大鋪最後清貨！Panasonic Lumix CM1 原價 $8490 四折促鋪
今次的主角其實都唔難估，因為有 1 吋感光元件的手機，除左 Panasonic Lumix CM1 之外，其實都無其他手機了。如果大家仍然記得的話，其實 CM1 首輪日水到港後，曾經炒過萬，不少網友都期望行貨會推出。不過，當 CM1 正式登陸香港，定價要 $8490 ，望住呢個天價，眾人的希望也當場幻滅了⋯⋯因為年代都有點久遠，版主再同大家重溫一下 CM1 的規格。呢部 2015 年到港的手機，採用 4.7 吋的 1920 x 1080 解像度屏幕，處理器就係 Qualcomm S801 2.3GHz 四核心配 2GB RAM 以及 16GB 內置容量。相機方面，主鏡頭除左有 1 吋感光元件之外，鏡頭都用左 2000 萬像素 28mm f2.8 光圈 Leica 鏡頭，不過前鏡頭只有 110 萬像素。電池方面就有 2600mAh。
如果大家見到呢個規格，都覺得不錯，咁就以下呢段就可以睇落去。其實，CM1 而家係大鋪，基本上已經絕跡，但係百老匯其實尚餘少量陳列機，版主試過拎上手睇過，雖然係機殻、邊柱部份刮花左，但整體都尚算可以接受，而且陳列品都會做返一年保養。價錢方面，可能係為左清貨，價錢由 $3998 減到 $3198，對比原價當然平得多。至於值唔值得入手，版主就覺得價錢係吸引嘅，但陳列機就始終會令唔少人卻步。如果想入手全新行貨的話，可以留意 Panasonic Shop ，版主問過而家價錢是 $4990 。對了，關於 CM1 的相機表現，其實 ePrice 都有實測過，大家可以睇睇。睇完再講講意見吧！
▲ 可以見到，CM1 系統仲係用緊 Android 4.4 ，相當懷舊。
▲ 呢部 CM1 版主在銅鑼灣找到，新淨程度個人覺得可以接受。
▲ Pana Shop 原來仲有 CM1 可以買到，價錢版主問過就係 $4990，當然是「旗艦價」！
在文章發佈時，Panasonic Lumix CM1 行貨賣價 $4990 （陳列機價為 $3198），按此看手機詳細規格及最新賣價
