今日發表的 Sony Xperia XA2 以及 XA2 Ultra，兩部手機雖然個 specs 並不相差太遠，但我認為真係各有所長。論手感，版主比較鍾意 Xperia XA2，可能因為自己手細，5.2 吋的 Xperia XA2 相對會比較易駕馭一點；相反，Xperia XA2 Ultra 有 6 吋大芒，而且唔係 18:9 芒，而係 16:9 的「真大芒」，無錯視覺享受會較細芒機出色，但手感方面真係完敗俾 Xperia XA2。不過，對於版主來說，Xperia XA2 Ultra 有一個好的地方，係 Xperia XA2 做唔到的，而亦因為呢個原因，我會選擇換佢做後備機。到底最吸引的地方在哪呢？賣下關子先，之後再講。
▲ 先睇下 Sony Xperia XA2 Ultra。叫得「Ultra」，大芒一向是 XA Ultra 系列的賣點。XA2 Ultra 用上 6 吋屏幕，唔係時下流行的 18:9 芒，而係以前 16:9 的「真大芒」，解像度為 1080p。鍾意大芒的網友，喜歡嗎?
▲ Sony 的字樣設於屏幕的上方，值得留意的是，今代的 Xperia XA2 Ultra，擁有雙前置相機，玩的不是人像模式，將背景 blur 哂來突出人像，而是好似 LG 咁，玩廣角拍攝，似乎玩味性會更高，而且更實用。
▲ 同埋都要留意番啦，雖然設計上沒有甚麼特別，同以前差不多，但上下巴部份似乎相比以前更為收窄。
▲ 機背用上金屬材質，配合鋁合金邊框設計，令整體感覺更有金屬感。
▲ 繼 Xperia XA1 Plus 之後，Sony 再次在其中階機系列中，加入指紋辨識功能。值得一提的是，Xperia XA2 Ultra 的指紋辨識鍵，並不如以往 Sony 手機般設於機身右側，而是放回到機背位置。而指紋辨識鍵的上方，則是 2300 萬像素的主鏡頭，鏡頭被銀色金屬圍住，更添型格感覺。
▲ 手機右側上方是音量鍵以及圓點形的開關鍵。
▲ 同以往的 Sony 手機一樣，右側下方都會有實體的快門鍵。
▲ 機底有 USB Type-C 插槽以及喇叭。
▲ 機底則是有 3.5mm 耳機孔。
▲ XA2 Ultra 一共有四種顏色，分別為銀色、黑色、金色以及紫藍色。
▲ 6 吋大芒睇片打機視覺體驗係好呀，但對我來說太大部了。論手感，5.2 吋的 Xperia XA2 好揸手一點。
▲ Sony Xperia XA2 以及 Xperia XA2 Ultra 尺寸比較。另外可以見到，兩機外型設計幾乎是完全一樣，只是 XA2 Ultra 前置相機多了雙鏡頭設計。
用 S630 Ｕ，Sony Xperia XA2 Ultra 有 4GB RAM，效能分數立即睇！
其中一個驚喜是，Sony Xperia XA2 Ultra 終於放棄不用 MTK 處理器，而是改用 Qualcomm S630 處理器，成日把口鬧 MTK U 呢樣唔好果樣唔好的網友，今次應該無聲出了吧？另外，兩部手機的記憶體以及儲存容量都不同，5.2 吋芒的 Xperia XA2，內置 3GB RAM 以及 32GB ROM，而 6 吋芒的 Xperia XA2 Ultra 則內置 4GB RAM 以及 64GB ROM，兩部手機都能夠插 microSD 卡，並運行 Android 8.0。不過，記憶體同儲存容量，都不會明顯地影響到手機的跑分，所以版主就淨係用 Xperia XA2 Ultra 來做個安兔兔跑分，睇下結果如何。
