開箱！聯想 K8 Note 有金屬機身 + 真三卡設計，手感出乎意料的好
外型上，Lenovo K8 Note 機身採用了金屬材質，具備 5.5 吋 FHD 屏幕，屏幕下方見到有「三天皇」虛擬鍵，分別為返回鍵、主頁鍵以及多工鍵；而機背則可以見到有指紋辨識器，主相機採用了雙鏡頭設計。在整體設計方面，K8 Note 並沒有跟隨現今潮流，用上 18:9 全面屏，而是用返以往的 16:9 芒，對於這點，是好是壞，則見仁見智。不過講開又講，雖然係用 16:9 芒，但 K8 Note 手感卻相當好，對於手細的版主來說，size 可謂剛剛好。
▲ 呢個係 Lenovo K8 Note 的包裝盒。
▲ 包裝盒背面有寫上關於 K8 Note 的特點，例如有 5.5 吋 FHD 屏幕、雙鏡頭、十核心處理器、Dolby Atmos 音效等等。另外，可以留意到 K8 Note 係有黑色同金色兩種顏色，而版主就選擇了黑色。
▲ 開箱！第一眼見到就係 K8 Note 的真身。
▲ 隨機附有 SIM 卡針、火牛以及 USB 線。
▲ 火牛最高支持 15W 輸出。
▲ K8 Note 採用了 5.5 吋 FHD 屏幕，屏幕下方會見到有三天皇虛擬鍵，分別為返回鍵、主頁鍵以及多工鍵。
▲ 屏幕上方則有 1300 萬像素前置鏡頭，並且具有自拍閃光燈。
▲ 而機背除了可以見到用上金屬材質，同時亦見到直向的雙鏡頭、閃光燈以及指紋辨識鍵。
▲ 機背下方會有 Lenovo Logo。
▲ 值得一讚的是，市面上咁多手機都係用緊三選二孤寒式插槽，但 Lenovo K8 Note 係有「真三卡」，即係可以在用雙卡的同時，亦可以加入 microSD 擴充。
▲ 手機左側會有個音樂鍵，只要一按就會彈出這個提示，話俾大家知，長按就可以播放 / 暫停，按兩下可以下一曲，按三下可以回到上一曲。
▲ 而手機右側則有音量鍵以及開關鍵，開關鍵具有紋理設計，讓用家更容易摸到。
▲ 機頂會有 3.5mm 耳機孔。
▲ 機底會有支持 Dolby Atmos 音效的喇叭，並且有 microUSB 插槽。
▲ 雖然唔係 16:9 芒，但 5.5 吋對於手細的版主來說，手感出奇意料地好。同埋可以留意到，K8 Note 開始 Lenovo 會改用原生 Android，呢個價錢玩到原生系統體驗，你會唔會考慮？
用 MTK Helio X23 新 U，安兔兔跑分比想像中好
Lenovo K8 Note 配備了 MTK Helio X23 十核心處理器，似乎佢係現時香港首部用呢粒 U 的手機，並內置 4GB RAM 以及 64GB ROM。到底呢粒 Helio X23 係乜料子呢？根據安兔兔跑分的成績，分數為 89192，接近 9 萬分的成績。唔好忘記喎，呢部手機只不過係二千蚊有找，但似乎相比 Qualcomm S652 級數處理器的成績還要好。當中 UX 效能成績有 41953，算是相當不錯的表現，但 3D 方面始終擺脫不了 GPU 差的缺點，只有 18780。
小結
新機才剛上手，版主就急不及待先同大家做個開箱，同埋講下版主對呢部手機的第一印象。老實說，Lenovo K8 Note 給版主的感覺是，性價比非常高，幾乎可以說應有的，佢都有，就好像 4GB + 64GB、真三卡、雙鏡頭、Dolby Atmos 音效等等。只可惜，K8 Note 係用 MTK U，就未必個個都會接受，最重要的是，有些網友可能會介意沒有 NFC，呢個係一個遺憾。但想深一層，部機二千蚊都唔使，仲想點呢？而且跑分仲要媲美中階手機，似乎好似贏哂小米喎。不過，實際使用好與唔好，又是另一回事，就等版主詳細使用一下這部手機，稍後再跟大家分享一下。號外！Lenovo K8 Note 將於 2018 年 1 月 18 日正式開賣，建議零售價為 $1999，入門機的價錢，有中階機的享受，性價比應該屬相當高吧？你點睇呢？
Lenovo K8 Note 在文章發表時，將於 18/1 開賣，建議零售價為 $1999，按這裡有詳細規格及最新賣價。
