影功能齊備。 你仲想要求系統輕快、貼近原生、踢走埋臃腫垃圾軟件？ Desire 20 Pro 都係貼近原裝 Android 了。呃，銀彈有限的情況下要買一部整體規格優秀的手機，暫時睇 Desire 20 Pro 應該係 THE ONE 了。
