似唔似 HTC
好奇怪，當有人話 HTC 抄 Apple 或者 Apple 用了 HTC 專利，再話三星又似 HTC，OnePlus 3 又似 M9，M9 其實又來自乜乜乜。。睇到世界大亂嘅時候，咁小米手機紅米 Pro 似乜？其實，乜.都.唔.似。有留意小米新出嘅大芒手機，即係 5.5 吋屏幕以上嘅款色，外型都係差唔多個款，唔會好令人好深刻，但又唔係特別好手感，唔會有一望好似乜乜機，又唔會一見鍾情。今次紅米 Pro 被用上「一體式金屬機身設計」，機背的拉絲紋，睇起上來似 HTC One M9，但質感差好遠。版主呢排用緊都有似似地 M9 機背嘅 OnePlus 3，但機背的金屬冷感，是令人愉快的。紅米 Pro 呢？機背感覺依然是怪怪的，金屬感？我覺得似薄身版膠背。但無論如何，今日小米手機造工，已不再玩具，但若果要玩好有質感及 Metal 嘅感覺，咁平嘅價錢，基本上係無可能。
▲ 華為 P9 Plus (右) 賣價比起紅米 Pro 貴好多! 但沒有期望，便沒有失望，反而覺得好好渣。但話說兩頭，以 5.5 吋芒手機來講，紅米 Pro 也不算大部，就算是女生渣上手都不會覺得好重。
▲ 再跟紅米 Note 3 （左) 比一比吧。其實，小米手機係呢一兩年，都好有自己風格，就係平實風。
▲ 紅米 Pro 其中一款白色版，想睇晒咁多款顏色，早前篇發佈會 Handson 有晒三款色。
▲ 機背髮絲金屬紋，感覺好 HTC M9，但上手係兩個不同感覺。至少，紅米 Pro 是沒有金屬機身的冷感，卻有點膠感。
▲ 採用 USB-C 插頭。
▲ 紅米 Pro 是孤寒雙卡，即係有一個 SIM 卡槽與 MicroSD 卡共用：有 SIM 就無 SD。
▲ 音量鍵與開關掣都係左面。好采開關掣沒有坑紋，不然的話，又係好。。H...T...C。
▲ 用回機前掣作指紋認證。
▲ 機頂有 3.5mm 耳筒插位。
Helio X25 效能相等於 Snapdragon 808
若果沒有燒底版事件，LG G4 應該仲有不少捧場客！但大家又否忘記，LG G4 也只是用 Snapdragon 808，係 AnTuTu 嘅跑分也是八萬分左右呢。而係 MTK Helio X25 配合 4GB RAM ＋1080p 芒情況下，也是跑出 9 萬分成績。雖然說實話，跟 Snapdragon 820 還差很遠，但相信效能已夠晒用。特別聲明，版主唔係特別讚 MTK 出品嘅 CPU，我會更介意 MTK CPU 沒有支援 Hi-Res 音效嘅技術，更介意係香港做唔到 4G+ (暫只支援 TD-LTE 嘅 4G+) 更加不要說 VoLTE 等等。但若果你只是想買部平機，用完就掉，紅米 Pro 選用嘅 SoC 配置，我唔覺得唔夠用。
▲ 左至右分別是 AnTuTu, Vellamo 及 PC mark 得分。以 AnTuTu 為例，九萬四千分，係上年已經係 Flagship 級。所以你話 X25 效能差，其實唔多成立，問題只係，再勁 D 你又用唔用得晒。只可借版主玩紅米 Pro 時間唔耐，呢一代 MTK CPU 會否比 Qualcomm 慳電，暫時都唔知了。
雙鏡頭比拼 P9 Plus
