亮黑色 iPhone 7 Plus 賺近七千！先達第一輪回收價全公開！

左定坤 (Cho Ting Kwan) 2016-09-16 10:52 | Apple

版主幾睇好亮黑色的 iPhone 7 Plus，一直都覺得，如果今年真係要炒的話，一定係炒大容量大芒的亮黑色 iPhone。早前同大家都分享過，有先達佬同版主講，亮黑色 iPhone 7 Plus 有機會可以上到 $15000，可惜大家似乎都唔係好信，覺得先達佬一定係吹水架啫！咁實際上係咪真係吹水呢？睇下文啦！

先達（Facebook）.jpg

真係有得炒！亮黑 256GB iPhone 7 Plus 最高賺 $15000，其他大機價略回升
剛剛睇完一輪先達回收價，好消息係，亮黑色 iPhone 7 Plus 最高可以炒高至 $15000，即係可以賺到 $6712 近七千呢個價錢，當然都係果句，呢個只係參考價，價錢隨時有變，可能呢部機收 $15000，下一部已經收 $13000 都唔出奇。至於其他儲存容量版本，剛才版主就同大家提到，先達未開門之前收機佬就預計每部賺 $500 左右，不過都開門之後，開始見有少少回升的跡象，128GB 非鋼琴黑的四種顏色，都係收緊 $8100 至 $8200 左右，可賺的水位約 $700 左右。但係 32GB 的話，雖然門面寫住回收價 $7000，聽落好似都有 $400 左右賺，就實際上似乎好多收機佬都唔收。

細機全線蝕錢！有得放好放，輸少當 win！
至於細機方面，可以見到就算有鋼琴黑，都不見得有得炒，256GB 亮黑色回收價為約 $7800，都係賺得果 $612 左右，情況並不樂觀。至於其他顏色果啲，更加唔洗諗，全部都比原價低，估計同之前所說貨源太多有關，甚至在剛才 Apple Store 開賣的時候，iReserve 都一度再開。所以都係果句溫馨提示：有得放，好放，輸少當 win，除非你打算自用都無問題。