日本試玩 Sony S835 旗艦新機！XZ Premium 外型 + 屏幕 + 版主上手後感

左定坤 (Cho Ting Kwan) 2017-04-26 01:40 | Sony

講到 2017 年度旗艦處理器，一定是 Qualcomm S835 無誤了！昨夜版主就爆左俾大家知道，首部在香港上市、用上 S835 處理器的三星 S8 / S8+ 上市資訊以及賣價，咁到底同樣用上 S835 U 的 Sony Xperia XZ Premium，又如何呢？預計 6 月中前就會香港開賣，而呢個時候，版主亦獲邀到日本，有機會率先上手試玩呢部 Xperia XZ Premium，就等版主同大家講下呢部新機的設計，並且分享一下個人的試用感。睇下文啦！

XZ Premium（Facebook）.jpg

「鏡黑」Sony XZ Premium 上手！圓潤機身令手感變得更佳！

先由外型手感方面說起，話說版主未上手，第一眼見到 Sony 職員用緊部 Xperia XZ Premium，已經覺得好靚，同以往的 Sony 手機設計相比，還是會有一點點的不同，而呢少少的差別，可以將呢部 Sony 旗艦變得手感更佳。XZ Premium 一共有三種顏色，分別為「鏡黑」、「鏡銀」以及早幾日發表的「鏡粉」，當中尤其是「鏡銀」，更加有當年版主手上 Z5 Premium 的感覺，不過今次 XZ Premium 拎上手，無再好似 Z5 Premium 果陣咁𠝹手，機身邊緣線條變得更加圓潤，無以往 Sony 手機咁方正，令手感相當不錯。而版主今次上手的，是「鏡黑」色的 XZ Premium，材質望落有點像 iPhone 7 的亮黑色，好靚，但老實這種設計缺點，則是比較容易痴手指膜。不過只要勤清潔，笠返個膠套，就應該不是太大問題，加上 XZ Premium 又有 IP68 防水的特質，你又點睇呢？

▲ Sony Xperia XZ Premium 配備了 5.5 吋 4K 屏幕，雖然佢顏色叫做「鏡黑」，不過其實在燈光照射下，會發現係有少少藍。另外，XZ Premium 用上了 Unified Design 的設計，由內至外的設計風格，都是一致的。

▲ 屏幕上方會見到有 1300 萬像素的前置鏡頭，對於鍾意自拍的網友來說，應該是一個不錯的消息。

▲ 而叫得做「鏡黑」，機背係用上鏡面設計，拎起可以當鏡子用，不過當然「鏡銀」的話，效果則會更佳吧！

▲ 機背會見到有 1900 萬像素的鏡頭，融合了 Sony 'α' 以及 Cyber Shot 相機的專業影像技術，形成全新的 Motion Eye 相機系統。另外，XZ Premium 亦支持三重影像處理技術，同 XZs 不同的是，XZs 的三個 sensor 設於鏡頭下方，而 XZ Premium 則設於鏡頭右方。

▲ 右側上方會見到有開關鍵以及音量鍵。

▲ 而右側下方則會見到有快門鍵，你可以自行設定「快速啟動連拍攝」功能，只要長按快門鍵，就能夠在閉屏的情況下，打開相機並直接拍下照片，這個功能相當有用。

▲ 至於機身左側會見到有卡槽位置，不過留意到的是，卡槽的設計有點唔同左，就算係現時最新的 XZs，都不是這種設計。XZ Premium 上的 SIM 卡槽以及 microSD 卡槽，係可以分開拆卸的，其實我覺得，呢種設計先係好，特別是有時在飛機上換 SIM，都唔會手忙腳亂到連 microSD 卡都跌埋，呢個設計，抵讚！

▲ 邊緣部份變得更加圓潤，無再好似 Z5 Premium 果陣咁𠝹手，拎上手手感相當不錯。

▲ 你又覺得，三種顏色當中，邊隻顏色最靚呢？

▲ 睇埋 Model 姐姐的上手圖吧～

屏幕比拼 iPhone 7 Plus！屏幕相對暗，不過細緻度相當不錯！

繼 Z5 Premium 之後，Sony 終於再次在旗艦新機上，加入 4K 解像度 HDR 屏幕。官方表示，XZ Premium 的屏幕融入了 Sony BRAVIA 電視技術，結合 Sony 獨有的 TRILUMINOS Display for mobile 顯示技術、X-Reality for mobile 及動態對比增強器 (Dynamic Contrast Enhancer) 等超卓技術，令亮度、色彩、清晰度和對比度均達到極致的逼真水平。咁到底同 iPhone 7 Plus 相比，又孰優孰劣呢？即刻比較一下啦！