紅米 Note 3 開箱試， 32GB 高配版仲抵玩？
今次版主試玩的是紅米 Note 3 的高配版。同前代不同，紅米 Note 2 標準版當中係有分「移動版」以及「雙網通版」（當然，後來大家都知所謂移動版其實都係用到 FDD LTE ，跟雙網通版無別），而紅米 Note 3 的標準版就只有支援雙網通的版本，大家入手時就唔需要擔心會買錯。係規格上，紅米 Note 3 同紅米 Note 2 相比，大致上都係有進步。好似電池容量方面有 4000mAh ，而且仲有指紋掃描。不過，要留意係紅米 Note 3 最大的問題在於支援雙卡時卻唔支援 SD 卡，明明 Hugo Barra 於上次訪問提到紅米系列特色是支援 SD 卡，今次紅米 Note 3 又取消了，當中原因真係叫人摸不著頭腦。係唔支援 SD 卡的情況下，只有 16GB 內置容量的標準版紅米 Note 3 就要好似小米 4i 一樣面對同一問題，就係「 16GB 內置容量你夠用嗎？」。而且高配版係用上 32GB 內置容量的同時更加有 3GB RAM ，即使賣價貴上兩百人仔，但就性價比而言相信還是比較高的。
▲ 今次包裝盒值得講下，因為小米終於放改左設計，大家又覺得個樣如何呢？
▲ 跟機都係一貫入門機配件， USB 線同充電器一個，有 10W 。
▲ 紅米 Note 3 因為用左 4000mAh 大電，所以係厚度上有 8.65mm 。
▲ 版主特意唔用閃光燈去拍「三天皇鍵」，可以見到其實係會著燈，但係唔光。
▲ 指紋掃描器係鏡頭下方。
▲ 3.5mm 插口位於機頂而 Micro USB 插口就係機底。
▲ 不支援 SD 卡但紅米 Note 3 卻有雙卡設計，不過係雙 Micro SIM 卡。
外型，屏幕鬥「孖生兄弟」魅族 MX5 ，各有千秋？
早係紅米 Note 3 的傳聞出現時，個人已經覺得紅米 Note 3 外型跟魅族定價中階的 MX5 相當近似，好似「餅印」咁。所以今次開箱版主都特意選左銀色版，跟 MX5 作一個外型，屏幕比拼，不過係開始前都要提一提大家 MX5 跟紅米 Note 3 雖然似樣，價錢卻有一定差距的。小米係今次紅米 Note 3 上一改以往紅米系列以塑膠為手機主要材質的風格，跟大隊玩金屬機身，出來在外觀上感覺算係唔錯，不會令人覺得好似「千元 Cheap 機」。不過，跟 MX5 相比，可以感覺到紅米 Note 3 在造功上，只能說乎合千元機的水平。在機背上，紅米 Note 3 的金屬材質跟 MX5 相似，不過拎上手卻可以感覺到兩者其實有不同， MX5 的金屬機背「金屬感」相當強烈，係有冷氣的室內空間拎上手係會有凍冰冰的感覺，而且用手指輕敲機背，亦有較硬淨的手感。相對之下，紅米 Note 3 都係金屬材質，手感亦算不錯，但係在造功方面卻可以見到一點小瑕疵。不知是不是個別的問題，版主試玩的紅米 Note 3 是不能完全放好 SIM 卡槽的，無論點樣推，都係會有一小部分突出來，邊框因此不算很平滑。
當然，紅米 Note 3 在設計上也是有比起 MX5 優勝的地方，好像 MX5 機背天線位置係有刮手感覺的，而紅米 Note 3 設計相似卻沒有問題，另外就係因為加入左 4000mAh 電池機身較厚，所以相機主鏡頭都沒有突起。但總體來說，就版主所試用的兩部手機中， MX5 造功還是好一點的。
不過，係屏幕方面紅米 Note 3 又收復了失地，因為魅族 MX5 係有少少偏黃同亮度不算出色。而紅米 Note 3 係呢方面就做得不錯啦！亮度足夠之餘亦不見有偏色問題，在低角度之下也表現都令人滿意，所以來到屏幕方面個人覺得紅米 Note 3 水準係比千元機水平更佳。
▲ 今次一樣係搵左 MX5 做個比較（其實版主都不想重覆再用的，但兩部機真係太似樣）。
▲ 係邊框上，紅米 Note 3 同 MX5 的處理都有不同。
▲ 紅米 Note 3 同 MX5 個機背實在好似，好在紅米 Note 3 有個指紋青描器作辨認。
▲ 喇叭處理上兩者都有不同，紅米 Note 3 係在機背，而 MX 5 在機底。
▲ 版主今次試玩的紅米 Note 3 係有造功問題的， SIM 卡槽點都插不好⋯⋯
▲ 指紋掃描而家好似成為左手機必備功能，紅米 Note 3 用法上同 Nexus 6P 一樣，一點就可以著芒。
▲ 屏幕看來都係紅米 Note 3 的優點，不論亮度同顏色都不錯。
▲ 從低角度看，紅米 Note 3 也是比較光。
效能方面較 2GB RAM 版本紅米 Note 2 出色，但有點小問題⋯⋯
