對決華為、 Moto ！ Lenovo P1 做到最高性價比「核電」強機嗎？
今次 Lenovo 發佈的 P1 ，係規格上有 5.5 吋 FHD 大芒，香港推出的版本可以見到，處理器上 P1 用上了 Qualcomm S615 處理器搭 2GB RAM 以及 16GB 內置容量，而相機部份就係 1300 萬像素主鏡頭配 500 萬像素前鏡。表面上只係一部平平無奇的中階機，但其實 P1 真正的賣點就係其 5000mAh 電量，而且支援雙向快速充電技術，可以為其他裝置充電，完全係一部「為大電而生」的手機。唯一可惜的是，呢部 Lenovo P1 並不支援中港 4G，TD-LTE 的頻段方面只有 Band 40 (2300 MHz)。 有關 P1 的詳細表現，大家可以睇下版主 Keith 的開箱試玩！ Lenovo P1 係價錢方面，定價為 $2499 ，將係 11 月 18 日開賣。係呢個價位下，呢部 5000 mAh 大電機主要的對手有 Mate 7 同埋暫未係香港推出的 Moto X Play 。從規格看來， Lenovo P1 賣點明顯就係在不太差的規格下 sell 其大電量，咁對比一現時香港一眾大電強機，到底 P1 又有沒有優勢呢？如果純以電量來看的話，能夠同 P1 勉強有得比較的就只有華為上年推出的旗艦 Mate 7 。係規格上 Mate 7 的屏幕比起 P1 更大，有成 6 吋，在處理器上用左以省電為賣點的 Krin 925 ，更重要係有 4100mAh 電量。另外要留意係 Mate 7 標準版可能係 P1 最大的對手，因為近日衛訊做緊 Mate 7 清貨，價錢只係 $2950 ，同樣具有競爭力。
▲Mate 7 標準版近日係衛訊有減價，不過推出左都有一段日子了。
除左 Mate 7 之外，同樣以大電為主打的仲有之前版主都分享過開箱的 Moto X Play ，跟 P1 同樣係 5.5 吋 FHD 芒同時有 3630 mAh 電量，可惜在港開賣日期而家都未有消息。除左以上兩部電池容量較大的大芒機外，可以留意續航力較為出色的手機仲有 CMHK 近排推出，定價只係 $888 定 and! A1 ，雖然規格相當一般但係其待機時間竟長達 150 小時！再附上呢幾部機的詳細規格比拼，大家可以參考下。
▲ Moto X Play 以大電為賣點，可惜係香港唔知幾時出⋯⋯
仲有便宜點的樂檬 Note 及樂檬 2
最後，係今次發佈會中，Lenovo 同時仲推出左樂檬 Note 以及樂檬 2。在外型上樂檬 Note 的機身尺吋為 152.6 x 76.2 x 7.99 mm，重量為 140g，同 P1 一樣採用了 5.5 吋 IPS 屏幕。配罝方面，樂檬 Note 配備了 64 bit MediaTek MT6752 1.7GHz 八核心處理器，內置了 2GB RAM 以及 16GB ROM，並可支持最高 128 GB 的 microSD 卡。另外，樂檬 Note 配備了 1300 萬像素主鏡頭以及 500 萬像素前置鏡頭。電量方面，咁樂檬 Note 主打嘅唔係 「大電池」，所以電量都相差低啲，只有 2900 mAh，不過好就好在係使用可替換式的電池。樂檬 Note 亦會支援 64 位元 Lollipop 系統，並同樣於 11 月 18 日正式香港上市，建議零售價為港幣 HK $1399。
至於樂檬 2，佢係一部主打「高性價比」的千元手機，將於 11 月 18 日上市，建議零售價只需 HK $1199，就可以享有 Qualcomm Snapdragon 410 四核心處理器、2GB RAM 以及 16GB ROM。而呢部樂檬 2 同樣配備 1300 萬像素主鏡頭以及 500 萬像素的前置鏡頭，更支援 4G 功能。不過呢部樂檬 2 只有 5 吋屏幕，相信唔少人應該會對呢部機興趣不大吧?
▲ 左邊是樂檬 Note，右邊是樂檬 2。
在文章刊登時，Lenovo Vibe P1 香港建議零售價為 HK $2499，按這裡有詳細規格及最新賣價。
