華為 Mate 40 Pro 開箱評測
▲ 包裝盒就同平時華為 Mate 系列手機差不多，都係黑色平平實實，無乜特別，最多隱約見到有個好似鏡頭設計咁嘅圓圈圈。
▲ 包裝盒側邊會見到有基本規格資料，我手上借到嘅係黑色 Mate 40 Pro，內置 8GB RAM 以及 256GB ROM (我之前都有提過，香港會賣呢個容量版本)，支持雙 SIM，並且配備最新嘅 Kirin 9000 5nm 處理器。
▲ 包裝盒入面會見到有 Mate 40 Pro、透明軟殼、USB Type C 線，而且仲會有 iPhone 12 都無嘅充電火牛以及耳機。
▲ 充電火牛支持最高 66W 功率嘅輸出。
▲ Mate 40 Pro 採用了 6.76 吋顯示屏，解像度為 2772 x 1344。
▲ 屏幕左上方會見到好似藥丸狀嘅雙鏡頭。
▲ 因為佢係用上「瀑布屏」，所謂瀑布屏就係指佢個曲面屏幕弧度接近 90 度，而官方數字指 Mate 40 Pro 的瀑布屏為 88 度。另外，右側會見到有實體音量鍵以及開關鍵，但同時喺屏幕側面用拇指點兩下，都會支持虛擬音量鍵。但既然有虛擬音量鍵，咁個實體鍵又係咪多此一舉呢？
▲ 機背係用上陶瓷材質，望落去係幾靚，但真正使用就會易沾指紋。
▲ 主相機位置係用上咗圓形環狀嘅設計，具有三個鏡頭，分別係 50MP RYYB + 20MP 超廣角 + 12MP 潛望鏡頭。而圓環嘅中間會有寫住 LEICA 字樣。
▲ 底部係 Type C 插槽，無 3.5mm 耳機孔。
▲ 上手！就咁講個樣，係幾靚嘅，個鏡頭設計都算係型，好似好睇過 iPhone 果種鏡頭排列方式。但陶瓷黑容易沾指紋，遠觀可以，用就要成日抹，不過一般網友應該都會戴返個套，好似安全啲，或者就唔會太介意，係好似版主我成日唔戴套裸跑，就會好 care 到底佢係咪易沾指膜。有關效能、相機等部分，版主稍後時間會有其他文章。
乜都唔理，淨係講個樣，你又覺得 Mate 40 Pro 係咪合格呢？留言討論下啦！