早前 HTC 在台灣舉行 MWC 同步體驗會中，高層就表示預計四月有新機推出，亦即係話畀大家知，HTC 手機未死㗎，仲有得畀你 Help This Company！不過，台灣高層話有啫，香港出唔出，我都想知呀！如果香港唔出，U20 5G 就會係最後一部手機，而大舖都將佢清緊貨，二千一咋！呢個價，我好似都有少少心郁，想知詳情，睇下文啦！
剛剛留意到，HTC U20 5G 繼上年 10 月減價至 $2698 之後，原來喺豐澤有清貨，網店寫住清貨價出售，賣價 $2159。不過撳到入去，就見到網店原來無得賣，但就寫住「分店有售」，咁再睇埋邊個門市有售啦，就見到顯示都幾多門市有喎，不過我都戴返個頭盔先，到底網站顯示嘅係堅定流，門市係咪真係有貨，大家有興趣買嘅話，都可以得閒去「尋下寶」，或者穩陣起見先打電話去相關門市問下有無貨先。
規格部分，HTC U20 5G 採用了 6.8 吋 20:9 大芒，配備 Qualcomm Snapdragon 765G 處理器，內置 8GB RAM 以及 256GB ROM，電池容量為 5000mAh。相機部分用上 48MP 標準 + 8MP 118 度超廣角 + 2MP 景深 + 超微距 20mm 鏡頭，而前置鏡頭則為 32MP。
