早過台灣，紅米 Note 3 全網通對手會是 HTC 嗎？
紅米 Note 3 係今個月推出，而小米 5 最快要 4 月尾或者 5 月先到港，呢兩點相當大家都知道，但確切的開賣資料小米之前其實就未有公佈的。剛剛版主就聽說，小米香港已經選定了發佈日期，將會係 3 月 21 號，呢個日子除左係比 LG G5 3 月 22 號的發佈會早一日之外，亦都係比起紅米 Note 3 係台灣登場的日期更早的（據聞早最少一日）。如果參考以往經驗，一般而言係發佈之後，即日或者遲幾日就會正式開賣。不過價錢方面，版主而家都未有資料，唯有參考一下大陸賣價，以 2GB RAM 的標準版來講，大陸做緊 999 人仔（大約係 $1192 港幣）而 3GB RAM 的高配版就係 1199 人仔（大約係 $1430 港幣）。同樣值得留意係，以上年紅米 Note 2 的經驗看來，小米香港有可能只會引入 2GB RAM 的版本，唔知今次做法會否不同？
▲ 紅米 Note 3 而家都仲有好多未知之數，好似係價錢會係點，會不會同時賣標準同高配兩個版本等等，大家要留意 ePrice 啦！
同期對手有邊個？會是 HTC One X9 ？
嚴格而言，紅米 Note 3 同 One X9 唔會係同價位的競爭對手，前者賣價點睇都唔會過到兩千蚊，而後者就點睇都唔似會賣低過兩千蚊。不過，係開賣日期上，兩者就有可能撞到正呢！之前版主都提過， HTC One X9 係改用 Android 6.0 之後，一樣定左係 3 月推出，不過就沒有提到確實的時間。從規格上， One X9 用上 5.5 吋 FHD 解像度屏幕，處理器就係 MTK 的 Helio X10 2.2GHz 八核配 3GB RAM 以及 32GB 或 64GB 內置容量（最大支援 2TB SD 卡）。相機方面有支援 OIS 光學防手震， f/2.0 光圈的 1300 萬像素主鏡頭以及 500 萬像素前鏡，電池都有 3000mAh ，整體同紅米 Note 3 全網版都幾相近。（最主要係處理器不同）兩部同樣係 5.5 吋中階級數的手機，唔知大家更有意欲入手紅米 Note 3 全網通版還是 HTC One X9 呢？留言講講啦！
▲ 將 One X9 同紅米 Note 3 全網版拼埋一齊講，某程度上真係有少少夾硬來。但兩部 5.5 吋中階級數新機都撞正同一個月出，無辦法啦～
在文章發佈時，紅米 Note 3 全網通版開賣日期未定，按此看手機詳細規格及最新賣價。