網友問：點解 Sony Xperia Z 系列個外觀「兆年不變」？
為何 Sony 堅持過左咁多代 Xperia Z 系列之後都仲係用緊 OmniBalance 呢個設計，之前已經有不少人問過，好似上次 Sony 在港發佈 Xperia Z3+ 時， Z3+ 手機的 Project Manager 已經答過，話 OmniBalance 係 Sony 認為最出色的手機設計。呢個答案雖然好直接，但係難免簡單得有點過份。係日本的行程之中就有機會見到 Sony Mobile 的藝術設計總監，而他們所提供的答案就比較詳細。Sony Mobile 的藝術設計總監就話，對 Sony 而言，手機的設計是一種理念，目標就係予人簡單的感覺，所以當選定左 OnmiBalance 呢個設計時，佢哋的目標就係要不斷簡化手機的外型，所以每項設計都要係有用才會加，好似在 Z5 上的指紋掃描放在開關鍵之中，就係想令手機外型做到最簡單（也就是這個原因，指紋掃描器沒有放在機面或機背）。另一個重要因素就係要顧及歐美市場，因為歐美人一般換機時間較長，如果設計也不能改變得太大。
▲ Xperia Z5 跟 Z3+ 一樣是用了 OmniBalance 設計，在外型上分別不算很大。
▲在機背上不論是 Z3+ 還是 Z5 ，設計都很簡潔。
外型沿用 OmniBalance 設計或會讓消費者失望，但 Z5 風格跟前代明顯有不同
就版主使用後的感覺來講，其實有關 Xperia Z5 的外型真係值得詳細講下的，因為在設計上雖然 Z5 同上一代 Z3+ 都係用左 OmniBalance 設計，但兩部機給予版主的感覺分別卻很大。相信好多網友不滿 Sony 不改手機外至設計的主因就係因為「辨識度」唔夠，好似 Z3+ 同 Z3 兩款機如果不存細看手機的邊框設計，係好難分到兩部手機的（除左係 Z3+ 的淺藍色），係「辨識度」不足的情況下，的確容易令人覺得設計一成不變、沈悶。但來到 Z5 上，雖然大致設計無變，但在顏色選用同埋細節上 Z5 同 Z3+ 的分別係相當大，足以令人一眼睇得出係兩款不同的手機。 Z5 今次係機背用左磨沙玻璃的設計，令整部機看起來更低調。（磨沙玻璃仲有另一個好處，就係感覺上無咁受熱）另外在配合磨沙玻璃設計下，係用色上今次 Z5 就更貼近自然，以版主試用的 Dark Green 為例，將手機放入樹叢中感覺是不會有違和感的，而跟亮面機背的 Z3+ 在邊框設計方面也有不同。在 Z3+ 上，邊框質感跟機背有明顯分別，顏色也不一致。而在 Z5 上，邊框不論在手感以及顏色跟機背基本上也是一致的，令人感覺 Z5 更簡約，有點像一個盒子。
坦白講， Z5 係設計上都係用左 OnmiBalance ，對於要強烈新鮮感的朋友可能仍然會覺得 Z5 設計很悶，或會失望。但從「辨識度」來講， Xperia Z5 同前代的分別係明顯的，最少離遠一望都能夠認到，而且質感也有所提升，亦可以見到 Sony 在手機外型的設計上正朝向他們的目標進發。至於網友們想知 Sony 幾時會轉外型，從佢哋的回應來看，可以預期最少有一段時間都不會轉了。
（題外話，如果大家心水清，會發現 Z5 的「白色」版本的機背其實係銀色，同前代的「白色」有明顯分別，版主覺得係最靚的 Z5 呢！）
▲ Sony 提到係邊框設計上， Z5 最主要的新賣點就係將指紋掃描加入電源鍵，而跟音量鍵顏色不同是因為想令用家能一眼分別出來。（但可以留意，在邊框顏色上， Z5 的邊框跟機背顏色機乎一樣，同時也是磨沙質感，令手機的手感能保持一致）
▲ Sony 提到 XPERIA Logo 係 Z5 其中一個可以令人輕易分別出來的標記，但個人認為 Z5 的用色跟前代有明顯分別，這已經足以讓人一眼分別出 Z5 及以往的 Xperia Z 系列手機了。
▲在防水蓋的設計上， Z5 跟 Z3+ 也是有不同，從好用程度來講， Z5 係使用時係會更方便的，因為 Z3+ 的設計上有一個小問題，就係用家不能輕易確認防水蓋是否已經妥善關好，而且要完美咁蓋好防水蓋也不容易。
▲ Sony Mobile 的藝術設計總監提過， Xperia Z5 四隻顏色目標都係要讓手機融入生活，給人家庭的感覺。所以版主就嘗試模擬出一個「日活化」的背景，咁樣睇 Z5 有無更好睇？