▲ 根據安兔兔跑分結果顯示，配備 S630 處理器、4GB RAM 以及 64GB ROM 的 Xperia XA2 Ultra，跑出分數為 72329 分，算是意料之內的分數，而 3D 成績也不過是 18453 分，用來玩要求好高嘅 Game，就玩唔到了。畢竟 S630 只是 S626 處理器的升級版，本身 GPU 能力並不是太好。
23MP 主相機，最高支援 ISO 12800！XA2 Ultra 仲有雙鏡頭 + OIS 防震！
最吸引到版主的，應該是 Sony Xperia XA2 Ultra 的自拍相機。今代的 Xperia XA2 Ultra 採用了 1600 萬 + 800 萬像素雙前置鏡頭設計，而雙鏡頭的作用，並不如普遍手機般做到「人像模式」，在拍攝時將背景虛化，而是作廣角的用途，能夠支持 120 度的超廣角拍攝。而且 XA2 Ultra 的前置相機，更支持 OIS 光學防手震功能，配合前置閃光燈以及特設的夜景肖像模式，在昏暗環境下自拍，XA2 Ultra 會有不少的優勢。不過，Sony Xperia XA2 Ultra 的主鏡頭都不算太差，配備 2300 萬像素主鏡頭以及 1/2.3" Exmor RS 影像感測器，並且可以支持最高 ISO 12800 感光度，好處係在低光環境下都能夠影到清晰的影像。
主相機試拍
▲ Sony Xperia XA2 Ultra 主相機預設為 20MP 16:9 的相片。
▲ 版主後來都係決定將相機 set 番去 2300 萬像素 (4:3)，但大家可以睇到當拍攝最高像素照片時，成像表現會如何。右圖是在背光的情況下拍攝的，如果 auto focus 的話，會好暗唔係太睇得清楚個路牌，但如果用手指點一點個路牌，又會覺得好似好光咁，不是太自然，你覺得呢？
▲ 以往 Sony 手機影出來的成像，會有好明顯的油畫化情況，但現在 Sony 手機的油畫化情況已經大大改善左。
▲ 題外話，版主成日出旺角工作，都唔知附近有這樣一個塗鴉牆。放大來看，可以見到細緻度相當高，牆上的紋理都能夠清楚可見。
前置相機試拍
▲ 左圖為普通模式，而右圖則為超廣角模式。版主覺得呢個功能相當有用，特別是當一大班朋友出去玩的時候，可以自拍的手機唔再來來去去都是 LG 了！另外，如果風景比較靚的話，超廣角模式亦都可以在自拍的同時，連背景都影埋，令整張照片可以有多點襯托。
▲ 發佈會會場的 Model 姐姐，自拍係用直向的，不過版主就覺得，如果影超廣角照片的話，其實橫向拍攝會效果會更不錯！
小結
雖然 Sony Xperia XA2 Ultra，用 S630 U 跑分並不高，但如果論性價比來說，$3498 呢個價錢，確實有相當的吸引力。而且別忘記，按照慣例應該都會有一出即減，保守估計第一減應該會即減 $300，之後第二減會即減 $500 (以上估架咋，大舖都未有消息
印象中果陣 XA1 Ultra 好似都係咁)。 如果係咁，三千蚊左右買呢部真大芒 Xperia XA2 Ultra，而且仲可以玩到 OIS + 廣角前置鏡頭，個人覺得相比三星 Galaxy A8+、HTC U11 EYEs 更有吸引力，起碼配置同價錢算是成正比例！至於 5.2 吋的 Xperia XA2，賣 $2698 同樣並不昂貴，而且手感亦相當好，但因為沒有支持廣角的雙前置相機設計，版主還是會傾向用 Xperia XA2 Ultra 多些。三星、HTC、Sony 推出的中階手機，不知網友又會傾向邊部多些呢？留言討論下啦！
Sony Xperia XA2 在文章發表時，預計將於 2 月 9 日上市，建議零售價為 $2698，按這裡有詳細規格及最新賣價。
Sony Xperia XA2 Ultra 在文章發表時，預計將於 2 月 9 日上市，建議零售價為 $3498，按這裡有詳細規格及最新賣價。
