▲ Lenovo P1 行貨與水貨都登陸香港了!
中等規格，電池最勁
Lenovo P1 可以話好吸引，亦可以話唔吸引，因為它只係用左 Qualcomm S615 處理器再加 2GB RAM (行貨) 或 3GB RAM (水貨全網通) ，而內置也有 32GB ROM，配合 5.5 吋 Full HD 芒，效能只能說中上，唔能夠話係最 Top，而賣價大約二千中左右，其實已買到其他大陸品牌更好嘅規格。Lenovo P1 亦有一個千三萬像素相機，支援相位對焦係佢賣點，不過就沒有光學防震。P1 最吸引，當然係 5000mHA 電池，不能更換，並支援極速充電。亦因為咁，手機算比較重 (130g) 同厚 (8.4mm)，的確，電與輕薄之間，係唔能共存。之前講過 Lenovo Vibe P1 為慳電而生，因為呢部機有幾樣方式，令手機更加慳電。首先，佢從屏幕著手。開著手機，預設光度好暗，係呢個模式，基本上你無可能係太陽底下使用。佢亦有一個光亮模式，亮度好少少咁啦，不過，我地同 iPhone 6S Plus 比較過，調至最光，都係差好遠。可能亦因為咁，個芒顏色都唔算靚。另外，手機左則有專用掣，其他手機用來靜音，P1 這個 OneKey 一鍵省電是進入超級省電模式，即係手機只有最簡單嘅通話功能，小心按錯，連 WhatsApp 都用唔到。
▲ 5.5 吋屏幕 P1，數字上不算好重，但上手都好大份。正面睇，居然有點似三星 Note 2。右圖 (手機版嘅下圖)，手機左側有一粒鍵，唔係用來靜音，一按進入超級省電 Mode。
▲ Lenovo P1 設計，機背勁似 HTC One M7。不過，上手嘅感覺就唔似啦。Lenovo P1 混合了金屬與塑膠質地，我只可以肯定機邊是用了金屬邊框，機背都是金屬材質。
▲ 機面嘅長方按鍵，跟 Samsung 一樣是 Home 鍵，亦係指紋感應器。機頂有 3.5mm 耳筒鍵。
▲ 機底有兩組揚聲器。機右則是音量及開關鍵。
支援快速充電
當然，Lenovo P1 支援快充亦係賣點。P1 用 Qualcomm S615 CPU，但佢唔係用 Qualcomm 嘅快充 Ｑuick Charge 2.0 標準，好處係比 QC2.0 充得更快。透過跟機送嘅 24W 充電器 (QC2.0 係 15W)，可做到 1 小時充滿 68% 電量，兩小時充滿 5000mHA 電池。你問我快唔快？兩小時充滿一部手機唔可以叫快，但佢 5000mAH 電池喎，充一半都等於其他手機總電量! 咁樣想，就堅快呀! 不過，佢地呢套 Turbo Charge 要用專用充電器比起 QC2.0 有不同廠嘅出品及可使用一般 USB 線，方便性就差左 D。
▲ 相比 QC2.0 充電器，Lenovo 嘅 Rocket Charger 本身已係 2A 輸出，再不同 Volt 數，所以充一般手機與平板也可以的。跟機送了 OTG 插項，除了方便過數據資料，亦可以把手機變為充電器，為其他手機充電。
▲ 要換 SIM 卡，就要打開機蓋了。
▲ 用 Lenovo P1 預設模式，調至最光，跟 iPhone 6s Plus 調至最光，可見 P1 好暗。
▲左為預設模式嘅側視角度，右為超亮模式嘅側視角度，都唔係光好多。
▲ 屏幕模式，同省電模式，都會令 Lenovo P1 更省電。
▲ 來過跑分測試，Lenovo P1 跑出 AnTuTu 36876 嘅跑分，而 Vellamo 嘅分數，都係 S615 CPU 手機應有嘅水準，即係唔算好高效能，又未算好慢。
▲ Basemark ES2.0 係代表手機跑 3D 遊戲效能，35.87fps 分數，只係中上成績 (最高分為 60fps)。
▲ Lenovo P1 有千三萬像素相機，雖然無提及用邊間廠鏡頭，但係我地試過，拍出來效果相當唔錯。我地睇睇睇介面先。功能砳算多，只有全景與特效選擇，相比之前 Vibe Shot 唔算多野玩。
▲ 以上用 Lenovo P1 影嘅日、夜試相，版主覺得效果相當不錯，唔知大家點睇?
小結：電池是賣點
版主試嘅時間唔算長，未能試到 Lenovo P1 係咪堅慳電。但有時睇規格都一定知，5000mAH 電池，可以比起部份手機多一倍電量，若果一部 2500mAH 電池手機日常使用用到 10 小時，呢部就 20 小時了，何況官話用到 80 小時呢？大電，都需要快充，但因為電池太大，兩小時充爆，感覺比起 Samsung Galaxy Note 5 唔會快好多。但版主覺得個芒有點暗與怪色水，可能是呢部機最大嘅缺點。Lenovo P1 香港行貨價，係文章刊登時，賣價為 $2499，按這裡有更詳細規格與最新賣價。
* 鳴謝國恆電訊借出 Lenovo P1 全網通國內版本作測試，賣價為 $2398，3GB RAM 版本。
