魅族手機久久沒有在香港推出，原本以為魅族已經開始要放棄香港市場，如果是真的話，其實是挺可惜的，雖然魅族好似無乜可能超越到小米，不過網友可以有多一個選擇，其實並不是一件壞事。所以，魅族今日同我講香港嚟梗會有新機出，版主都放心了不少。
呢部新機，某程度上都唔可以稱之為「新」，因為呢部手機在 8 月已經在大陸發表了，但無請香港媒體去，即係人哋大陸媒體已經玩過哂部真機，而我哋就只能隔住個芒 J。所以幾個月後的今日，香港即將開賣，先至有機借俾我哋，其實本身版主就興趣不大。不過，見過香港會推出的藍色之後，又覺得「咦幾靚喎」，開始又好似有返少少興趣，就決定同大家分享一下。
魅族 M6 Note 開箱，藍色好靚仔！？
▲ 包裝盒除左 PRO 系列，基本上代代都係咁嘅樣，都無謂再介紹。
▲ 包裝盒入面除左有 M6 Note，仲有 SIM 卡針、支持 mCharge 快充的充電器，以及一條 USB 線。
▲ 火牛最高輸出有 24W。
▲ M6 Note 具有 5.5 吋 1080p 屏幕。
▲ 前置鏡頭少有地有 1600 萬像素，有 F2.0 光圈，並支持 Arcsoft 美顏算法以及 Face AE 自動人臉識別亮度增強。
▲ 值得一提的是，今代的 M6 Note 的 mBack 預設是關上的，但你可以到設定 --> 協助工具，關閉「顯示導航欄」，咁就可以用返 mBack。
▲ 香港只有賣一種顏色：藍色，配合金屬機身，給版主第一印象是挺不錯的，至少呢隻色拎到出街並不常見。
▲ M6 Note 亦都具有雙鏡頭設計，一個鏡頭有 1200 萬像素 F1.9 光圈，支持 Dual PD 雙像素對焦、人像背景虛化、雙 ISP 影像信號處理器、4 粒 LED 閃光燈，而另一個鏡頭則有 500 萬像素 F2.0 光圈，支持自動對焦。
▲ 機的左側會有 SIM 卡插槽，支持雙卡雙待。
▲ 而機的右側則有開關鍵以及音量鍵。
▲ 機底會見到有喇叭、microUSB 插槽以及 3.5mm 耳機孔。
▲ 雖然機背隻藍色係靚嘅，不過版主覺得機身有點偏厚，厚度為 8.35mm。
用 Qualcomm S625！香港推 4GB / 64GB，效能跑分立即看
配備部份，魅族 M6 Note 今次終於唔使再用 MTK U，同 Qualcomm 和好後，有得用返 Qualcomm U。雖然唔係 S835 呢啲旗艦 U，不過千幾蚊有 S625 省電處理器，配合 4000mAh 大電，唔打機正正常常用一日，好少會話唔夠用。另外，香港推出版本會係 4GB RAM 以及 64GB ROM，不過版主手上呢部 M6 Note，只有 3GB RAM / 32GB ROM，但唔緊要，效能分數並不會因為手機的 RAM 及 ROM，會有好多的差別。
▲ 安兔兔跑分為 60799，以 S625 處理器來說，並不算低，不過熟悉呢粒 U 的網友都知道，S625 並不是一粒適合打機的處理器，所以會發現在 3D 分數並不高，但優點是夠省電。
小結
魅族 M6 Note 將會在 22/ 12 正式在香港推出，凡於 2018 年 1 月 31 日前購買，可免費獲贈高清保護貼、手機保護套，以及免費登記享六個月「屏幕意外損壞半價更換」一次。至於建議零售價方面，暫定是 $1769，最終賣價或會有少許差別，但不會相差很遠。講返版主對呢部 M6 Note 的第一感覺，其實一部千幾蚊的手機，你仲想要求佢識飛咩？呢個價錢有四千大電，又有 S625 慳電 U，我個人就收貨了。加上香港推出的藍色版本又確係幾靚，網友又會唔會考慮入手返部呢？留言討論下啦！魅族 M6 Note 在文章發表時，香港上市日期未定，建議零售價暫定 $1769，按這裡有詳細規格及最新賣價。