四大舖 iPhone 14 Pro Max 賣幾錢？百記炒價不再是最高，最高竟然是......佢？

左定坤 (Cho Ting Kwan) 2022-09-16 12:59 | Apple

今年的 iPhone 14 Pro 系列貨少有得炒，特別係 Max 版本，第一日拎機嘅，最起碼都執到千五蚊，好彩搵到啱 Timing 嘅，甚至可以賺超過二千三，一定係因為我無買，所以就有得炒 (資深燈神)。而報完先達價錢，出面大舖好似百老匯、衛訊、豐澤、蘇寧，都紛紛已經開門，今年有得炒，好多以前無炒價嘅，都出現返炒價。到底賣幾錢，睇下文啦！

炒價最高不再是百記？居然係佢

唔使問阿貴，其中一間有炒價嘅，一定係百老匯。當中的 iPhone 14 Pro Max 賣到成 $15399，相比建議零售價嘅 $13599，炒高 $1800 之多。就算係無得炒嘅 iPhone 14，亦都同樣賣貴多幾百。至於本身已經少咗炒價的衛訊，今年都見到有標炒價賣，而且炒價篇幅相比起百記更誇張，最貴的 iPhone 14 Pro Max，炒價高至 $16499，即比原價貴多 $2900。估唔到，一係唔炒，一炒就炒得更過人。

至於豐澤，暫時見就無標有炒價，而蘇寧則淨係放咗 iPhone 14 出嚟，價錢牌並無顯示有炒價。問及 iPhone 14 Pro 有無，則表示未有貨。或者晏啲如果貨到，就會放埋出嚟吧？