開箱？ 直接性能測試！
本文並無任何開箱，直接黎就打真軍港版 U20 跑分實測了。如果有興趣睇真機外觀和台妹美女玩相機的話，可以參閱這裏。我相信大部分 U20 5G 的潛在買家都會係 HTC 舊用戶爲主，而本次文章亦會以 U12+ 舊旗艦機主的身份，同大家剖析到底應否換新機、棄舊機呢？
▲港版 U20 預設相當乾淨，本來還有「Dr.eye 雲端版」和「KKBOX」兩款應用，但都可以手動刪除，變成上方圖片中只有全套 GMS 官方應用和 HTC 自家 App； 邊度係自家 App？ 時鐘、氣象和相機囉，新機仲乾淨過 Nokia 個系統。
▲ 系統 UI 和功能跟原生 Android 近似，並沒有發現特別增減的功能；跟機系統是 Android 10，而值得一讚係終於加翻「切換使用者」功能了，呢個功能係 U12+ 無的。
▲ 安兔兔測試中的綜合性能表現是 32.5 萬分，性能符合正常 Snapdragon 765G 的表現。
▲ 而 Geekbenck 5 測試中的得分如圖。
▲ 不論是單核心還是多核心，S765G 已經是完勝 U12+ 的 S845 了，手機發展根本已經到達效能過剩的時代。
▲ 在 AndroBench 測試中，四項過百已經係基本盤，ROM 的讀寫性能很大程度影響日常手機操作的流暢度，而不論是 AndroBench 跑分結果和日常使用體驗，U20 5G 基本上跟 U12+ 一樣、甚至更快。
▲ 而 HTC U20 5G 擁有 5000mAh 大電池，雖然屏幕都加大至 6.8 吋，但接近 16 小時的實測中 Geekbench 4 續航結果卻達到 9437 分，在續航方面確實完爆 U12+ 了； 但需要考慮到一旦採用 5G 網絡，任何手機的電量都會倒水咁去，所以加大電池做法係相當正確。
U20 相機越級對戰 U12+
其實按道理 U20 係中高階機，而 U12+ 係旗艦級，相機玩越級挑戰係有相當大的難度。但今年 HTC 都未出過旗艦機，所以就繼續比較，而有趣係比較結果相當有趣，部分場景 U20 竟然有令人意外的表現，而且仲有特別方法可以提升個拍攝表現。
▲ 舊代 U12+ 玩長短雙鏡頭，來到 U20 就變成 4800 萬像素主鏡頭、超廣角鏡頭、微距和景深鏡頭，跟 Pixel 5 一樣取消了長焦鏡頭。對比的方式是：左邊（上方）是 U20；右邊（下方）是 U12+。
▲ 但令人意外的是 U20 細緻度竟然完勝 U12+，到底點解會中高階機打贏旗艦？ 後面本 YK 會有更詳細的解釋。
▲ 中午戶外日光場景下的貓咪雕塑，U12+ 更能還原現場的亮度實況，但色準方面卻偏綠，而 U20 對比上更準色。
▲ 可以見到 U20 在線條刻畫上明顯更清晰，亦不會好似上次評測所用的 iPhone 12 Pro Max 咁數碼化谷線的情況；U12+ 成像表現明顯不如 U20 了，咁姐係 U20 完美 KO U12+ 嗎？ 睇埋落去先 ~
▲ 隨着太陽開始落山、天色開始昏暗，U20 的色準和動態包圍（HDR）表現不如 U12+，後者鏡頭下的紅色更準確，大廈米黃色外牆亦還原得相當好。
▲ 畫面細緻度變成 U12+ 表現更好，U20 中大廈的外牆線條顯得模糊。
▲ 在室內黯淡的餐廳中，U20 和 U12+ 細膩度相若，雖然 U20 畫面比較討好（可能是因爲自動場景模式開啓），但實際是 U12+ 的成像更貼近肉眼所見。
夜拍表現又如何？
係日拍表現中， 大部分場景下 U20 的細膩度都比 U12+ 優勝，而色準方面亦明顯有了更大的提升。但亦有部分場景的拍攝表現顯得不穩定。 來到夜拍的部分，唔少網友都話 U20 無 OIS 光學防震系統，亦可能事前看過一些台灣的評測，覺得低光拍攝方面 U20 力不從心。 咁一齊睇睇囉 ~
▲ 預設的自動 HDR 情況下，U12+ 在動態曝光補償的表現更好，但就失去了現場該有的光差氣氛，U20 就比較貼近現場原貌。
