Panasonic Lumix CM1 星期四抵港！香港賣價唔過萬？
上次有網友問呢部 Panasonic Lumix CM1 點解可以炒到咁貴，其實第一批日本唔連合約既 CM1 相當限量，少貨當然就炒得起啦，而呢部機本身賣價都唔平，日本賣大約 12 萬日元（約 $7,815 港幣），預計香港會賣 $8,000 左右，點都平過而家過萬既炒價，而官方亦確認左香港賣的 Panasonic Lumic CM1 會支援香港的本地 4G LTE ，不過支援到什麼頻段就要等一等先知啦。點解要等一等？因為今個星期四 (4 月 30 日）就是香港 Panasonic CM1 的發佈會，香港行貨與賣價都會即刻確認，版主行過先達現時 CM1 炒價都要 $10,000 ~ $11,000 ，想買的話等多幾日可能有驚喜價啊！如果你問版主呢部機值唔值得入，倒不如諗下自己鐘唔鐘意先！版主 Eddie 之前係試過呢部機，只有 4.7 吋屏幕的它論體積是塞到入褲袋，亦伸縮鏡頭設計令佢都唔會太厚，啟動相機的反應與速度都夠快，就差在冇得 Zoom 了。當然佢有 20MP 的 1 吋感光元件，這個物理規格做到其他手機做唔到的景深效果，亦有更好的銳利度與雜訊控制，而佢亦有真正光圈可以控制，不過冇光學變焦係一個遺憾（有仲得了？2 倍以上我即刻買！），要講缺點既話版主係覺得 2600mAh 電池真係唔夠用，如果當主機的話隨時用唔到半日啊！
今日版主都行過先達，見到 Panasonic Lumix CM1 炒價仍然過萬，就算二手都要 $8,200 以上的價位，相信行貨抵港會對水貨價錢有唔少影響啊！又有幾多網友係期待呢部機係香港登場呢？唔知會唔會有「上台月費」可以平價買呢？大家收到風既都可以討論一下啊！
▲想參考番 Leica 廣角鏡頭的成像？可以參考版主 Eddie 在香港的這篇實拍啊！
▲先達仍然寫限量 2000 部和有炒價，想買都係等多幾日啦
在文章發佈的時侯，Panasonic Lumix CM1 仍未公佈香港的定價，按此看詳細規格和最新賣價。
