iPhone 16 Pro 開箱看外觀
首先外觀上，iPhone 16 Pro 採用咗 6.3 吋 OLED 屏幕，解像度為 2622 x 1206，支持 460 ppi，用上 Dynamic Island 動態島設計，但因為屏幕比較細，機身都比較細，對於好似我呢啲細手之人來說，iPhone 16 Pro 絕對係我心頭所好。我手上呢部 iPhone 16 Pro，係原色鈦金屬版本，機面採用最新一代陶瓷晶體護面，並具有紋理啞面玻璃機背，整體感覺好唔錯，由 iPhone 11 Pro 開始，版主升級到 iPhone 13 mini --> iPhone 15 Plus --> iPhone 16 Pro，重新回到 Pro 嘅懷抱，係令我幾雀躍不已嘅。其實，手感呢種東西，好主觀，就好比愛情一樣，唔係高大威猛，就代表好，只有合適不合適，你先會開心。而我呢個 moment 係幾開心，唯一用上去比較影響到我使用體驗嘅，可能係因為我自己走去貼咗張防偷窺保護貼，影響到屏幕嘅亮度，變相一去到戶外尤其係猛烈陽光底下，會導致睇唔到屏幕上嘅內容。
外觀上我就唔評論大多，直接睇開箱最實際。
▲ iPhone 16 Pro 包裝盒。
▲ 包裝盒內除咗 iPhone 16 Pro，就只有一條編織設計嘅 Type C to Type C 線。
▲ iPhone 16 Pro 具有 6.3 吋細芒，對於手細嘅我嚟講，手感更佳。
▲ 頂部有 Dynamic Island 前置相機。
▲ 今代邊框感覺更加窄。
▲ 我手上嘅係原色鈦金屬。
▲ 具有三個後置鏡頭，設計同以往嘅 iPhone 差不多。
▲ 左側有動作按鍵以及音量鍵。
▲ 右側則有電源鍵以及相機按鍵。
▲ 底為喇叭以及充電插槽部分。
▲ Camera Control 功能示範 + 解說 (開聲，有配音)。
iPhone 16 Pro 相機實測
同 Android 手機唔同，Android 手機有好多唔同 CPU，對於性能上影響相當大，所以好多時候我哋都會用一些跑分軟件作為輔助，將 CPU、GPU 等效能具體化，方便大家作為參考。而 iPhone 因為用自家 CPU，而且 iPhone 咁多年來就算我係用 iPhone 13 mini，性能上都毫無輸蝕，就算玩 PUBG Mobile 呢類遊戲，都完全無難度，所以基於 in Apple I trust 嘅原則，我都唔特定再為 A18 Pro 呢粒晶片做跑分，直接跳入相機環節。但畀大家睇下用 iPhone 16 Pro 拍出來嘅相片成像如何之前，我都係要先簡單講下相機嘅 specs。iPhone 16 Pro 係有 3 個主鏡頭，分別為 4800 萬像素 24mm Fusion 相機、4800 萬像素 13mm 超廣角相機以及 1200 萬像素 5 倍 120mm 長焦鏡頭，支持最遠 25 倍數碼變焦。
以下為幾張最近用 iPhone 16 Pro 拍出來嘅成像，供大家參考一下，而我比較震撼係直升機嗰張相，用咗 120mm 即係 5 倍變焦拍攝出嚟，多得快門夠快，本來旋轉中嘅螺旋槳，都變得好像靜止咗一樣，有少少似華為 Pura 70 Ultra 嘅抓拍效果咁。而 iPhone 16 Pro 成像保持一貫色準，而且喺保留細節方面亦相當出眾，人像拍攝亦有唔錯又準確嘅景深效果，整體嚟講我對 iPhone 16 Pro 嘅相機都相當滿意。
最後，版主亦都有用 iPhone 16 Pro，拍咗一段關於我第一次北上電髮嘅 Vlog 影片，而多得 iPhone 16 Pro 強大嘅穩定能力，再配合清晰嘅收音效果，就算喺條街度配音，都可以保持音訊清晰，嗰日算係我第一次配埋音拍 Reels，效果唔差都令我相當滿意。睇片啦：
