加入 24mm 超廣角，新 HDR 算法！ Z5 對焦速度大提升！
Sony 上一代 Xperia Z3+ 的主鏡頭上沿用了 Z3 時的 2000 萬像素主鏡頭，因此以 Sony 旗艦機而言其實 Z5 這一代才可算真的在相機上有大革新。雖然 2300 萬像素 1/2.3 吋感光元件從字面來看很難給予大家驚喜（畢竟上一代都有兩千萬像素了），但實際使用時， Z3+ 跟 Z5 不論是感覺還是效果也是有很大分別的。這次 Xperia Z5 的相機重點功能除了有 0.03 秒高速對焦以及 5 倍清晰變焦這兩組已經套用在 Xperia M5 的功能外，其實還在主鏡頭上加入了 24mm 廣角以及用上全新算法的 HDR 功能。前者能夠令相機能夠拍到的畫面更多，而後者就能夠為相機提供在更佳的顏色表現以及不會做成相片過曝或者過暗。
提完新的相機功能後，係 Facebook 上有不少網友都很關心在使用 Qualcomm S810 的情況下， Xperia Z5 在影相或者拍 4K 片期間會否帶來過熱以至 Force Close 的問題，另外係電池表現方面也有不少朋友很關心。所以今次版主係帶同 Z5 到東京不同地方試指期間，同時會以 Z5 作為行程時的主機。換句話講即係除左影相之外仲要兼顧埋用 Google Map 搵路，用不同的 app 查路線以及搵景點等工作。大家都會明白係旅行時手機的電池續航力是相當重要的，除左因為使用量會比日常生活大（一般人有幾可平日要不停 Google Map 同影相？），更加係要長時間 Keep 住不停用。所以旅行期間，手機電量的消耗分分鐘會比起電量測試去得更盡！
▲ 因為今次版主係偷偷走出去影相的關係，時間相當緊迫，早上 6 點半就要起程了。可能好多網友都會煩惱日本交通發達，唔知甚麼方法先係最快去到目的地。相比起睇 Google Map 或者其他 apps ，版主就覺得問酒店姐姐最穩陣，嘻嘻～大家可以見到出發時 Z5 電量全滿，但接下來會係一個相當嚴峻的挑戰呢！
▲ 版主的起點是「品川駅」，從呢張相中大家可以見到 Xperia Z5 的動態範圍相當廣闊，係月台外面的環境都可以請楚見到的同時窗邊的電線也清晰可見。另外，大家可以留意下在月台對面暗位之中的 Banner 之中的字體也相當清楚，細節方面也很不錯呢。
▲今次偷偷走出來的行程其實不算很順利，其中一個問題就係天公不造美，當日早上天色白矇矇一片的。第一站版主到左淺草，但我忘了早上 7 點淺草係乜嘢都未開的⋯⋯從相片中可以見到， Xperia Z5 在色準方面很不錯，雷門燈籠的紅以及「金龍山」招牌的綠跟現場的旗色差不多，另外用上左 24mm 廣角後， Z5 在相片未見有變形的問題。
▲ 眼見仲見世商店街未開，版主很快就離開了。圖中的淺草駅可以見到在邊緣畫質上雖然略有下降，但不算明顯。另外大家可以看看淺草駅室內，在受光相當不足的情況下仍能大約看到內裡的輪廓，細節上的處理很不錯。
▲ 來到淺草當然要去埋睇 Skytree ，呢隻眼型石像是途中看見的有趣東西。當初版主見到隻貓雙眼閃閃發光仲以為石像貓用左鏡面來做眼晴，用 Z5 放大先發現原來貓眼晴內係對岸 Skytree 的風景呢！
▲ 個人覺得係「吾妻橋」旁邊影對岸的風景是很美的，而係逆光的環境下就版主就將 Z5 調到手動模式、開啟 HDR 以及將 EV +1 ，可以見到用了新算法的 HDR 效果幾好，真係沒有過曝或者不夠光的情況，後面白雲可及前面的 Skytree （同奇形怪狀的建築物）都清楚見到。
▲ 係離開左淺草後，版主到左大門站，因為上網見到人講係果到影東京鐵塔最好，想不到途中見到一個「德川將軍」的廟宇，圖中的石像就係在那裡影的。講到今次 Z5 ，個人最滿意的地方就係在顏色展現方面水準不俗，還原度也不俗。相片中石像的冷帽以及周圍的風車色彩繽紛之餘又能忠實還原現場顏色，不會過份。另外在高像素的幫助下，石像的紋理也很清晰。
