打開 10.2 吋！3.6mm 厚度 全球最薄！
華為革命性推出全球首部三摺手機 Mate XT，將佢完全打開之後，屏幕尺寸有 10.2 吋之大，同一般嘅平板電腦尺寸無異，閱讀面積提升咗 2 倍以上，而看圖面積更提升咗 2.5 倍。同時，Mate XT 更號稱係「全球最薄摺疊屏幕手機」，首次採用華為天工鉸鏈設計，解決內外彎折嘅問題，令手機打開後可以更加平，而且更加耐用，將佢完全展開之後，厚度僅為 3.6mm，比起 Honor Magic V3 更加薄，而 Mate XT 嘅專用保護殻亦好似 Magic V3 嘅保護殻咁，都係可以變成 270° 旋轉手機支架，令呢部 Mate XT 隨時都可以豎起來使用，滿足唔同場景需求。最屈機嘅係，華為亦推出 Mate XT 專用鍵盤配件，配合使用直澄可以有仿如筆電嘅體驗！另外，Mate XT 機背用上咗素皮材質，用上素皮材質除咗令整體設計更加有品味，而且對我呢啲容易出手油或者手汗嘅人嚟講，更係可以防指紋，抵讚！另外，Mate XT 相機用上八邊形鏡頭模組，望落去高級感更重，機身擁有「岩脈紋理」，經歷過 22 天嘅高溫鍛造，當中包括 80 層精鋼以及 78 道工序，設計相當精緻，有黑、紅兩種顏色選擇。
內置 5600mAh 大電池 + 支持天通衛星
硬件方面，Mate XT 喺發佈會上並無透露用咗乜嘢處理器，不過大家都知道，佢哋唔講代表乜，多數都係佢用咗自家嘅 Kirin 處理器，而在此之前，傳聞係用上 Kirin 9 系列處理器，內置 16GB RAM 以及最高 1TB ROM，電池用上 5600mAh 嘅硅碳負極電池，並採用三電芯並聯設計，支持 66W 有線快充以及 50W 無線快充，確保持久的續航能力。另外，手機還支持天通衛星通訊服務，就算去到無信號嘅環境下，喺危急嘅時候都可以同外界保持聯絡。華為 Mate XT 具有三鏡頭 + 一系列 AI 功能
相機方面，華為 Mate XT 具有後置三鏡頭，分別為 5000 萬像素 1/1.56 吋廣角鏡頭、1200 萬像素超廣角鏡頭以及 1200 萬像素潛望式長焦鏡頭，支持 5.5 倍變焦，同時係首款搭載十檔可變光圈嘅摺芒手機，最高支持 F1.4 大光圈，根據場景智能調控光圈大小。另外，Mate XT 亦提供了 AI 文章摘要、AI 翻譯專家、對照翻譯以及 AI 資深編輯等功能，而在相片方面，它亦支持多項 AI 圖片功能，支持 AI 消除、AI 擴圖以及 AI 雲增強功能。
華為 Mate XT 建議零售價
最後價錢方面，Mate XT 有三個容量選擇，包括有 256GB、512GB 以及 1TB ROM，建議零售價分別為 19999、21999 以及 23999 人民幣，折合港幣約 $21898.8、$24088.8 以及 $26278.8，並於 9 月 20 日正式開賣，就跟 iPhone 16 系列一樣。傳聞中 Mate XT 可以炒到 7 萬都得，唔知大家又有無已經預約咗買機呢？