談設計與手感
一見到個樣，無錯真係同今年大陸機嘅設計風格，基本上大致上用同一個 Design，一個長方形白色的樣子，同上一代 P8 設計接近，而大家可以搵到佢嘅同家鄉嘅親戚 Oppo R7 同 OnePlus X，大家都係一樣樣咁制。正面為 2.5D 玻璃，屏幕左上方就有個 800 萬像素前置鏡頭，下方就有個華為 logo，而且使用了窄邊框設計。雖然係同其他牌子嘅 Design，拎上手個感覺只是一般般，因為 5.2 吋嘅手機，拎上手下感覺係實在過拎一部 5.7 吋嘅大mon 手機，可是機嘅邊角令到手機同我隻手嘅接觸面少左，心理上要更多力去握住部機。轉到機背就見到兩個鏡頭，一粒係負責物體的 RGB 顏色，一粒係負責細節處理，另外有個閃光燈及雷射對焦，而且最右邊有大大隻字嘅 Leica 字，上面寫上 SUMMARITH 1:2.2/27 ASPH 字樣，之前 YK 都講過，呢個係 Leica 獨有嘅辦識，雖然好多人話，華為 P9 唔係用 Leica 真鏡頭，但有晒 Leica 編號，證明 Leica 早已認仔，P9 鏡頭有著 Leica 特別係事實來。喺 P9 呢一代都加入左指紋識別器，同 LG V10, G5, Nexus 5X, Nexus 6P 一樣設計，到底放喺機背好定係好似 iPhone 咁放喺機前面，各家都有各說法。指紋識別器有另一個用途就係另一個喚醒開機制，只要將已儲存指紋嘅手指放上去，手機就會喚醒屏幕同時解了鎖，速度也很快。
▲ 華為 P9 的正面與背面
▲機身左則就有 SIM 卡同 SD卡槽，而音量鍵同電源鍵同傳統一樣放左喺右邊，而且電源鍵 同 HTC One A9 一樣，特別加入紋理，等使用者可以快速辨別到呢粒係咪電源鍵。
▲ 華為 P9已經用左 USB Type-C 連接頭，左邊為 3.5mm 耳筒連接口，右邊為喇叭，基本上呢部手機所有音響都係靠呢個喇叭輸出，另外可以睇到 USB Type-C 連接口嘅左右邊都有個六角形螺絲，應該就好似 iPhone 咁開左呢兩粒螺絲就可以拆開成部機。
電量實測
華為 P9 雖然只有 6.95mm 厚，但已經塞下一粒 3000mAh 電池，都是現今手機主流嘅標準，可是電大不是代表「長氣」，因為同時要 CPU、屏幕等各硬件嘅表現嘅配合下，先可以得出成績。到底 3000mAh 電池加上 Kirin 955 八核心下可以撐到幾耐 ?
▲ 我哋用 ePrice.HK 慣常採用嘅 GeekBench 3 Battery Test 作電量測試。GeekBench 3 模擬手機以 CPU 80% 負載下不停運作，我吔會用 Flight Mode 情況下，把手機由 100% 電量去到關機。留意 P9 會係 2% 電量下已會關機。最終得出約 7 個小時 49 分鐘成績。呢個成績，比起 Mate 8 差好遠，也比同樣都是有 3000mAh 使用左Qualcomm Snapdragon 820 CPU 嘅 HTC 10 與 LG G5 就跑出 8 小時有多嘅成績差。但七小時已係比起上一代手機有明顯進步，上一代手機可以由 5 小時－６小時嘅成績。Battery Test 去到七小時，代表日常使用連績使用約十小時是無問題，用家不用太怕唔夠電。
▲驚唔夠電 ? 唔緊要，可以入去省電設定去為手機嘅省電模式設定，除左基本嘅限制後台程式，另外可以將屏幕降格為 720p，目的希望透過屏幕下降，減少 GPU 嘅負載從而達到省電效果，呢個方案都好特別。
效能跑分
先講下整體規格，使用了 5.2 吋 1080p 手機屏幕，CPU 使用左華為自家嘅八核心處理器 Kirin 955 2.5GHz 64-bit ，香港版則為 3GB RAM 版本，雖然講就講係八核心，但到底華為自家嘅八核心處理器嘅最後效能會係點呢? 我就拎呢部野去經歷下跑分嘅磨練。
▲ 安免兔只有 94051分，同現今使用 Qualcomm Snapdragon 820 CPU 嘅旗艦機 LG G5（圖中顯示嘅 LG-F700K）取得12萬分相比下有一段距離，不過都唔可以單靠安免免去判斷一部機好同壞，可以睇下其他嘅測試去判斷一下。
▲P9 喺 Geekbench 3 單核得分為 1807分，而多核心足足有 6202分，單核嘅效能大致上係 NVIDIA Tergra K1 CPU 嘅效能，而且都快過使用 Qualcomm Snapdragon 810 同 Samsung Exynos 7420 嘅手機；而走到多核心，Kirin 955喺多核心嘅測試似乎追得上今代嘅 Qualcomm Snapdragon 820 CPU 手機，例如 LG G5 同埋 Samsung Galaxy S7 Edge ，喺 ePrice HK 過往嘅測試中可見 LG G5 喺多核心有 5466分，而且都強勁過 Samsung Galaxy S7 Edge 所跑出嘅 5449分，惟同使用 Samsung Exynos 8890 嘅 Samsung Galaxy S7 所跑出 6367分有段小距離。
