iOS 18 加入「口訊即時睇」功能
其實呢個「口訊即時睇」嘅功能係乜東東呢？當你升級咗 iOS 18 之後，手機就會預設開啟呢個功能，你可以喺「設定」>「App」>「電話」>「口訊即時睇」，開啟或關閉呢個功能 (順帶一提，升級咗 iOS 18 之後，「設定」入面好似變得有組織咗，唔知大家有無咁嘅同感)。而呢個功能，其實畀你有時如果有陌生電話打嚟，或者你咁啱唔想聽對方電話，然後飛咗去留言信箱，當佢留緊言嘅時候，其實你部手機已經即時可以見到文字轉譯，而就算你當下無睇到都好，你都可以喺「電話」>「留言信箱」度，睇返即時傳譯嘅記錄。雖然廣東話佢唔係讀得真係非常準確，但我覺得係一個可接受嘅範圍內，好似人名呢啲，認唔到好正常，但至少從文字上，已經知道對方大概講緊乜，我覺得呢個功能相當正！雖然而家少咗人用留言信箱，但如果有呢個功能嘅話，或者會重新令更多人用返留言信箱功能。唔知大家又點睇呢？
▲ 打開「電話」，進入入面個留言信箱，會見到彈出一個新功能介紹。如果有人留咗語音口訊，你可以即時知道來電內容。
▲ 人哋打嚟，錄緊語音口訊時，你手機已經可以即時知道口訊內容，再決定要唔要接聽。
▲ 事後你亦可以去返留言信箱位置，睇返記錄。