​鬼貨？千二蚊雙卡 4G 華為 Honor 4X 鴨寮街驚現貴四百「行貨」

Keith Yim 2015-06-04 19:42 | Huawei

ePrice 版主一向跟大家分享邊到買手機最抵，今次呢單料，比較特別！版主發現賣開平價手機嘅鴨寮街，驚現自稱行貨嘅 4G 雙卡雙待手機：華為 Honor 4X，除了代理跟大家認知嘅唔同，最得人驚係賣貴建議零售價四舊水! 咁都得! ? 最誇張係版主用了一天時間問華為香港，問呢間舖頭嘅 Honor 4X 係咪真行貨，華為回答係。。。

名不經傳代理，你信唔信

鴨寮街近港鐵站出口，一直有幾間舖頭，以真人演講嘅方式去賣一D 手機迷一睇就知嘅假貨，如假紅米，與假 Pantech (叫 PantecQ)。但呢一個星期，佢地改推華為 Honor 4X，並聲稱係行貨兼一年中港澳保修。Honor 4X 其實一直有水貨兼賣左好一段時間，但水與行之間，好易認，因為中國大陸版，係 4G LTE 頻段上比較齊全，但佢地賣嘅 Honor 4X 跟香港行貨版一樣，都係雙卡雙待，但只支援香港 4G FDD-LTE，不支援中國大陸嘅 TD-LTE。版主見到鴨寮街件貨嘅代理貼紙，並唔係我地熟知嘅「聯強 」而係一間名不經傳叫 「Complex HK」 嘅公司。最得人驚係，Honor 4X 家陣係華為 Vmall.hk 賣緊，未落貨去大型電器店，而 Vmall.HK 只賣 $1280，並長期有貨! 鴨寮街居然係 $1680，現金價先減一百，貴成四舊，好過份囉。

華為：代理有兩間

版主分別問過負責 Vmall.HK 發貨嘅「聯強」與負責華為手機嘅「華為終端」。聯強代表已講明佢地代理嘅 Honor 4X 只會在 Vmall.HK 發售。但最奇怪都是華為，用了一天時間預備，到版主決定要刊登，都用「No Comment」去回答。(華為回應，華為行貨係香港有兩個代理，包括「聯強」及「天時達 TSD」。咁 Complex HK 代理的，又是否真行貨？華為表示，還在調查中。


▲ 華為 Honor 4X 係華為官方網購網站 vmall.hk 發售中。而大電器店如豐澤、百老匯等係未有得賣嘅。
 
 
▲  Honor 4X 係 Vmall.HK 只係賣緊 $1280，但鴨寮街舖頭居然話賣 $1680，貴成四舊水。


▲ Honor 4X 係一部平價 4G LTE 雙卡雙待手機，香港版不支援中國大陸嘅 TD-LTE 制式。賣點係採用八核心處理器、8GB ROM 及 2GB RAM，有 5.5 吋 Full HD 大芒及千三萬像素相機。

華為 Honor 4X 係文章刊登時，賣價為 $1280，按這裡有更詳細規格及最新賣價賣。