四個賣點，話你知 Sony Xperia XZ Premium 相機點贏對手

左定坤 (Cho Ting Kwan) 2017-04-26 10:16 | Sony

相機，一直都是 Sony 旗艦手機一個重要的賣點，特別是如今去到今代 Xperia XZ Premium，不單止具備了 Xperia XZs 上有的 Super Slow Motion，還加入了全新的 Predictive Capture 功能，令到相機在 Xperia XZ Premium 上，變得更加好玩，而且質素亦比以往的 Sony 手機更加出色。版主就在日本，除左了解 Xperia XZ Premium 相機有乜賣點之外，同時亦都上手這部旗艦新機，測試一下拍攝的表現。即刻睇下文啦！

Sony XZ Premium（Facebook）.jpg

相機賣點 001: 用上高階 DC 影像感測器 + 專業相機級數技術

其實 Sony Xperia XZ Premium 的相機模組同 Xperia XZs 上的基本上是一樣，不過在拍攝上加入左不少好玩的功能，這些稍後再說。Sony Xperia XZ Premium 融合了 Sony 'α' 以及 Cyber-shot 相機的專業影像技術，自創了一套全新的相機系統 Motion Eye，而 Xperia XZ Premium 更是世界首創內置存取記憶體 Exmor RS 感測器的智能手機，官方表示能夠將影像掃描以及數據傳輸速度提升 5 倍之多。呢種 Exmos RS 感測器，一般多在一些高階的 DC 仔上用到，而家連呢啲都放埋落手機上，不知會否有朝一日，Sony 手機能夠完全取代市面上的 DC 仔呢？對於呢點，網友會唔會期待下呢？

▲ Sony XZ Premium 內置常用於高階輕便拍攝的 Exmor RS 感測器，並且支持三重影像感應器。

相機賣點 002: 保留「0.6s 快速啟動連拍攝」功能

事實上，由 Sony Xperia X Performance 開始，就已經加入了 0.6 秒快速啟動連拍攝功能，所以放在 Xperia XZ Premium 來說，並不是一個特別的功能，但版主覺得呢個功能至今還是值得一提，算係幾有用。點解咁講？好似版主咁，好多時候都鍾意「打雀」，不過你知啦，雀仔係唔會咁乖企定定俾你影，有時候等你解鎖，開得相機黎，隻雀仔都隨時會飛走。而呢個「快速啟動連拍攝」功能，則可以大大縮短你開啟相機的時間，並且連隨直接影埋相，如果咁都影唔到，就真係你自己唔好彩了！不過，平心而論，呢個功能都有缺點，就係你無辦法 Zoom，而且需要憑感覺拍攝。好唔好用，真係見仁見智了。

▲ 你可以在設定中的「快速啟動」，選擇「Launch and Capture」。

相機賣點 003: 具備「超慢動作拍攝」功能

親身試玩過 Sony Xperia XZ Premium，版主覺得佢真係一部充滿玩味性的手機，雖然佢並不及華為推出的手機有咁多 Filter / 效果，但淨係一個「960fps 超慢動作影片拍攝」，已經秒殺市面上大部份的手機。一般智能手機都是以每秒 30 格的速率攝錄，而家佢呢個「超慢動作拍攝」功能，能夠以慢 32 倍的速度來進行超慢鏡播放，而且相比 iPhone 7 上的慢動作功能，更好玩，更有彈性，因為利用 Xperia XZ Premium，你可以在一段影片中隨意加入慢動作效果，亦可以隨時回復正常速度，而呢點在 iPhone 7 上，則是做唔到的。

▲ 不過呢，Sony XZ Premium 上的 960fps 超慢動作拍攝有 2 個限制，第一就係要有充足的光源，如果好似片中咁，在餐廳內唔夠光，就可能會出現一點點雜訊; 第二就係主體唔能夠郁得太慢，如果唔係放慢 32 倍後，就會好似無郁過咁。

相機賣點 004: 加入了全新 Predictive Capture 預測拍攝功能

不單止是超強勁的 Slow Motion，今次 Xperia XZ Premium 亦加入了 Predictive Capture 的功能，呢個功能在之前的 Sony 手機入面，不曾出現過的。佢嘅原理係，當你拍攝的時候，手機 detect 到主體正在移動，就會在你按快門之前自動開始緩衝影像，拍攝 4 張相片，令你可以避免錯過任何重要的時刻。呢個功能都係幾有用的，不過版主試過，有時候就算拍攝靜態影像，如果你手唔定的話，都會隨時「chok」到個 Predictive Capture 功能出黎 (這個功能預設是 Auto 的)。