小米 Note 2 要來了! 6GB / 128GB 四千有找，賣價 + 上市資訊全公開

左定坤 (Cho Ting Kwan) 2017-03-07 13:12 | 小米

相信大家點都唔會忘記，小米上年 10 月在北京發表了兩部旗艦新機，一部係小米 Ｎote 2，而另一部係小米 Mix。之後在一次的春茗飯上，小米亦透露，今年第一部會在香港發表的旗艦新機，會係小米 Note 2，但後來等左好耐好耐，都仲係唔見小米 Note 2 的發表消息，實在是令人心急。不過，而家小米 Note 2 會幾時抵港，同埋會賣幾錢，終於都正式知道了! 即刻睇下文啦!



剛收到來自小米官方的新聞稿，表示小米將會在 14/3 發表兩部新機，當中會有一部旗艦，佢就係小米 Note 2，成個外型十足三星 Note7，又係用上曲面玻璃機背設計，配備 5.7 吋 FHD OLED 曲面屏幕、Qualcomm S821 處理器、2256 萬像素主相機等規格。電池方面，小米 Note 2 內置 4070mAh 電池，並支持 Quick Charge 3.0 快速充電。另外，香港推出會是 6GB RAM + 128GB ROM、支持全球 37 個頻段的全球版本，顏色方面為亮黑色，賣價為 $3999。呢個價錢，買部好似 Note7 的手機番黎，唔知你又有無興趣呢?



另外，小米亦會發表紅米 Note 4X，有 5.5 吋 FHD 屏幕，配備了 S625 處理器，內置 3GB RAM 以及 32GB ROM，主相機有 1300 萬像素，而前置相機則有 500 萬像素，並支持智能美顏技術 3.0。電池方面，紅米 Note 4X 採用了 4100mAh 大電，相信能夠滿足到大部份用家一天的需求。機身配色部份，紅米 Note 4X 除了有鉑銀灰之外，仲會加入香檳金以及新色「櫻花粉」，而呢部紅米 Note 4X，將會賣 $1099，真係算好抵玩。與此同時，現有的紅米 Note 4 亦會增添黑藍兩色，賣價為 $1399，將於 3 月 14 日早上 10 時起在香港小米網正式開賣。