改用金屬機身＋指紋辨識！紅米 Note 3 定價吸引？
綜合之前的傳聞來講，紅米 Note 3 同現時大熱的紅米 Note 2 相比，外型會係有主要分別的一環。同以往紅米系列以塑膠材質為機身主要物料不同，從小米官方的「爆料圖」看來，紅米 Note 3 會以金屬機身為賣點，有金、銀、灰三色。除左機身材質唔同之外，紅米 Note 3 看來亦追上潮流，加入左指紋掃描器。雖然係外型上會有大改變，但在硬件規格上面，看來紅米 Note 3 都係用返 5.5 吋 FHD 芒，處理器都係 Helio X10 ，相機都係 1300 萬像素主鏡頭以及 500 萬像素前鏡。可以話，基本上紅米 Note 3 係硬件方面同前代係無分別的。係價錢方面，大陸媒體就估計紅米 Note 2 會有 16GB 標準版以及 32GB 高配版，價錢分別為 1099 人仔以及 1299 人仔。
▲紅米 Note 3 聽日就會發佈，一般相信係價錢上會比起紅米 Note 2 貴少少。
比拼大陸千元機，紅米 Note 3 會唔會更抵？
早係 10 月時，其實大陸廠牌有一個相當明顯的轉變，就係將部份旗艦機種的賣點下放，以求達到「做爛市」、「性價比一流」的效果。呢點從當時各廠牌推出的新機，包括華為的 Honor 5X 、樂視 Letv 的樂 1s 以及魅族的魅藍 metal ，都可以見到。呢堆手機不約而同都有「金屬機身」、「指紋辨識」、「 5.5 吋 FHD 芒」，部份甚至係以「旗艦級數處理器」為賣點，在定價上三部機都好相近，而且係到港一段時間後，價錢都跌左唔少，會唔會抵過紅米 Note 3 呢？定價最平，但規格較弱！華為 Honor 5X
首先講左係大陸出貨量同銷量都同小米鬥到難分難解的華為先。華為係 10 月的時候就推出左一部主打 999 人仔的入門機 Honor 5X ，以定價來講其實 Honor 5X 係最便宜的一部，除左玩到「金屬機身」、「指紋辨識」、「 5.5 吋 FHD 芒」呢三個賣點，仲要一千人仔有找，連千元機都唔算！不過，對於港人來講，華為 5X 再平都唔代表最抵玩，因為 999人仔的移動版並不支援 FDD LTE ，換句話講要係香港用就只能夠選擇 1399 人仔的全網通版。另外，同今次會提到的手機都唔同， Honor 5X 係用左中階的 Qualcomm S616 處理器，規格上會較弱，而且即使深水埗福仁場內減左價，價錢都仲要 $1930 左右，性價比算係比較低。魅藍 Metal 跌勢強勁
版主係 10 月的時候都有出席魅族的新機發佈會，可以幾肯定咁講魅藍 Metal 係不會在香港正式開賣的，主要原因相信係因為手機用左阿里巴巴雲 OS ，未必為港人所接受。不過，呢部機係推出左之後仍然有店家入貨，亦成功裝上 Google Play Store ，所以大家照樣可以買到。係價錢上魅藍 Metal 算係三者中跌得最快的一部，由初到港要價近兩千一，而減到 $1750 ，差不多 $300 。
▲ 以定價來計， Honor 5X 全網通要 1399 人仔而魅藍 Metal 最平就係 1099 人仔 ，呢個價錢上的差異來到香港都可以見到。
樂 1s 水貨賣價最平，行機快到港？
最後就係樂視早排推出的樂 1s （在港推出時會叫 Le 1s ），係定價上只係 1099 人仔的樂 1s ，一到港價錢未有好似之前提到的魅藍 metal 以及 Honor 5X 一樣要價兩千頭，反而只係 $1600 左右，所以初到港已經係場內熱賣。如果以規格同埋定價來計，紅米 Note 3 主要對手好可能係呢部機，因為同樣係用左 Heilo X10 處理器啊。近日樂 1s 價錢都未有大變，場價都係 $1550 左右。但之前都有提過，樂 1s 相信係下月正式推出行貨的機會都幾大，有意入手的朋友等一陣都無壞。最後，因為紅米 Note 3 未有咁快到港的關係，其實現時都好難講係價錢上能否完勝對手，唔知大家又會點揀呢？留言講講吧！
▲一張圖見晒現時大陸水機之中最熱門果兩部，紅米 Note 2 水貨因為跌穿左一千又有 32GB 版，一直都多人支持，而價錢 $1550 左右的樂 1S 因為係三部千元大陸金屬機之中最平果部，前一排人氣也很不錯。
在文章發佈時，紅米 Note 2 定價為 $1099 ，按此看文章規格及最新賣價。
在文章發佈時，樂視 Le1 s 在港開賣日期未定，按此看文章規格及最新賣價。