今次紅米 Pro 賣點係雙鏡頭！依佢地嘅解釋，主鏡頭係由 SONY IMX254 千三萬像素感光元件，再配合三星一粒五百萬素感光元件景深鏡頭組合而成。IMX258 原來早在小米 4C 已採用，而 Sony Xperia XA 都係用呢粒感光元件。相對 P9 Plus 採用嘅 IMX286 雙鏡，雖然 IMX286 只支援千二萬像素拍攝，但每粒像素有 1.25um 比起紅米 Pro 採用 IMX258 嘅 1.12um 都要好。理論上，P9 Plus 影相會比紅米 Pro 好，實際如何呢？稍後睇相。
▲ 相機比拼之前，不如比比屏幕。紅米 Pro (左) 用 OLED 屏幕，華為 P9 Plus (右) 是 AMOLED在顯示同一張相片時的效果會係咁。
▲ 放大再睇真。紅米 Pro 在左，P8 Plus 在右。
大家都係雙鏡頭，相同之處，是可以影到「隨意改變景深」嘅相片，大家嘅最大光圈都可以去至 F0.94。不過，都有唔同之處。紅米 Pro 嘅景深功能，仲係覺得好似 HTC 手機。點解咁講。我記得我好耐以前玩 Butterlfy 2，雖然有千三萬鏡頭，但可以「隨意改變景深」嘅相片，只有四百萬像素。呢個 case 係紅米 Pro 都係咁，可以可以「隨意改變景深」嘅相，全部都會跌至五百萬像素。五百萬像素嘅相，都夠玩嘅，不過對手 P9 Plus 影得番二千萬喎！真係機比機，比死人。紅米 Pro 有更多令人懷念 HTC 仲有雙鏡頭手機相機嘅年代嘅特效相片玩意，例如只有係手機睇到嘅假 3D 效果。
▲ 相機鏡頭可以調教 F0.95 光圈。紅米 Pro 也有 Pro 專業模式，但只有 ISO 及白平衡調教。
▲ 用了雙鏡頭拍攝，可以做出呢九樣特別效果。
▲ 好懷舊嘅，係手機先睇到嘅。。3D 特效。
▲ 呢兩張是紅米 Pro 拍出來嘅景深相片。本來都是同一張，只是在手機內改變對焦位置做出來的不同效果。雖然只有五百萬像素，但其實內裡有很多相片 Data，令呢張照深相，有成 5MB 咁大張。紅米 Pro 的特效，強到好似 Model 是被 Key 上裡面一樣。
▲ 呢兩張是示範不同的相片特效。
以下是真比拼，以夜晚為主，左面或手機 M 版睇到的上面，以 16:9 拍攝的，都是紅米 Pro，右面或手機 M 版睇到的下面，以4 : 3 拍攝的，是由華為 P9 Plus 拍出來。大家先睇相吧。
▲ 睇了三張試相比拼，版主 Keith 會覺得 P9 Plus 影出來嘅細緻度會比紅米 Pro 好，但這也是把相片放到好大才感受到，若果是一般 Facebook Share、WhatsApp 分享，紅米 Pro 係日拍與夜攝，都叫做合格不會太差。
▲ 最後景深相片比拼，左面 (手機版嘅上面) 一張，由紅米 Pro 拍出來，右面 (手機版嘅下面)，由 P9 Plus 拍出來。
小結：平有平好
版主 Keith 會咁樣評價呢部紅米 Pro。呢個係 4GB + 128GB 版本，加埋記憶卡插槽，一定夠用，入多多相都得。而呢個價錢：人民幣 $1999 即係約二千三左右，行 MTK Helio X25 CPU 效能都算 OK。紅米 Pro 賣雙鏡頭，其實特效多多，有排你玩。但相比起同樣雙鏡頭嘅華為 P9 Plus，佢更多野玩。一般相片嘅質素比紅米 Pro 好。但一分錢，一分貨嘅道理，你明白的，係咪？呢個世界，無咁多真性價比王嘅。紅米 Pro 係文章刊登時，香港售價未定，按這裡有詳細規格及最新賣價。
