魅族 m5 Note 開箱 + 上手後感！跟機火牛支持最高 18W 輸出
剛才在會場上，版主就好快咁影左相，做個安兔兔測試，等大家先看看魅族 m5 Note 係點嘅樣。由於時間比較急的關係，未能仔細感受一下 m5 Note 的手感，而家有機在手，終於可以慢慢感受一下。m5 Note 外型同上代 m3 Note 唔相差幾遠，都係啲擺位上嘅差別 (例如 3.5mm 耳機孔變左在機底)，同樣用上全金屬機身，但係機身側邊部份會有切邊位，拎上手相比舊代無咁滑手。m5 Note 機身雖然比上代係薄了一點，但當左右手同時拎住 m5 Note 以及 m3 Note，會明顯感覺到，m5 Note 會相對墜手一點。不過平心而論，m5 Note 的造工，相比舊代確實有很大的進步。
▲ 開箱！魅族 m5 Note 個盒同上代近乎一樣，只係純粹將「m3」變成「m5」。
▲ 盒底會有基本的規格資料，版主手頭上呢部 m5 Note 係 3GB RAM + 16GB ROM 的低配版本。
▲ 打開個盒，第一眼就會見到有部 m5 Note，而版主拿到的是銀色版本。
▲ 版主拎哂所有嘢出黎，會見到配件方面會有 SIM 卡針、插頭以及 USB 線。
▲ 在發佈會上，魅族表示 m5 Note 支持 18W 的 mCharge 快速充電，不過跟機的火牛，依然跟 Pro 6 Plus 的一樣，最高輸出可達 24W (即 12V / 2A)。
▲ 頭先未看得清楚嘅，而家可以再睇真啲部機的外型。有 5.5 吋 2.5D 屏幕。
▲ 屏幕上方會有 500 萬像素的前置鏡頭 + 感應器，不過感應器部份變成長條形，變左唔係好似 m3 Note 咁，用上「對稱式設計」。
▲ 下方會有 mTouch 按鍵，並支持指紋辨識功能。
▲ 有些人會覺得，mTouch 按鍵唔好用，如果以初用者來說，也許真的會有點不習慣。如果你要送俾長輩做「孝子機」的話，就可能需要一點時間去教，同時佢亦需要用一段時間去習慣。但版主早前好喜歡用 MX6，就習慣了這個相對特別的 mTouch 按鍵: 輕觸就會「返回上一頁」，而按下去就會出番去主頁。
▲ 機背都係同以往一樣，用上了全金屬機身。
▲ 具有 1300 萬像素主鏡頭，下方的閃光燈亦改為圓形。
▲ 右側會有開關鍵以及音量鍵，值得一提的是，m3 Note 機側都係圓滑設計，導致拎上手感覺有點滑手，而今次 m5 Note，可以見到多左啲切邊，拎上手手感相對會更佳，而且無咁滑手。
▲ 至於左側會有雙 SIM 卡槽，同樣用上了「三選二」的弧寒式設計，但就只支援 4G + 2G，最高支持 128GB microSD 卡。
▲ 魅族上代的 m3 Note，曾經有網友同版主講過，3.5mm 耳機孔放在手機的頂部，是一個難以理解的設計，因為變相落雨時會好易入水。諗諗下又好似幾有道理，而睇番今代 m5 Note，終於將 3.5mm 耳機孔，變番在手機底部。m5 Note 沿用上代的 microUSB 插槽，並支持 mCharge 快速充電。
▲ 拎上手手感真係不錯，至少造工上比上代有很大的進步，就算買部長輩做「孝子機」，都是一個唔錯的選擇。
跑分軟件試 m5 Note 上網、文書處理表現
