紅米 Note 3 全網通 VS 紅米 Note 3 雙網通，有甚麼不同
話說近排唔少手機都湧現左「死機潮」，先係有 LG 承認 G4 在硬件上有缺撼，緊接著仲有小米成為另一個焦點。不過，小米的紅米 Note 3 就唔係因為硬件有問題而死機，而係因為官方 OTA 推送的升級包有問題⋯⋯所以嘛，大家如果有意入手大陸版紅米 Note 3 的話，版主先要提大家，如非必要，唔好多手 Update 。（事實上，唔少大陸機係升級方面都有「愈升愈有 Bug」呢個問題。而小米大陸版本升級有幾兒戲，版主都領教過，早前就試過用小米平板 2 OTA 升級之後，竟然變成開發版，啲 Bug 多到差點完成不了整個試玩過程⋯⋯）好，回到正題！同之前版主都試玩過的紅米 Note 3 雙網版相比，紅米 Note 3 全網通又有甚麼不同呢？主要有四點嘅。第一係全網通，但因為中國電信 CDMA 一般港人不太常用，分別不大。而係屏幕上，小米就標榜紅米 Note 3 全網通有「高級版陽光屏」。另外，係相機方面，紅米 Note 3 全網通就改用支援相位對焦， f2.0 大光圈的 1600 萬像素鏡頭。而處理器就由 Helio X10 改為 Qualcomm S650 。
不過，最重要都係紅米 Note 3 全網通加入左 SD 卡的支援。雙網通版本的紅米 Note 3 因為不支援 SD 卡，某程度上可以話係半強逼用家入手 32GB 內置容量的高配版。（除非只有 16GB 內置容量夠閣下使用）而紅米 Note 3 全網通版就支援最大 128GB SD 卡，呢個改變相當重要呢！以下版主就會集中係屏幕、效能、相機呢三方面作出比較。
▲今次版主試的紅米 Note 3 全網通版，因為之前都試左雙網通版了，所以就唔再重覆開箱啦！
▲外型方面⋯⋯其實兩部機係一樣的，外觀上係分唔出兩者之別，版主都係用 CPU Z 來區分。
▲紅米 Note 3 全網通版保持一貫大陸手機特色，用左 SIM 卡與 SD 卡槽共用的設計。
▲ SD 卡最大可以支援 128GB ，所以 32GB 卡當然都用到。
▲ 大家放大可以看到，全網通版用的是六核心 Qualcomm S650 處理器，也是整部手機重點所在！
加了「高級版陽光屏」的紅米 Note 3 全網通版，屏幕反而較暗
如果大家以為紅米 Note 3 全網通版一定會比起前代好的話，相信將兩部機一拎起手比較的話，即時會有點猶疑。因為而屏幕來講，紅米 Note 3 全網通版即使開到最光猛，都明顯比較暗。即使小米提到新一代紅米 Note 3 的屏幕有「像素級動態對比度調整技術」，但係光度上同上一代比卻明顯輸左，實在好難話有進步呢。
▲ 左邊係全網通版紅米 Note 3 ，右邊就係雙網通版。
▲ 光暗度上兩者分別都幾明顯，左邊的全網通版明顯偏暗呢！
▲ 可視角度上，兩者都差不多。
效能提升近一倍！紅米 Note 3 全網通仲勁過 Samsung A9！
係效能方面，實在係一個相當有睇頭的對決。一方面雙網通版紅米 Note 3 用上 MTK 定位中高階的 Helio X10 處理器，效能有一定保證。而紅米 Note 3 全網通版就用上左 Qualcomm 新一代處理器 S650 （原本叫做 S617），由 ARM Cortex-A72 雙核搭配 ARM Cortex-A53 四核組成， GPU 係 Adreno 510 。 從多個跑分結果可以見到，基本上紅米 Note 3 全網通版係全面壓倒前代，而且安兔兔成績比起用上八核 Qualcomm S652 處理器 Samsung Galaxy A9 還要高，令人意外。（附上連結供大家參考紅米 Note 3 的表現）
▲ 紅米 Note 3 雙網通版，在安兔兔 6.0 版本上，得分五萬不到。但全網通版就能夠上到接近八萬分，仲高過 Xperia Z5⋯⋯
▲ 係 Vellamo 方面，紅米 Note 3 全網通版係 Chrome 瀏覽器上，表現相當出色。而且單核方面都高雙網通版一倍。
▲在 Basemark 2.0 上有 59.93 FPS 呢個成績也是令人滿意。
1600 萬像素相機鬥前代，分別不大？
來到相機方面，呢部份比較難講，所以版主個分為整體以及較為細微的地方去講。如果大家以為紅米 Note 3 全網通版本將相機升到 1600 萬像素同 f2.0 光圈之後，成像質素或者細緻度會大大提升，恐怕最後都係會失望。因為版主不論從手機還是在電腦上看，都不易看出兩者有相當明顯的分別。呢方面其實都可以理解，因為大陸千元機同旗艦機，其中一個分野比較大的地方就係相機表現，百元／千元價位的手機影相出色的真係⋯⋯應該無！（老實講，個人覺得大陸機之中只有 Mate 8 或者 Oppo 手機係影相方面才算有不俗的表現）所以，以下版主就將紅米 Note 3 全網通以及紅米 Note 3 雙網通兩組相片放出來，比大家估一估邊一組相片先係紅米 Note 3 全網通的。可以咁講，拍攝 A 組相片的手機係操作上，不論係對焦還是反應，都比較順手以及準確，而且顏色方面比較能還原現場情況，但有時略嫌有點偏暗。
A B
小結：紅米 Note 3 全網通比前代吸引力大多了
雖然係屏幕以及相機上，紅米 Note 3 全網通版其實唔算好好多，但係單係處理器改用了 Qualcomm S850 ，在效能上如此出色的表現，再加上 MTK 處理器又多問題，已經有足夠的理由還版主作出紅米 Note 3 全網通比起雙網通更值得入手呢個結論。如果在香港方面，小米最後決定引入紅米 Note 3 全網通版，相信會係一部幾有競爭力的千元機，再加上不支援 SD 卡呢個為人詬病的缺點都改正埋。唔計外型造工上的問題，其實都無乜好挑剔了。現時，紅米 Note 3 全網通的高配版賣價約為 $1780 ，而標準版大約就係 $1580 。價錢不算平，但相信係農曆新年過後，價錢會回落唔少吧！（對了，兩組圖片當中， A 組是紅米 Note 3 全網通版，而 B 組就是雙網通版。所以前者在軟件方面的改善其實比起硬件的改動更明顯一點呢！）
鳴謝：Lucky Digital Store 好運數碼 ( 5465-5886 )
