千元機皇：5.5 吋芒 ＋ 4100 電 ＋ 八萬跑分！紅米 Note 4 香港上市

多得小米，攪到手機完全唔值錢，原來千幾蚊嘅手機，已有中上嘅規格，網友都用呢個標準評機，唔係小米價，全部係坡圾。始作俑者小米再出擊，係香港正式推出千元旗艦，紅米 Note 4 國際版上市，呢個價，你會讚，問題你會否衝？當玩具？孝子機？定係只係期望大廠都係同佢賣咁平？

紅米 Note 4 早前係中國大陸發佈， 估不到，呢部機都有國際版。熟小米運作都知，香港行貨嘅小米手機，全部都係跟台灣，新加坡等地，推出國際版，規格可能跟中國大陸版有少少唔同。紅米 Note 4 呢？今次沒有為國際版改用非 MTK CPU，依然行 MTK Helio X20 十核心處理器。呢粒處理器，我哋搶先為紅米 Note 4 跑過分，AnTuTu 得分大約八萬幾！即係點？只係差過 Samsung Galaxy Note 5 少少，夠用與否，大家心照。香港推出嘅國際版行 3GB RAM 及 64GB ROM，5.5 吋 Full HD 屏幕，支援中港 3G / 4G，但採用 2 揀 1 SIM 卡插槽，即係要插記憶卡，就不能用雙卡雙待。不得不提，4100mAh 大電池另一個是重點呢。







 

紅米 Note 4 仲有千三萬像素相機，支援 PDAF 相位對蕉，亦有機背指紋認證。用小米手機預咗跟機用 MIUI 介面，去到第八代，MIUI 最大賣點是做到一機兩個 Interface，做到真正雙開 WhatsApp，Facebook Messenger, Line 等，等你一部手機，幾個分身。仲有可以 Cap 長圖，唔再係三星 NOTE 專有啦。