版主行場時發現，華為 Nova 2 Plus 已可預訂，實機預計今晚稍後時間就會抵達大舖，明日起正式開賣。咁知道有得預訂，版主當然會順勢同大家問埋價錢啦！華為 Nova 2 Plus 香港建議零售價為 $3398，大舖並沒有「即減優惠」。不過好搞笑，今日預訂，聽日開賣，咁仲訂黎有甚麼意思呢？店員笑言: 無～
回顧上代 Nova Plus，一出開價 $3080，如今比上代高左 $300，又有甚麼地方唔同左呢？
Nova 2 Plus 採用了 5.5 吋 1080p 屏幕，整體風格跟旗艦 P10 系列相似，不過將指紋辨識鍵保留在機背部份，並用上一體化金屬機身設計，機身厚度只有 6.9mm。另外，Nova 2 Plus 配備了 Kirin 659 八核心處理器，內置 4GB RAM 以及 128GB ROM (支持最高 128GB 記憶咭)，並提供獨立的 Hi-Fi 晶片。
相機部分，Nova 2 Plus 擁有雙主鏡頭，兩個鏡頭分別為 1200 萬像素以及 800 萬像素，不同於 P10，Nova 2 Plus 用的是廣角 + 長焦的組合。不過，雙鏡頭都不是重點，Nova 2 Plus 真正 sell 的賣點，應該是其 2000 萬像素前置鏡頭，並支持美顏 4.0、人像模式、手勢快門等拍攝功能。而 Nova 2 Plus 的電池容量，則有 3340mAh，會運行 EMUI 5.1 (兼容 Android 7.0) 作業系統。三千幾蚊，有 128GB、P10 風格外型，又有 2000 萬像素自拍相機，網友又認為值唔值呢？