來到效能方面，紅米 Note 3 係小米第一次將 3GB RAM 下放到紅米系列上，即使是上代紅米 Note 2 的升級版，也只得 2GB RAM 。所以大家可以料到，紅米 Note 3 高配版將會是目前紅米系列中效能最強的。而今次版主用了安兔兔最新的 6.0 Beta 5 版本去測試，在性能模式下得出來分數接近五萬！在 Vellamo 以方面比起紅米 Note 2 亦係出色少少，但不明顯。不過，之前有朋友提醒版主，大陸版紅米 Note 2 在 apps 的兼容性上有點小問題，就係不少日系 Game 都用不了。版主今次在紅米 Note 3 上就試左從 Qoo 下載「白貓」以及「超級高達：王者」兩隻版主沒有玩開人氣卻相當不錯的日系 Game ，前者直接彈 app 而後者就黑芒數秒再彈 app ，平時有玩日系 game 的朋友要留意了。（不過⋯⋯版主好中意的「貓咪收集」沒有問題）
▲ 隨住安兔兔上左 6.0 版，紅米 Note 3 的跑分成績看來都很不錯，有近五萬分。
▲ 為免大家不習慣，版主都有用 5.7.3 跑一次，分數又跌返落去⋯⋯
▲ Vellamo 的成績則較為平穩，紅米 Note 3 整體略優於上一代，但不算明顯。
▲ 在 Basemark 2.0 上紅米 Note 3 有 59.60 FPS ，不過講到打機⋯⋯有點麻煩呢。
▲ 點解有點麻煩？因為部份日系 Game 直接下載後玩不到啊！
相機規格跟紅米 Note 2 一致
係相機方面，從官方資料看來，紅米 Note 3 同上代基本上沒有分別，一樣係 1300 萬像素， f2.2 光圈、 78度廣角，主打係有快達 0.1 秒速度的 PDAF 相位對焦。今次試用上感覺都幾快，要留意係預設左照片質素只係「標準」而不是「高」。今次版主係在調至高質素的情況下，試紅米 Note 3 的夜拍表現，大家又點睇？
▲以上左邊是紅米 Note 3 而右邊係作參考的 MX5（用 ePrice 手機版的網友，上面的是紅米 Note 3 而下面是 MX5）。另外，最後一張圖是紅米 Note 3 用「標準」相片品質影的。
【更新】加入電池表現！
因為續航力測試一般講緊閒閒地都 6-7 個小時，所以紅米 Note 3 的續航力測試版主而家能夠補上。今次版主用上 PCMARK For Android ，係插上 SIM 卡並連接 WiFi 的環境下測試，結果如下：
▲可以見到，紅米 note 3 係 PCMARK 上表現為 6 小時 17 分鐘，續航力不算特別出色。
總結：性價比可能是新一輪大陸千元機最高，但是否值得入手就是另一個問題了
睇完以上測試之後，可能好多網友都會以為版主對呢部機評價只係一般。其實當中原因係因為版主提高了要求，好中階甚至是旗艦的標準去看待這部機，如果以千元機來看的話，紅米 Note 3 反而算係有不錯的表現了。無錯，係外型造功上係有瑕疵、相機同電池續航力都未必有大家想像般好，而且本身亦有玩不到日系 Game 的問題。（據說其他用上 MTK 處理器的大陸版手機都有同樣情況）但就千元機價錢來講，以上的「問題」又是否真係咁重要？版主對紅米 Note 3 看法仍是正面的，因為從價錢的角度來講，我地將同期大陸千元機分別係 樂 1S 、魅藍 metal 以及華為 5X 作一個比較，以各款手機的「頂配版」價錢來計，就只有樂視的 樂1s 係跟紅米 Note 3 一樣做到 1099 呢個價錢，同時規格都係好近似，一樣有 Helio X10 配 3GB RAM 。而紅米 Note 3 作為最遲推出的手機，多了 4000mAh 大電呢個優勢，即使出來效果不算顯著，但感覺上性價比就是更高一點。簡單來講，紅米 Note 3 係新一輪千元機當中，仍是較有睇頭的一部。
不過，講完性價比不錯之後，又係咪代表紅米 Note 3 好值得入手呢？又未必，因為紅米 Note 3 最大問題是不支援 SD 卡，令價錢較平的標準版變得唔抵玩。如果唔係堅持要有金屬機身同指紋辦識，規格相近的紅米 Note 2 16GB Rom 版價錢平唔少呢！另外，要重要係紅米 Note 3 的主要對手樂視 Le 1s （樂 1s 的港版名稱）係 12 月 8 日就會正式在港發佈了，如果係價錢上唔會太誇張的話，有行貨保養的 Le 1s 相信吸引力都會幾大。紅米 Note 3 如果會係香港推出的話，睇來都要加快腳步了。
在文章發佈時，紅米 Note 3 正式發售日期未定，按此查看手機規格及最新賣價。