▲ 考慮到本 YK 可能已經練成石膏手的因素，相片放大睇會發現 U20 依然比較清晰，缺少 OIS 的情況下，機體長少少、大少少其實都有助減低震動問題（唯一想到呢個可能性 ~）。
▲ 黎到極限夜拍場景，U12+ 自然贏幾條街啦，U20 一片漆黑連草地都消失不見。
▲ 但 U20 其實都有個夜景模式，手動切換之後終於見到個草地，而且大樓顏色都好準確，並不像 U12+ 那樣偏黃。
▲ 放大後亦見到 U20 在夜景模式下色準和清晰度完勝 U12+。
▲ 另一個低光 + 複雜光場景亦有相似的結果，普通模式下的 U20 和 U12+ 色彩表現相似。
▲ 你地睇，U20 連個螺絲都見唔到，模糊成咁樣乜玩法？ 而 U12+ 係清楚見到個螺絲鑽坑。
▲ 但如果手動打開夜景模式後的 U20 係兩個世界，夜拍光差都可以處理成 HDR 咁樣。
▲ 放大之後粒螺絲釘終於都睇得清楚，線條相當清晰，完勝 U12+；結論係，夜拍情景真係要乖乖地記得打開夜景模式，否則影出黎只會出事。
超廣角鏡和微距鏡呢？
其實，實測過程中，無法感受得到到底有乜場景適合用微距鏡，而微距鏡頭只有 200 萬像素，畫質對比主鏡頭有極明顯的差距。
▲ 以上兩張圖，第一張是用微距鏡拍攝，第二張是用主鏡頭拍攝；網友可以點擊放大對比，不難發現微距鏡頭不如主鏡頭。
▲ 除非你需要將鏡頭放到好近咁影， 主鏡頭會出現無法對焦的狀況，這時候你切換到微距鏡頭就可以獲得一張線條清晰度優先、成像色彩質素次要的相片。
▲ 至於 118 度超廣角鏡的表現，可視角度確實是廣闊了不少，起碼大樓和路邊支柱見到的部分會更多，而色彩表現亦相當準確。
▲ 但請謹記 U20 的超廣角鏡只有 800 萬像素，即時在日間拍攝的畫質與主鏡頭相比還是有一段相當明顯的距離；但當然，與 U12+ 比較肯定完勝，因爲後者根本無超廣角鏡 XD。
分析總結
從處理器性能、記憶體規格、續航力、甚至包括相機表現四個範疇黎對比，HTC U20 5G 可以話係完勝 U12+ 舊、舊、舊代旗艦。 從一開始版主收到風定價是四千到，到最後確實建議零售價是 3898元。價錢雖然是減左，但換來的是 MIC 組裝品質。 當然，你可能會話 iPhone 都係 MIC 中國製造喇！ 但 U20 5G 從台灣發佈宣傳一直都是標榜 MIT 台灣製造，尤其是香港目前的大氣候下，如果可以買到一部 MIT 手機係相當令人激動的事。
對比 U12+，有什麼功能是 U20 沒有的、而令人相當在意呢？ 對本 YK 而言，是防水認證和通話錄音。另一個比較意外的驚喜係，將 U12+ 原廠 USB-C 耳機 Plug 落去 U20 上用，聲音效果竟然比 U12+ 好得多。 當然無做主動降噪效果。至於 U20 還有什麼令人在意的問題、是上面沒有提到的呢？ 答案在相機！ 不是吧？ 相機部分不是很好嗎？ 把 U12+ 都可以打落地。
睇翻數據顯示 U12+ 一張相片大約在 1.5MB 至 6MB 浮動；而 U20 卻穩定在 8MB 大小，選擇夜景模式亦是 8MB；更驚人是選擇 48MP 全像素模式直出 34MB 比你！ 天呀，8MB 一張相片對手機黎講其實真係好大，而且看情況 U20 並沒有針對相片進行浮動大小調整，意思係哪怕畫面係全黑，一樣送你 8MB 大小。好處係比更多的細節你，缺點係好快打爆個 256GB ROM，一旦你玩埋 4800萬像素拍攝，你點樣再加卡都好快玩完。
市場上無用 OLED 屏幕，又要性能又翻咁上下，又唔要中國品牌的手機，其實得 Nokia 8.3 和 HTC U20 兩款（好似暫時係得咁多），而 U20 規格和價格（暫時 ~）都比對手優勝。不知道是否因爲改了 MIC 搞產能集中，所以顏色暫時只得一種。 香港版 U20 目前只有墨晶綠，實機顏色相當不錯，但相信更多人會有興趣純黑以及純白。
HTC U20 5G 於文章刊登時，賣價為 $3,898 按呢度有更詳細規格及最新賣價。
