ASUS ROG Phone 5 系列手機會有 ROG Phone 5、ROG Phone 5 Pro 以及針對頂級玩家推出嘅 ROG Phone 5 Ultimate，當中嘅 ROG Phone 5 Ultimate，正正就係傳聞中擁有痴線級 18GB RAM 嘅手機，仲勁過我部電腦。
144Hz 屏幕刷新率，全面用上 AMOLED 芒
今次 ROG Phone 5 用上咗 AMOLED 屏幕，屏幕尺寸為 6.78 吋，解像度有 2448x1080，比例為 20.4：9，支援領先業界嘅 144Hz 屏幕刷新率以及 1ms 反應時間，而觸碰刷新率更提升至 300Hz，觸控反應時間低至 24.3ms。同時，ROG Phone 5 支持 Always-on HDR、Delta E<1 顯色等級，大大超越咗上代 ROG Phone 3 嘅標準。S888 處理器 + 強化散熱能力，跑分史上最高分
規格方面，ROG Phone 5 用上最新 Qualcomm Snapdragon 888 5nm 處理器，配合 ROG Phone 5 針對散熱作出嘅調校，令性能部分大大提高，安兔兔跑分得出 742776 分，比一般 S888 處理器嘅手機仲要高分，效能高出 5 - 10%，同時亦係目前安兔兔跑出最高分嘅成績。如上面所講，ASUS 針對 ROG Phone 5 嘅散熱部分，落咗唔少功夫。ROG Phone 5 將原本 ROG Phone 3 有嘅 3D 液態均溫板進行改良，可以將熱能有效率咁分散去各處，而喺機身背蓋部分亦採用玻璃材質，達至最佳嘅散熱效果。另外全新嘅「空氣動力風扇5」，亦都有助降低 10% 核心發熱溫度以及 15% 嘅機身溫度。
另外，ROG Phone 5 同上代一樣，都係用上 6000mAh 電池，不過就將充電功率提升到 65W，配合 3000mAh + 3000mAh 雙電池並聯設計，只需 30 分鐘就可以叉到 4400mAh，51 分鐘就可以叉滿電。
3.5mm 耳機孔回歸！支持 ESS DAC 晶片 + Hi-Res 播放
值得一提嘅係，ROG Phone 5 又支持返 3.5mm 耳機孔，唔使一定要裝個外置風扇，先用到耳機。喺音效支援方面，ROG Phone 5 具備雙聲道正向喇叭，同時亦支援 Dirac HD Sound 聲音處理技術，可以令使用者喺聽手機內置喇叭音效嘅時候，可以有高解析度、低失真嘅聲音效果。另外手機亦配備 ESS DAC 晶片以及支援 Hi-Res 高解析音樂播放功能，同時就算駁咗無線耳機都好，都可以支援 AptX 傳輸模式，唔理直接透過喇叭播放音樂，抑或採用有線無線耳機，都可以有最高品質嘅聲音效果。
X 模式升級
用開 ROG Phone 都知佢有一個 X 模式，而今代 ROG Phone 5 亦將呢個模式升級。呢個模式維持咗各種官方調校功能，可以選擇有效發揮手機效能、最適合打機嘅「X+ 模式」，亦可選擇日常使用喺耗電同效能之間取得平衡嘅「動態效能模式」，仲有長時間待機慳電嘅「超長續航模式」，更設有「進階模式」，可以根據使用者需求自訂最合適嘅配置。
ROG Phone 5 Pro、ROG Phone 5 Ultimate 支持副屏幕
除咗 ROG Phone 5 之外，今次另外仲有 ROG Phone 5 Pro 以及 ROG Phone 5 Ultimate 兩個版本，當中嘅 ROG Phone 5 Pro 用上更大嘅 UFS3.1 512GB 儲存空，背後嘅呼吸燈則改為 RGB Vision - Color PMOLED 副屏幕，可以自定義背後屏幕顯示嘅資訊，做出獨一無二手機動態效果。而 ROG Phone 5 Ultimate 則用上超屈機嘅 18GB LPDDR5 RAM，同 Pro 版一樣機背都係有副屏幕，不過就唔係 Pro 版嘅彩色屏幕，而係為咗配合機身造型，用上單色 PMOLED 屏幕。
ASUS ROG Phone 5 (12GB) 在文章發表時，建議零售價為 $6998，按這裡有詳細規格及最新賣價。