▲Geekbench 3 成績唔錯下，睇下 P9 可唔可以打下一城大佬：Vellamo，不過黎到呢一關好似有甜有苦，喺 Chrome 瀏覽器評分上，雖然有4223分係打嬴左 LG G5 嘅 3657分，但係去到金屬測試就俾 Samsung Galaxy S7/ S7 edge 雙雄分別以3557及3633分打敗了，不過喺多核測試再一次證明左 Kirin 955 威力，高達 3520分，直迫Samsung Galaxy S7/ S7 edge 雙雄所跑出 3661及 3441分。
▲Basemark Es 2.0 Taiji 有 58.77FPS，算係合格之上水平。
▲雖然喺 CPU運算上係有出色嘅表現，不過喺 3D 圖形運算上，華為 P9 總係差一點。Sling Shot using ES3.1 是用來測試旗艦手機在圖像運行的效果。華為 P9 差到連 2013年發佈嘅 HTC One M7 都不如，從測試嘅跑分中睇到華為 P9 喺個別項目中只有個位數字嘅成績，顯示左華為 P9 嘅GPU 效能跟現時旗艦手機有差異，所以打機嘅人要注意下呢樣野。
小結：CPU運算能力高，GPU運算能力弱
華為 P9 定位自己係一部旗艦機，效能上貼近今年旗艦機普遍嘅效能，都意味住華為喺自家 CPU 上都有改進嘅空間，往往消費者喺選擇手機嘅時候都會從其效能為其首選考慮因素，雖然華為 P9 喺 CPU單核、多核上有好嘅表現，惟在 GPU 上嘅表現有點失色，對於打機高要求嘅人黎講呢部野未必一個最好嘅選擇，處理日常野可以用考慮下華為 P9，但玩 3D Game 就要三思下。跑分參考資料
LG G5跑分
Samsung Galaxy S7/ S7 Edge 跑分
介面
▲華為 P9 今次預載了 Android 6.0 系統，並使用了 EMUI 4.1 介面，對我一個未用過華為手機嘅人黎講，數字唔係重點，反而著重到底好唔好用，當我第一下開部機嗰陣的確係有好重嘅大陸味喺到，因為同小米用嘅 UI 好相似，從心底內散發左一種陸味，正所謂百貨應百客，雖然我係唔鐘意呢個 UI 嘅設計，但有一樣野要講嘅係佢係一個難得幾順嘅大陸UI，華為 P9 拎上手唔係好覺有 Bug，喺轉頁等等都有唔錯嘅表現，可見工程師喺 UI 上都落左唔少功夫。
▲有讚都有彈，小弟對呢個下拉通知欄真的有很大嘅意見，現今大多主流嘅電話下拉通知欄下拉時首先會有設定，然後會有通知，但係華為 P9下拉時只有通知，如果要去開 WiFi 或 藍牙就必要按下捷徑先可以設定到，猶如重返 HTC Sense 5.0 嘅時代嘅下拉通知欄，好在仲有得設定到捷徑嘅按鍵組合。
▲預載嘅工具充足得黎又實用，生活上嘅需要都可以滿足到，雖然唔係平時好點用到，但係真係要用到嗰陣就發現唔洗上網額外 download個 Apps落黎。
▲令我意外嘅係 screen cap 竟然可以用到捲動嘅功能，無論喺網頁又好定係 Apps 又好，只要 cap圖嗰陣禁下攝取滾動式屏幕，就會幫你滾動地cap圖，真係好滾動呀！
小結：一部不錯的旗艦機
華為P9 雖然係一部大陸牌子嘅手機，不過喺相機就衝出了世界，特別地同Leica 合作，令到鏡頭嘅表現更添一份奶味 (Leica 味道)，而硬件效能不俗，加上價錢也算進取，無錯用大陸機角度黎講呢部機係貴左少少，不過有Leica 呢樣野已經值回票價，所以如果接受到大陸牌子嘅呢個係一個唔錯嘅選擇。想知華為 P9 的影相怎樣 可點選之前 YK 大嘅相機評測
更多有關華為 P9 的消息：
搶先小米 5！Leica 鏡頭華為 P9 登場日期確認 價錢唔太貴？Leica 雙鏡頭加持！華為 P9 到港小米 5 即跌價，你點揀？
評測 : HTC 10、三星 S7 Edge、LG G5、華為 P9 攝力大對決
獨家評測 ：與 Leica 深度合作 華為 HUAWEI P9 攝影實力好誇張!
5.5 吋 P9 Plus 幾時出？ 4GB RAM 同步賣，華為 P9 香港定價搶先爆
華為 P9 (3GB RAM) 於文章刊登時，香港定價 $3880 ，按這裡有更詳細規格及最新賣價。
華為 P9 (4GB RAM) 於文章刊登時，香港定價 $4480，按這裡有更詳細規格及最新賣價。
華為 P9 Plus 於文章刊登時，香港定價 $4880 ，將於 5 月下旬開賣，按這裡有更詳細規格及最新賣價。