▲ Z5 的 Dark Green 概念來自新草的線色，所以特意將手機放近草叢，果一刻，版主覺得 Dark Green 又真係幾好睇。（但都係「白色」最正！）
網友：試 YouTube 4K 片，可以的話裝 Asphalt 8 試試！
因為版主最後只係得 Z5 可以用耐少少的關係，所以最後都無試到 Youtube 4K 片（唔係用 Z5 Premium 試來都沒意思吧？）但 Asphalt 8 就有下載到，如果大家擔心會 Force Close 的話，不用擔心，因為版主連玩兩鋪都無問題，也不覺得手機有發燙。但最後因為兩次都係包尾，對自信做成莫大打擊，一氣之下 Del 左 Game 了⋯⋯（後來發現連溫度都忘了 Test⋯⋯唯有再有實機試玩時再補上吧）
▲ Asphalt 8 版主真係有下載到落 Z5 到玩，但忘了最重要的 cap 底試玩後的溫度⋯⋯（之後借到機再補上啦唯有
）多位網友：發熱嚴唔嚴重？影相打機會唔會勁熱？
果然 Qualcomm S810 比人的印象相當不好，所以對於 Xperia Z5 ，最多網友問的問題都係同發熱問題有關。係另一篇拎住 Xperia Z5 遊東京（兼試相）之中，版主就提到係當日亦有 Check 住手機的發熱情況。在當日行程中，有三個地點版主認為對於 Xperia Z5 來說是相當具挑戰性的：分別是早上到淺草，由「仲見世通」一直開著相機影相至淺草寺前。另外就是到「吾妻橋」時，由「淺草駅」的方向「吾妻橋」走到另一邊，沿途也是開著相機不停影相。
▲ 到左淺草寺，版主一直有用 Z5 不停咁影相，但篇幅所限不能貼晒出來。
▲在吾妻橋上也是，講起來當日天氣真係不太好呢。
大家都明白影相不會令手機忽然升溫，但長時間把亮度調光再開著相機影相就很容易令手機溫度急升。兩次版主都選擇了在打開相機影相一段時間後再睇睇 CPU Z 的溫度，以下就係 Z5 的成績了。可以肯定咁講，係大約 48 小時對著 Z5 的日子裡面，版主係影相時係未遇到有因過熱而出現警告，以及 Force Close 呢兩個問題的（準確來講係在任何情況下都未預到過，包括打機時）所以個人而言是很滿意啦！
▲ 左邊係早上 7 點半左右在淺草寺時手機的溫度，大約在 40 度左右，到左吾妻橋時也是差不多。
另一個對 Xperia Z5 有很大考驗的環境就是到 Sony Building 拍攝 4K 短片了，係 Sony Building 內，版主試過拍三段影片，長度分別為 3 分鐘 03 秒， 30 秒以及 43 秒。要留意的地方係，在拍攝 4K 影片時，Z5 係會出現提示，提醒用家在溫度急升的情況下， Z5 或會自行關閉相關應用程式。這個拍片前的提示其實不是話比大家知手機已經過熱，而係一個預告，所以不用太擔心（用家也可以選擇以後都不顯示通知）。係拍左 3 分鐘 4K 短片後再查後 CPU Z 時， Z5 的溫度果然是比起不斷影相時更熱，但其實都只係比起跑安兔兔時高少少，亦未到達 50 度的水平，機背係會感受到有點熱的，但同時係 Z3+ 的用家，版主就覺得相對之下 Z5 的發熱情度完全係可接受的水平。但個人來講還是不太建議大家常用 4K 拍片的，不是因為發熱問題，而是因為耗電問題，拍了三分鐘的 4K 影片就用左 9% 的電量。
▲ 之所以拍三條 4K 片，係因為第一條的顏色被版主手殘調錯了，搞到色調變得好奇怪⋯⋯
▲ 所以再來一條沒有作出任何調整的 4K 片。
▲ 唔夠喉的話再來多一條。
▲ 拍完三分鐘的 4K 影片後，手機溫度的確係上升左不少，比跑安兔兔還要高，但卻未到 50 度。
以上就係版主今次係大約用左 48 小時後對 Xperia Z5 的大約感受了，其實不少網友對於 Xperia Z5 系列仲有其他地方感到興趣，好可惜試玩時間有限，版主都未能試到。不過！因為今日就係 Xperia Z5 的發佈會，相信到時都有機可以借到，如果大家有甚麼東西想知的話都可以留言講講，版主返到香港時再試啊！
Sony Xperia Z5 係文章刊登時，賣價為 $5698，按這裡有詳細規格及最新賣價。