▲ 好奇心驅使下，版主嘗試用 Z5 去影低許願牌，比大家睇下許願的內容是甚麼
。從圖中可以見到不論是木紋還是許願板上的文字都相當清晰。
▲ 呢張相係特意為左睇下 Z5 在細緻度方面的表現而拍的，大家可以放大來看看，相信不會比現時頂級的 Android 旗艦遜色！
▲ 終於見到東京鐵塔了！可以見到現場又係一個逆光的環境，版主一樣要用手動模式開啟 HDR 去影，效果方面個人也是很滿意的。 Sony 提到新的 HDR 能令成像在顏色以及銳利度上有更好的表現。在相片中可以見到東京鐵塔的紅白色以至樹上的黃葉也能清展現出來，背景也沒有因為過曝而失去所有細節的情況。當然，跟 Skytree 相比，今次環境對 Z5 的考驗更高，可以看見 Z5 在樹葉暗位上細節不太夠，這方面還可以再進步。
▲ 時間話咁快就差不多十點，證明版主因為盪失路而失去左不少時間，唯有將就一下食個摩斯漢堡了⋯⋯提到影食物， Sony 係上一代 Z3+ 起就為相機加入左美食模式。來到 Z5 ，係 Auto Mode 上面就再加入了新功能，就係比用家調光暗度以及色溫。以上就係「變色前」以及「變色後」，大家又覺得將色調改變後有無更吸引？
▲ 好，早上的偷偷地去玩行程到左 10 點半左右基本結束了，可以見到係四個鐘的超高用量下 Z5 都仍然有 40% ，個人仍是滿意的，但要留意係版主手上的 Z5 其實係原型機，不是最終發售版本，所以詳細的電量測試還是留待正式版推出後再測比較好。（要知道手機廠商提供的一般使用時間係計一般情況下的用量，同長時間不斷地使用是完全不同的情況。沒有長時間影相，只係用作「 WiFi 蛋」的 Note 5 到十點半時電量都只剩一半左右⋯⋯）
▲回到酒店集合之後版主就跟大隊到左銀座的 Sony Building 參觀，之前有好似網友問到 Sony 總店位置相信所指的就是呢間了（在地鐵站 B6 出口旁邊），係 Sony Building 當中有一組很有趣的小鎮模型，對於試對焦速度來講實在係個理想的地方，以下的影片大家可以見到來到 Z5 上， 0.03 秒對焦確實很快。另外 Sony 官方雖然未有提到，但係使用的幾日當中版主留意到係操控性上 Z5 比起前代其實有很大的提升，好像相機啟動速度就快了不少，感覺跟 Samsung 的 S6 edge 差不多。
▲ 參觀完 Sony Building 後有一段自由時間，版主就把握機會到左原宿的竹下通，呢個地方美妙的之處在於予人色彩繽紛的感覺，係呢個環境下對 Xperia Z5 的發揮係頗為有利的。上圖可以見到又係一張「美食s」照，除左粉紅色的背景外，不同食物上的顏色都相當搶眼，同時間又不會太 over，能反映到現場環境實況。
以上就係版主最後一日「自由行」嘅精華，但相信好多網友都會覺得「唔夠喉」，除左相不夠多之後，夜拍方面 Z5 的表現也未見到呢！以下就係版主係回港前一日所到之處的精華，睇完可能會比到驚喜大家都唔定。
▲ 話說， Sony 官方對於 Z5 相機上的表現可以話信心十足，係行程之中就帶左港台的記者團到一個庭院試相，也是版主第一次詳細測試 Z5 相機表現的地方。上圖就係一個光暗高反差的環境下拍攝，相當考驗相機的光暗寬容度，因為處理不好的話被陽光照射的地面很容易會出現過曝而被樹陰所遮蓋的部份就會過暗，大家又覺得 Z5 的表現如何呢？
▲ 之前提到 Sony 對焦速度快左不少，上圖也是一個好證明，游動中的鯉魚要用手機鏡頭捕捉到其實不易，但係 Z5 都可以應付得來。睇下，對焦點「黃金鯉魚」在放大後也能清晰可見，另外不得不再讚就係 Z5 相機在顏色上表現相當討喜，準確而不會太 Over 。另一點可以一提的就係相片立體感突出，水波紋跟鯉魚也能清晰的分別出來。
▲ 庭院照的最後一張就係戲玉所在了，呢張相片大家放大後應該都會被震撼到，係蜘蛛啊！從相片中可以見到呢隻蜘蛛其實不算很大隻，而且在網上其實不是完全靜止，要對焦再影到難度相當高，但大家放大後，除左會見到整隻蜘蛛的紋理之外，連腳毛都清楚影到！
