賣價再 Re Cap
華為 Mate 8 係中國大陸一早已推出，版主 Lawrence 亦分享過佢嘅速測「陸行」報告。留意一點係，中國版本 Mate 8，型號為 NXT-AL10，而香港國際版會係 NXT-L29。主要分別是香港賣嘅國際版會原生有 Google Playstore 及支援更多國際 4G LTE 頻段。香港版支援 FDD / TDD-LTE 及 3G TD-SCDMA，但唔會支援 CDMA，不是大陸嘅「全網通」。香港版 Mate 8 有兩個版本：標準版為 3GB RAM + 32GB ROM，定價 HK$3980，電器連鎖店講明一出即減 $300，即係實際係 HK$3680 買到機。至於高配版，即係 4GB RAM + 64GB ROM，定價 $4580，都係即出即減三舊水，實際 HK$4280 買得到！今日係香港上市架啦。香港版採用 Android 6.0 嘅 EMUI 4.3，雙卡雙待雙通 (即係 SIM 1 可電話時，SIM 2 亦可繼續使用)，nano SIM 與 MicroSD 卡共用一 Slot，不支援 Android 6 嘅記憶卡整合記憶體功能。
▲ 版主手上係香㯽金，高配版另一款叫摩卡金，即係朱古力咁金。標準版會另有太空灰與月影銀。
Mate 8 國際版真身
雖然香港行貨版本，跟中國大陸版本係型號上面有唔同，但其實設計、功能甚至用色，也是大同少異。今次版主找來高配版，再分享一下 Mate 8 嘅外型與跑分。我地同時搵來不少人用緊嘅大芒機選 Samsung Galaxy Note 5 跟 Mate 8 比較一下，等大家睇相都想像到實際大少。
▲ 華為 Mate 8 採用金屬作為主要材質，金屬機身帶有磨沙質感，邊框拉絲紋亦造得很好。家陣不少大陸品牌手機，明明賣不足一千蚊都自己係金屬機，但識玩嘅，係唔會被文字所騙，華為 Mate 8 賣得三千中，四千蚊，金屬係堅有料，用手指頭打打機背，絕不會有塑膠質感聲音，真係金屬，唔係金屬似膠。你還說嗰 D 金屬似膠係高性價比手機？咪自欺欺人囉。
▲ 網友對某品牌將品牌 Logo 放係機身之下，會獻上下巴為形容詞。華為 Mate 8 無三個下巴都有兩個。不過價錢比較平，可能係咁惡言批評都會少 D。老實一句，版主覺得 Mate 8 上下方嘅紋理其實做得好好睇令冷冷嘅金屬造型，加入少少精采細膩位。
▲ 跟 Note 5 比較一下吧 (Note 5 用得殘，不好意思) ! Mate 8 係六吋屏幕手機，Note 5 未足六吋，所以 Mate 8 大少少係唔出奇。Mate 8 推出個陣，官方說明有 83% 屏佔比，並表明用上很窄嘅邊框。邊框係窄，但其實 Note 5 做得更好。可幸係，Mate 8 本身唔算大部，六吋手機來講都算好好袋，手感唔會差過 Note 5 好多。
▲ 兩部機再比較厚度，都係差唔多。
國際版效能即睇
睇完樣，睇跑分! 華為 Mate 8 一早被跑分軟件安兔兔係效能榜上嘅第一位，所以 Mate 8 係效能王嘅優勢，好多人都知。但安兔兔排行榜嘅得分，係最好嘅，實際運作又點。此外，其他跑分軟件又有什麼可解讀地方？
▲ 先解讀安兔兔，手上國際高配版，得分為 90900 雖然未及排行榜顯示嘅高分，但都無其他高分得過 Mate 8。細看 UX 性能有成三萬分，想講係，新一批 Android 6.0 嘅手機 UX 都會比較高分，可見原生用 Android 6 比較有著數。但 3D 性能，Mate 8 未算最強，這部份，依然是 Qualcomm Snapdragon 800 Series 處理器比較有優惠。
▲ Vellamo 呢個跑分，其中多核及金屬都係以 CPU 性能為主，Mate 8 都係好高分，證明 Kirin 950 係一粒優秀嘅 CPU。留意瀏覽器部份，顯示以 Chrome 上網嘅優化與順暢度，可見用 Mate 8 上網會很爽歪歪。
▲ 繼 Geekbench 3 電池測試，我地再引人 AndroBench 儲值體速度實測。呢個 Test 代表手機係同情況下讀取、寫入資料嘅速度。Mate 8 都係比同期 三星 A9 做得很高分，代表性能更好。(左是 Mate 8 右是 A9)
按這裡有華為 Mate 8 4000mAH 電量效率實測
Huawei Mate 8 係文章發佈時，標準版賣價為 $3680，高配版為 $4280。按這裡知道更詳細規格及最新賣價。
