強項001 ： 預測追蹤對焦
首先我要俾個讚！係 Sony Xperia X Performance 與 X 上面新加嘅預測追蹤對焦功能，對我來講，真係非常實用。原因無他，皆因我係一個電-車-迷，平時得閒無事好中意去影下電車，靜止的電車影起上黎當然容易，但移動中的電車就好難攪。一般智能手機上的相機，都只能夠定點手動對焦，面對着移動中的主體，當你一點屏幕，再按快門，主體已移離對焦點，要清晰對焦拍攝也來不及，有時甚至會出現 out focus 的情況。然而，Xperia X Performance 加入的預測追蹤對焦功能，只需要一點移動中的目標主體，相機就會自動預測主體的移動路線，追住移動主體進行對焦。以下我將會借助一套模型電車，來示範一下。熊大亦找了兩部同樣採用 S820 的手機進行對比，讓大家看看有追蹤對焦以及無追蹤對焦的差別。
▲ 影片首兩段是另外兩部 S820 CPU 手機，可見係拍攝移動物件的情況下，要手動對焦再拍，係有點麻煩。而 X Performance 的預測追蹤對焦，為用家省卻了手動對焦部份，加快拍攝移動物件的速度。
同期手機比拼
剛才就同大家示範完到底預測追蹤對焦是甚麼一回事，咁而家就讓大家看看，有追蹤對焦同無追蹤對焦，出來的成像有甚麼不同。以下三組圖片，就是上面影片示範拍攝玩具電車的情況，分別有 Sony Xperia X Performance 及兩款同期採用 S820 的手機拍出來作對比。
▲ 由 X Performance 拍攝，左面 (或手機 M 版上面）可放大睇原圖。右面是原圖裁剪電車部份。
▲ 由 S820 手機 A 拍攝，左面 (或手機 M 版上面）可放大睇原圖。右面是原圖裁剪電車部份。
▲ 由 S820 手機 B 拍攝，左面 (或手機 M 版上面）可放大睇原圖。右面是原圖裁剪電車部份。
從以上三圖中我們可以看到，Sony Xperia X Performance 與兩款 S820 手機，所拍攝出來的相片質素看似差唔多 (縮圖呀! )，但如果仔細看電車縮圖，Xperia X Performance 影出來係最實正，亦無 Out Focus 感覺。至於另外兩部沒有追蹤對焦的 S820 手機，表現又如何? 先看看 S820 手機 A，我們可以見到其實出來的成像亦算不錯，但相比 X Performance，還是不及 X Performance 的實正。至於 S820 手機 B，則明顯看到出現 out focus 的情況。另外，由於兩部手機都沒有追蹤對焦的關係，對焦速度相對 X Performance 慢。
強項002 ：0.6 秒快速啟動連拍攝
試完預測追蹤對焦功能之後，將會示範一下 Xperia X Performance 的 Quick Launch and Capture。事實上，在 Xperia Z5 Premium 上都有類似的功能，在關閉屏幕的情況下，長按快門鍵，就能開啟相機。然而，Z5 Premium 雖然能夠快速開啟相機，但之後你仲要另外再按快門鍵，其實計起上來都快唔到幾多。今次 Sony 在 Xperia X Performance 的 Quick Launch and Capture 上再走多一步，同樣長按快門鍵，0.6 秒快速啟動相機不特止，在這 0.6 秒入面，甚至已經同你瞬間影到張相，實現真真正正的 0.6 秒快速啟動連拍攝，對比其他對手，真係搵唔到比它快的手機呢! 實在是非常厲害!
你會問，到底呢項功能，會在甚麼時候用到呢? 有! 當然唔係叫你偷拍啦! 例如當你咁啱行過公園仔，見到有隻蝴蝶定左係朵花上採蜜，你想影佢，但唔排除等得你開相機黎，隻蝴蝶已經飛走左。又或者當你搭緊巴士的時候，剛好見到窗外有個景幾靚想影低，呢個時候，Quick Launch and Capture 就大派用場了! 簡單來說，Quick Launch and Capture 的主要用途，就讓你減低錯過重要時刻的機會，捕捉最珍貴的一刻。比個 Tips 大家，如果用 Quick Launch and Capture 的話，影中距離的主體，效果最好。
0.6 秒快速啟動連拍攝測試
▲ 有時候如果同朋友一齊去公園散步，見到眼前的風景好想影低佢，但又覺得要朋友等你唔係咁好意思的話，亦都可以利用 X Performance 的 Quick Launch and Capture 功能。而利用 Quick Launch and Capture 影出黎的風景相，毋須後期編輯，都能夠保留令人滿意的質素。
▲ 對於唔怕佢會走的事物，你中意近啲影又得，遠啲影都得，任君選擇。
▲ 但係如果你平時中意影下一些小動物，又唔能夠太近影，因為太近的話，可能會嚇走佢地 (其實可能係嚇親熊大我
)，呢個時候，中距離拍攝應該係最好的。然而，影小動物，唔排除當你慢慢開得相機，再按快門鍵，隻小動物可能已經感受到你的威脅，已經走左，所以呢個時候，Quick Launch and Capture 就發揮了很強的功效。要注意的是，由於 Quick Launch and Capture 功能是讓你一按即拍，捕捉你的目標主體，本身不具備 Zoom 功能，因此影小動物的話，好多時候都需要後期編輯，將你想要的部份 chop 番出來。從上圖可以見到，雖然已經放大左好多倍，但細節部份、相片的清晰度依然做得很不錯。
▲ 再一幅，大石壓小龜? 按下快門鍵影完之後，再 chop 番主體落黎，其實可以見到，放大之後的成像質素依然不差，睇得好清楚! 呢點真係多得 X Performance 的 2300 萬像素。之後，放上 Facebook 分享俾朋友，呃下 Like 都得!
▲ 睇左邊，係咪唔知我影緊乜呢? 唔緊要，放大左，哦，原來係一隻青蛙，淨係聽到佢「呱呱」聲，今次仲搵你唔到! 原本你係完全睇唔到我影緊啲乜野，但 Zoom 大左之後，細節部份都非常清楚，咁嘅清晰度，仲可以 share 俾身邊朋友添!
▲ 頭先上面三張，都係影緊一啲定左係度唔郁的主體，可能你會覺得，未必能夠突出到 Quick Launch and Capture 的威力。唔緊要，俾張主體郁緊的相俾大家睇下! 其實好簡單，即係咁啱經過，見到有隻艇仔駛過，隨手拎起部 X Performance 撳個掣，就影到左面幅圖出黎。Zoom 番近之後，成架艇上面有幾多人，都睇得好清楚。
▲ 再來一張！從原圖看，或者你看不清有甚麼，其實是有隻鴿子向着我直衝過來，感覺就像快要撞到我身上去! 放大了，可以看清楚那隻鴿子。
小結：識得玩，可以好實用
Sony Xperia X Performance 及 X 新加的 0.6 秒 Quick Launch and Capture 及預測追蹤對焦，係市面上嘅手機係做唔到。但熊大試玩過，實用性好高，拍出來效果也很不錯呢!Sony Xperia X Performace 評測系列
依舊好慳電! Sony Xperia X Performance 電量測試 勝上代 赢對手兩大絕招 K.O. 對手 ! Sony Xperia X 「人無佢有」相機功能
資料由客戶提供