▲ Z5 另一個主打相機功能就係 5 倍清晰變焦，同其他新功能相比其實效果係相對上會遜色一點，因為原理其實就係在高像素的支援下透過裁切以及銳代效果而成。版主的個人意見就是在使用 5 倍清晰變焦時，不要「去得太盡」，那就能得出放大了但細節得以保留同時雜訊不會太誇張的成像了。
▲ 來到夜景方面，版主就到左新宿去試一下 Z5 的表現。好老實講，夜拍實在不是 Z5 的強項，跟現時可以話係最強的 LG G4 以及 Samsung Note 5 相比可能會略為輸蝕。不過係成像方面其實 Z5 比起前代仍然有明顯的進步，可以見到係燈籠上的文字都可以清楚看見，油畫問題比起以往是有所改善的。
▲ 以上就係著名的新宿歌舞妓町啦！可以見到 Z5 能夠很出色的把現場五顏六色的環境展現出來，同時霓虹燈中的字體也能清楚見到。相片在沒有過曝的情況下也能看見街上行人的衣飾。這就是版主覺得夜拍上顏色比起細節更重要的原因了，因為會「聞相」看細節的人少，但放在經壓縮的 Facebook 或 instagram 卻是一般人的習慣。
▲雖然話夜拍不是 Z5 的強項，但這並不是指在夜間環境的表現不好。相反，比起前幾代的 Sony 旗艦，版主覺得 Z5 的夜拍實力可謂超班。上圖的食肆燈光昏暗，但內裡的情況仍能清楚拍到，還有白平衡準確度也是 Z5 的強項，在周邊燈籠的影響下，比卡超的黃色也能忠實的展現呢！
▲ 來到最後一張相了，同樣可以見到係夜間情況下 Z5 也能拍出賞心悅目的相片。今次現場環境較上一張相光，所以假花的細節也能展現出來，白平衡準確度上也是「無得彈」。
小結：操控性上進步明顯，新功能實用。 Z5 會係值得升級的新機！
留意到不少朋友都好留意 Z5 系列（包括埋 Z5 Compact 以及 Z5 Premium ）的表現，看來不少 Sony fans 都對新機寄予厚望，始終 Z3+ 的表現同大家理想之中係有點落差。版主本身都有用 Z3+ ，而係用過幾日之後都覺得 Z5 係表現上係足以說服我換機的。首先係大家都好關心的發熱問題，來到 Z5 上，即使版主係大白天連續不斷的拍照（在庭院拍擇時間為個半鐘，第二日除左搭車就一直在影相），都未預到有過熱而 Force Close 的情況， 4k 拍片都沒有問題。長時間開相機影相時感覺手機都只係微暖，遠未至於辣手（呢方面版主經驗豐富，熱情如火的手機大部份都用了一段時間，但可能因為咁容忍度會較高），所以最基本來講，今次的 Z5 最少可以話叫用家用得心安先。係相機表現方面，用了新感光原件模組後 Z5 的成像可以挑剔的地方真係唔多，今次作為「旅行手機」都可以話得心應手，當中有些相片質素可以媲美入門 DC 了。個人而言，Z5 最出色的其實是在操控性上的表現，這些地方都可以看到 Sony 花了不少心思，好像是快門鍵除了質感更好按之外，啟動相機的速度有明顯提升。另外就是 Superior Auto Mode 上終於支援 2300 萬像素。加入了 2300 萬像素的選項後，除非在特殊環境，否則版主一般會 Auto Mode 的，因為方便多了。同時操控性上的進步還有在對焦速度上的明題提升等等。當然， Z5 還是有可以做得更好的地方的，好像是在夜拍方面，比起其他旗艦 Z5 的畫質仍是稍嫌有點油畫化，某些情況下會有紫邊的情況出現。最後一點就是，個人相當希望 Sony 能在手動模式上加入快門的調較，因為現時不少主流旗艦都在手動模式上加入了更多自訂選項，而 Z5 手動模式選項還是略少一點。不知大家又覺得今次 Z5 的表現如何？如果大家對 Z5 有任何問題，都可留言問啊（ Drop Test 或者能否防火呢啲問題就⋯⋯在下不才難以解答
）
個人相當喜歡影鐵路，所以拎到 Z5 其中一件必做的事就係試下影 JR 山手線。可以見到成像係唔錯，但都係未能捕捉到行駛中的山手線，不知加入快門調較後又能否做到呢？
Sony Xperia Z5 係文章刊登時，賣價為 $5698，按這裡有詳細規格及最新賣價。
