支援自動切換 4G ！聯通版要小心 D
紅米 2 雖然早係 1 月 9 號已經係大陸開售，但香港版行貨正式發售日期就仍然未有。不過同以往一樣我地當然會有水貨率先玩到，今次到港的紅米 2 就係聯通雙卡 4G 版。換句話講，係頻段上呢部紅米 2 所支援 4G 頻段只有FDD-LTE 1800，2100 同埋大陸 TDD-LTE 頻段 B41（2600 Unicom)。係香港會用唔到 FDD-LTE 2600 頻段以及 中移動大陸頻段 B38 （2600 CMCC)、B39 （1900)、B40 （2300) ，即係用唔到 CMHK 的中港 4G 漫遊。如果大家想入手支援中國移動雙卡 4G 版本，即支援大陸 TD-LTE 頻段同埋香 FDD-LTE 1800 以及 2600 頻段呢個版本將會稍後先抵港，賣價會比聯通雙卡 4G 版貴少少。聯通 4G LTE 雙卡版本為 : HK$1150，稍後推出的中國移動 4G 4G LTE 雙卡版，暫定 HK$1180 。係規格方面，紅米 2 就用上 4.7 吋 720 x 1280 解像度屏幕、 Qualcomm S410 1.2GHz 搭配 1GB RAM 以及內置 8GB 容量（可以插 MicroSD 卡，最大 32GB ）。相機方面就係 800 萬像素主鏡頭同埋 200 萬像素前鏡頭，係電池容量方面就用上 2200mAh 可換式電池。
▲ 紅米 2 包裝同以往小米手機一樣頗為簡單，跟機只有充電器同 USB 線。
▲ 紅米 2 所用的電池容量為 2200mAh 。
▲ 機背有一點值得大家留意，以往小米手機好多都用上左鋼琴面烤漆，今次紅米 2 就用左磨砂質地，終於可以告別手指模啦。
▲ 作為雙卡雙待雙 4G 手機，紅米 2 用 Micro Sim 卡。另外，版主試用時亦能夠順利以 csl. 網絡接收 4G 訊號。
▲ 以聯通 4G 雙卡版來講，兩個 SIM 卡槽都可以放置 4G 上網卡，而且同 HTC 雙卡 4G 手機一樣，紅米 2 聯通 4G 雙卡版都有自動切換 4G 功能。版主試用過，當紅米 2 改用 Sim 卡 2 連接 4G 訊號係需要一段時間的（最少 1 分鐘左右）SIM 2 就會會用到 2G GSM。但要留意，大陸紅米 2 係有 3 個版本，只有移動雙卡 4G 版 同埋聯通 4G 雙卡版做到雙 4G 功能，而且各款紅米 2 支援頻段亦都唔同，想買水貨機的朋友入手前就要睇清楚！
機身大小適中手感令人滿意
以外型大小同埋重量來講，紅米 2 只係重 133g ，拎上手當然唔會覺得墜手，版主仲覺得稍嫌有點太輕，但配合埋機身大小來講相信會幾岩女士。係機身大小方面，可能因為版主唔太習慣大屏幕手機，版主反而覺得只有 4.7 吋芒的紅米 2 手感岩岩好，即使手機厚度係 9.4mm 並唔算薄，但拎上手感覺上手機唔太大又唔會太細。不過能否完全做到單手操作呢？就好視乎用家隻手的大小啦，版主勉強做到。總括來講紅米 2 係手感上係做得尚算唔錯，應該可以令大家滿意。
▲ 按鍵分佈同紅米 1S 一樣，音量鍵同鎖機鍵位於手機右邊，Micro USB 係機底位置。
▲ 拎上手感覺大小適中，配上磨砂質地的機背整體手感算係唔錯。
▲ 係屏幕方面，雖然紅米 2 只係得 720p 解像度，但其實使用上感覺唔差，清晰度同細緻度都足夠，問題反而在於屏幕亮度同可視角度都稍為不足。雖然只係用 HD 720p 解像度，但紅米 2 的 IPS 屏幕仍算清晰同埋細緻，反而可視角度唔算好，側邊睇亮度會頗為不足。
▲ 一向既往，紅米 2 亦用上熱感式按鍵，同樣係 Menu 、 Hone 、 Back 配合。
另外，因為今次到港的紅米 2 係水貨，所以並無原生 Google 服務，由於紅米 2 只係岩岩到港，係入手的時候就要問清楚店家能唔能夠裝上 Google 服務啦。而係軟件方面，紅米 2 搭載 Android 4.4.4 而 Miui 版本就係 6.2.4 。 最後簡單同大家分享一下紅米 2 跑分表現，
▲ 紅米 2 硬件規格（ Qualcomm S410 1.2GHz 搭配 1GB RAM ）與同樣係以 4G 雙卡作為賣點的 Samsung Galaxy A3 同埋 HTC Desire 620 一樣，跑分亦可以用上述兩部機成績作為參考。係 Quadrant Standard 跑分方面紅米 2 分數係 11077 ，比 A3 同 Desire 620 的萬二分水平稍低。而係安兔兔方面，紅米 2 分數係 19910 ，比 Desire 620 的 19735 分同 Galaxy A3 的 18895 分高少少。
▲ 係圖像表現方面，紅米 2 就比 Desire 620 同埋 Galaxy A3 略差，係 Basemark 2.0 上面紅米 2 表現係 25.21 fps ，而 Desire 620 係 26.29fps ，只得 qHD 芒嘅 Galaxy A3 就更高，接近 40fps 。
簡單來講，因為硬件規格分別唔大的關係，紅米 2 係效能表現上其實同 Desire 620 以及 Galaxy A3 相當接近，要分到高下實在唔容易。
▲ 首先要留意因為今次紅米 2 係大陸水貨，所以跟機並無原生 Google 服務。另外 MIUI 版本係 6.2.4.0 ，相機介面就同 IOS 好似。
總結：版主今次簡單試用過紅米 2 之後，大抵上係手感同埋屏幕方面都覺得滿意，如果睇返 $ 1150 呢個售價而言亦都可以話係高性價比（相對規格相近的 Galaxy A3 同埋 Desire 620 賣價都係兩千幾水平來講）。當然啦，係規格上同已經係大陸推出左的魅藍 note 相比紅米 2 明顯及唔上對手，對規格較有要求的朋友來講魅藍 note 就可能更適合。
在文章發佈時，紅米 2 仍未在港開賣，水價價錢 HK$1150 (聯通 4G 雙卡版本) ，按此看詳細規格及最新賣價。
查詢: K Digital 27299881
