有無攪錯！Apple care + 加價近六成！

左定坤 (Cho Ting Kwan) 2015-09-10 17:27 | Apple

唔知大家有無諗住今年買番部 iPhone 6s 或者 iPhone 6s plus 番屋企玩下，如果有嘅話呢，咁呢篇文章你就要留意喇! 通常你買 iPhone 嘅時候呢，你都可以順便買埋適用於 iPhone 嘅 AppleCare+ 全方位服務計劃。即係咁，本身你部 iPhone 係附有 1 年保養嘅，如果你買左佢呢個計劃，你就可以將你嘅保養期延長一年，並且可以享有 2 次嘅意外損壞保障。咁當然 Apple 每次都要收番服務費架啦! 不過今年個計劃有變動，如果你係使用 iPhone 6s 或者 iPhone 6s plus 嘅話呢，呢個計劃嘅收費同埋服務費都貴左! 我哋即刻睇下到底貴左幾多!



iPhone 6 或以前：購買價 $688、服務費 $548
如果你係用緊 iPhone 6 或以前嘅機呢，咁呢個計劃暫時就對你無影響嘅! 我哋睇番現有嘅收費，假設你而家要去買部 iPhone 6，你可以加多 $688 就可以購買呢個 AppleCare+ 嘅服務計劃。咁你每次使用呢個服務呢，就要收番 $548 作為服務費。

iPhone 6s 及 iPhone 6s plus：購買價 $1088、服務費 $788
但如果你將會購買最新嘅 iPhone 6s 同 iPhone 6s plus 呢，由於新嘅 iPhone 6s 系列新增左 3D Touch Display同埋觸覺反饋技術 (Taptic Engine)，Apple Care+ 嘅收費就相應提升左，增幅近 60%，要 $1088 先可以購買到呢個服務計劃。唔單止咁，你每次使用呢個服務，佢都會收取番 $788 作為服務費。

            
▲ iPhone 6s 及 iPhone 6s plus的 AppleCare+ 服務計劃售價明顯增加。


▲連每次嘅服務費都貴左超過 $200，真係搶錢!

你對於 AppleCare+ 計劃今次嘅加價，有無啲咩嘢意見呢? 你覺得佢無啦啦咁加價合唔合理? AppleCare+ 加價會唔會動搖到你想買 iPhone 6s 或者 iPhone 6s plus 嘅諗法呢? 留言同大家分享下丫!

來源：MacRumors、Apple香港官網