iPhone 13 系列開賣已經來到第六天，好似好耐都無試過，回收價可以開賣一星期後，依然不減反增，當中 iPhone 13 Pro Max 回收價，更有得賺高達 $2251。同先達某店主了解過，因為少貨，所以升，但當中或多或少，應該同版主虎仔提過嘅中國限電令新措施有少少關係，令到多間 Apple 供應商被逼停產，呢個係一個原因。只能說，其實估佢唔到，如果之前 Strong Hold 咗嘅，今次可以話係有福了！而且家陣賺最多，居然唔係 1TB 版。想知詳情，睇下文啦！
無論係細機嘅 iPhone 13 Pro，還是大機嘅 iPhone 13 Pro Max，回收價日前都有明顯嘅上升，甚至連本來已經負數嘅版本，亦都升返去有得賺幾百嘅水位。而最誇張莫過於 iPhone 13 Pro Max，128GB 同埋 256GB 都有得賺 $2251，而 1TB 版本則賺 $2151。512GB 就賺最少，$1751，但都唔算差。對於 Strong Hold 咗嘅網友嚟講，係咪正呢？你仲會唔會繼續 Hold 落去？留言討論下啦！
