尖沙咀 Apple Store 開賣直擊！版主上手 iPhone 16 系列實機 試 Camera Control 新按鍵

左定坤 (Cho Ting Kwan) 2024-09-20 11:02 | Apple

今日 9 月 20 日，注定又係版主做到 PK 的日子，唔單止係 iPhone 16 系列開賣，而且華為 Mate XT 亦都同時開賣。今朝未到 8 點，我就來到尖沙咀 Apple Store，等待 Apple Store 開門。到底第一個排隊預訂咗 iPhone 16 系列的果粉，買咗乜型號的 iPhone，又係唔係佢心水呢？而 Apple Store 開賣之後，版主亦入場上手過新 iPhone，簡單睇過佢外觀同埋試過佢個 Camera Control 功能。想知詳情，睇下文啦！

尖沙咀 Apple Store 開賣直擊

Apple Store 8 點開門，不過版主大約 7 點 45 左右，已經去到尖沙咀 Apple Store 門外等待開門。而估唔到今年 iPhone 16 系列開賣，場面相當墟冚，分開咗兩條隊，一條係網上預訂咗，另一條係 Walk in，無論係邊條隊都好，都好多人排隊，見到咁多人排隊，我覺得都係好事嚟。

而我哋就向第一個排隊，預約咗買機的林先生訪問過，佢買的係 256GB 黑色 iPhone 16 Pro Max，其實佢覺得幾隻顏色都好靚，不過有啲顏色比較難搶，所以最後就買咗黑色自用。問及係唔係佢心水型號，佢表示其實都係，而佢平時用 iPhone 的用途，其實好少會用來打機，平時打機會用 iPad 多，所以其實主要都係一般電話用途為主。

iPhone 16 系列版主上手

時間來到 8 點，Apple Store 正式開門，店員熱烈地拍着手掌歡迎果迷進場，而版主都隨後跟住入場，初步簡單上手過 iPhone 16 系列新機，如果講 iPhone 16 以及 iPhone 16 Plus，我覺得今年新色相當靚，顏色好 Sharp，就算係粉紅色，都比起我手上部 iPhone 15 Plus 的粉紅鮮豔好多。至於 iPhone 16 Pro 以及  iPhone 16 Pro Max，我覺得上手的手感相當不錯，同樣都係磨砂機背以及鈦金屬邊框，造工相當好。

Camera Control 按鍵試玩

而外觀上比較主要係加入了 Camera Control 按鍵，而呢個按鍵我係覺得好好奇，到底實際操作如何。而我的結論係，你需要一點時間去慢慢學習同適應，例如輕按兩下可以切換功能，用力按下去可以變成快門鍵，亦可以透過滑動去 Zoom In Zoom Out，甚至切換不同的風格。而版主就簡單拍咗一條 Reels / Shorts，同大家一齊睇下 Apple Store 開賣場景同埋簡單的上手試玩片段，睇片啦：