全金屬機身 + 5.5 吋芒！紅米 Note 4X 版主開箱！
剛到手，版主的第一感覺就係: 咦？就同紅米 Note 4 差不多。版主手上有的紅米 Note 4X 是灰色的版本，機背同樣用上全金屬機身設計，唔知係咪果陣紅米 Note 3 的時候俾版主講過黎，之後的紅米 Note 4 以及而家的紅米 Note 4X，終於都似番啲樣，摸上去會有明顯的金屬感，而非以前果種假金屬。對於手掌大的人來說，呢部紅米 Note 4X 上手的手感應該都會不錯，但因為版主比較手細，始終未能俾到我舒服的感覺，我自己覺得，如果佢機身再「瘦啲」，咁應該就會更加有 feel。唔講咁多，直接開箱啦！
▲ 呢個就係紅米 Note 4X 的包裝盒，盒頂隱約會見到寫住 4X (相中睇得唔係咁清楚，下面會睇得清楚啲），而側面則寫住 Redmi Note 4X。
▲ 包裝盒底部會寫有一些紅米 Note 4X 的基本配置資料。
▲ 開箱！香港版的紅米 Note 4X，入面會有火牛、USB 線、說明書以及 SIM 卡針 (唔好意思俾電話壓住左)。
▲ 因為平價，所以都唔能夠要求充電有幾快。火牛上可以見到，輸出只有 5V / 2A，即係 10W。
▲ 即刻睇實機，紅米 Note 4X 用上了 5.5 吋 2.5D 屏幕，體積為 151 x 76 x 8.45 mm。
▲ 正面的上方會見到有 Sensor、聽筒以及 500 萬像素的前置鏡頭，相機有 F2.0 光圈，並支持第二代智能美顏功能。
▲ 而正面的下方，則有大部份手機都具備的「三天皇鍵」，即係多工鍵、主頁鍵以及返回鍵。
▲ 機背用上了金屬材質，同紅米 Note 4 一樣有金屬感，而非紅米 Note 3 果種「假金屬」。
▲ 機背上方會有 1300 萬像素主鏡頭，相機採用 5 片式的構造，同樣有 F2.0 光圈，下方有雙色溫閃光燈以及指紋辨識器。
▲ 而機背下方則會見到小米的 Logo。
▲ 右側會見到音量鍵以及開關鍵。根據版主過去經歷，音量鍵位置好似都幾易壞，唔知今次版主會用幾耐先出問題呢？
▲ 左側則有孤寒式雙卡插槽。
▲ 機頂會見到有 3.5mm 耳機孔。
▲ 而機底則有兩個喇叭位以及 microUSB 充電插口。
▲ 上手！其實唔計我隻手唔夠大，整體來說手感都算係不錯的，但我個人會覺得，如果機身可以造得再「瘦啲」，咁或者會更加好。
跑分軟件試效能！平價 S625 手機，夠唔夠三星 C7 鬥？
配置方面，紅米 Note 4X 配備了 Qualcomm S625 處理器，內置 3GB RAM 以及 32GB ROM，無錯放在今時今日，32GB 確實都係少左啲，不過 3GB RAM 就算係相當夠用。版主對 S625 處理器最深刻的印象，八個字總結: 超級慳電，續航無敵。所以內置 4100mAh 的紅米 Note 4X，續航能力我絕對不擔心，但效能方面又如何呢？版主利用安兔兔跑分軟件，幫呢部紅米 Note 4X 跑左次分，睇下又夠唔夠 Samsung Galaxy C7 鬥。結果如下:
▲ 安兔兔跑分結果為 61936 分，但有趣的是，佢顯示的名稱唔係紅米 Note 4X，而係紅米 Note 4，不過就係用上 Qualcomm S625 處理器的版本，並內置 3GB RAM 以及 32GB ROM。而呢個分數，則相比紅米 Note 3 仲要低分，同 Samsung Galaxy C7 得出的分數差不多。但 C7 而家大舖減極價都要 $2999，紅米 Note 4X 港行 $1099 就可以入手，如果在 S625 手機來說，你又會唔會考慮呢部紅米 Note 4X 呢？
紅米 Note 4X 係文章刊登時，賣價為 $1099，按這裡有更詳細規格及最新賣價。