剛才在發佈會現場，版主就拿拿聲做左個安兔兔跑分，俾大家先大概對呢部 m5 Note 有個概念。可以見到，m5 Note 在跑分上，相比上代確係有所提升，不過因為用上 MTK Helio P10 處理器，GPU 比較差的關係，在 3D 方面的分數，似乎並不理想。當然，這也是意料之內的事，但如果唔講打機，淨係睇在上網、睇片、處理文檔等方面的表現，又會如何呢？版主就用了 PCMark for Android 中的「工作 2.0」，看看 m5 Note 的表現如何。整體得分總分為 3134，這個分數大約是 HTC One M8 的成績吧！
▲ 整體效能分數為 3134 分，大約是 HTC M8 的分數，而留意細分，可以見到 m5 Note 在「圖片編輯」分數是最高，即代表在打開、編輯、和保存一系列 4MP JPEG 圖像時，所需的時間應該算挺快。
少左個喇叭位？播歌表現會唔會細聲左或者差左？
唔知大家有沒有留意到，雖然 m5 Note 將 3.5mm 耳機孔搬到了機身底部，但相比 m3 Note，m3 Note 底部係有兩個喇叭位，而 m5 Note 卻少了一個喇叭位，得番一個。到底播歌表現會唔會差左呢？當然，魅族出 m3 Note 的時候，都無提過佢有乜嘢雙喇叭之類的物體，但版主就真係好好奇，想找出這個答案。於是乎，版主就用 m3 Note 以及 m5 Note，在 YouTube 上找了同一首歌曲，音量開到最大，比較一下兩部機聲音出來的感覺如何。結果是，雖然 m5 Note 喇叭位只有一個，不過出來聲音的推力，跟 m3 Note 可謂是不相伯仲。
▲ 相比 m3 Note，m5 Note 在播放歌曲方面，跟上代不相伯仲，聲音同樣清晰、乾淨，不過版主個人稍嫌，即使開到最大聲，亦不算十分響亮。
屏幕可視角度、色差鬥 m3 Note
其實版主好似都一段時間無寫過手機的屏幕，點解忽然興起想寫呢？無他，因為版主突然留意到，咦，原來將 m5 Note 以及 m3 Note 屏幕亮度同時調到最光的時候，兩部機出來的顏色，原來係有所不同！以下版主會從屏幕的色準、細緻度、可視角度來作個簡單的比較，文字上真係一言難盡，就直接睇下下面圖片，等大家一齊比較一下啦！
▲ 左圖為 m5 Note，右圖為 m3 Note。首先同時開啟白色的頁面，並將亮度調至最光，會見到 m5 Note 屏幕似乎有點偏紅，反而 m3 Note 的屏幕顏色相對準一點。
▲ 揀左張美女圖出黎做比較，明顯會見到 m5 Note 的偏紅情況。
▲ 同時放到最大，觀看髮絲部份的細緻度，則會發現 m5 Note 相比 m3 Note 清晰一點，比較有層次感。
▲ 在可視角度方面，即使在側面看去的情況下，兩部手機都能夠清楚地顯示屏幕上的圖片。
千元手機影相咩貨仔？魅族 m5 Note 試相
魅族 m5 Note 跟上代一樣，都是配備了 1300 萬像素的主鏡頭，到底呢粒 1300 萬像素鏡頭，影出來的相片質素又如何呢？千元手機有咁嘅質素，你又收唔收貨？
▲ 當然，質素好難真係同市面嘅旗艦手機去比較，畢竟佢只係一部千元的入門手機，雖然只有 F2.2 光圈，在昏暗的環境下，放大來看會有少量雜訊，而且像「吸煙區」那幅圖般，景深效果並不太理想。然而，諗番佢個價錢，其實都可以收貨吧？網友點睇呢？
魅族 m5 Note 發佈 + 評測相關文章
魅族 m5 Note 發佈! 平價多彩 ! 不能不買的後備 + 孝子機?
大電量入門機！紅米 Note 3 vs Zenfone 3 Max vs M5 Note
抵玩千元「孝子機」！魅族 m5 Note 開箱 多角度評測試屏幕、相機、喇叭
魅族 m5 Note 在文章發表時，香港上市日期未定，按這裡有詳細規格及最新賣價。
