▲ Asus 的 Padfone 大玩平板手機二合一，但兩千蚊就只係買到手機咋，平板要另外買。
FHD 芒 ＋ Qualcomm S801 ！Asus Padfone S 率先跌破二字頭
講緊可以做到兩千唔洗就買到的平價 S801 手機就係 Asus 華碩的 Padfone S 啦！其實呢新機係上年 10 月正式開賣時售價就已經好吸引，只係 $2799 ，三千都唔洗。其實，從規格而言 Padfone S 而家睇返仍然係不錯㗎！有 5吋 1920 x 1080 解像度屏幕、Qualcomm S801 2.3GHz 四核心處理器、2GB RAM、 16GB 容量（支援最大 64GB Micro SD）。相機方面都有 1300 萬像素主鏡頭和 200 萬像素前鏡頭，內置 2300mAh 電池。
▲ 本身版主仲滿心期待諗住唔用信用卡都可以兩千樓下入手 Padfone S ，雖然最後都要 $2050 ，但呢個價位也不錯啦。
Asus Padfone S 規格唔差，但想不到事隔幾個月就做大減價。最近有大鋪就做緊信用卡優惠，由本身定價的 $2799 大減到 $1998 就有交易。相信有朋友一定會話信用卡優惠都報有無搞錯，所以版主就落左兩間門市問問如果無中銀信用卡有無得平，答案係一樣有，而且都好吸引！如果用現金或者其他信用卡買機只需 $2050 就買到，雖然就過左兩千蚊呢個吸引的價位，但老老實實，行貨機又有 FHD 屏幕加 S801 兩千頭搞得掂都相當吸引呀！
Asus 以外的選擇？中港4G HTC One E8 同 One Plus One 價位 $3000 樓下
如果對 Asus 手機無興趣又想平玩 S801 行貨機的朋友又有無其他選擇呢？都係有嘅，不過選擇就比較少了。首推的會係版主 Eddie 都分享過的 HTC 的 One E8 ，呢部機本身規格同 HTC One M8 比唔差得多而且更重要係支援中港 4G ，頻段齊全 FDD LTE Band 1 (1800) / Band 7 (2600)；TDD-LTE Band 38/39/40/41；TD-SCDMA 3G 1900/2100 及 WCDMA 850 / 1900 / 2100MHz 有齊，只係無雙卡咁解，規格上又係有 FHD 屏幕同用緊 2.5GHz 的 Qualcomm S801 四核處理器兼有 BoomSound 。不過價錢來講就未及今次主角 Padfone S 正，大鋪要 $2998 。另一部三千樓下有找的 S801 行貨機就係 One Plus One 了，目前香港官網 16GB One Plus One 賣價 $2559 而 64GB 版本就 $2999 。分享完兩千有找的 Padfone S 又提過價位較平的 S801 行貨機，唔知大家會否心郁郁平玩 S801 ，定係一條心等今年旗艦推出享受頂級規格呢？大家快啲留言講下意見啦！
▲ 如果經常往返大陸， HTC One E8 可能會比 Padfone S 適合了。
▲ 想玩埋 Android 5.0 的話， One Plus One 會係可以一試之選，因為傳聞呢部機快將升級啦。
在文章發佈的時侯，Asus Padfone S 定價 $2,050 ，按此看詳細規格和最新賣價。
在文章發佈的時侯，One Plus One 定價 $2,559 ，按此看詳細規格和最新賣價。
在文章發佈的時侯，HTC One E8 定價 $2,998 ，按此看詳細規格和最新賣價。
