小米 Max 3 開箱評測！可惜跟機沒有保護套
先來做個開箱！不過講開箱之前，先簡單講下到底呢部小米 Max 3 有乜料到。小米 Max 3 主要有三大殺著：6.9 吋巨芒、5500mAh 核電、S636 性能不錯處理器，而綜合呢三個賣點，都不過是賣緊 $1999，個人認為實在是抵玩得過份，出街用來打下機、睇下漫畫，都正！
▲ 小米 Max 3 包裝盒，一如既往白雪雪、簡簡單單的設計，但就用金色印住「Max 3」嘅字樣。
▲ 包裝盒底部會見到寫有這部小米 Max 3 的重點特色，都係版主講果啲啦！
▲ 睇下包裝盒入面有啲咩先，其實都係果幾味，火牛、USB Type-C 線、卡針，最可惜就係竟然連清水套都無個，呢樣有點失敗
▲ 大電驚住會叉得慢？咁又唔會，跟機火牛支持最高 18W 的輸出。
▲ 上代 Max 2 就 6.44 吋 16:9 芒，而今代 Max 3 就 6.9 吋 18:9 芒，但當兩部手機拍埋一齊的話，其實機身尺寸是差不多的。
▲ 屏幕上方是 800 萬像素的前置鏡頭。
▲ 而下方則是有個稍為礙眼的下巴，不過都算小事，畢竟暫時都無乜邊部手機無下巴。
▲ 來到機背部份，小米 Max 3 是用上了金屬材質。
▲ 都係好似 iPhone X 咁，雙鏡頭係打直的。而中央部份會見到有圓形的指紋辨識鍵。
▲ 機背下方會有小米的 Logo。
▲ 機身右側會有開關鍵以及音量鍵。
▲ 而右側則會有三選二 SIM 卡槽。
▲ 機頂就是 3.5mm 耳機孔。
▲ 機底則是 USB Type-C 插槽。
▲ 拎上手無錯對版主嚟講係有啲大架，不過如果用嚟睇下書、打下機，其實又唔會話太 care。不過放落褲袋就麻煩啲，無返咁上下大嘅褲袋，未必能夠放得入。
小米 Max 3 效能評測
開完箱，睇過外型，之後就到效能部分。記得上代小米 Max 2 係用上 Qualcomm S625 處理器，雖然呢粒處理器出名係慳電，但問題係 GPU 性能好差，唔好講要打機，一般使用版主都會覺得窒窒地。今次 Max 3 改用了 Qualcomm S636 處理器，情況就大大改善了。呢粒處理器曾經在 ASUS ZenFone 5 上用過，版主試過用嚟打普通 Game 係可以接受的。為咗具體咁話俾大家知，小米 Max 3 效能到底如何，版主就用了一系列跑分軟件，為大家測試一下。安兔兔跑分
▲ 安兔兔跑分結果顯示，小米 Max 3 得分有 118771 分，以千元價位手機嚟講，成績相當理想。當中 CPU 的成績為 55995 分，而 GPU 成績則為 21245 分。對比返小米 Max 2 的成績，在 GPU 部份小米 Max 3 進步了約 8000 分，而 CPU 更比起上代高出超過 3 萬分的成績。可見 S636 跟 S625，果然是不同的層次。
Androbench
▲ AndroBench 呢個軟件，主要係用來測試記憶體嘅讀寫速度，Sequential Read 同 Sequential Write 速度分別為 270.92MB/s 以及 199.89MB/s，不過根據 ePrice YK 大師的說法，真正影響用家體驗的是 Random Write，都有成 88.25MB/s，速度幾乎可以 win 到大部份舊代旗艦機 (包括 Sony XZ Premium、Samsung S8+、HTC U11，詳情可參閱呢度)。
GeekBench 4
▲ 版主會用 GeekBench 4 去測試小米 Max 3 的續航能力 (根據 GeekBench 的定義和操作，Battery Life 係解作一般使用時間，但實際使用時間還是會視乎個人的用途而受到影響，故此這能視為一個參考指標)。方法係，Kill 哂所有 App，手機設至飛航模式，斷哂所有網路連結，連方向都鎖定埋，減低一切會影響電池消耗的可能性。另外，在 GeekBench 4 入面會揀返 DIM screen，將屏幕亮度降到最低，而之後程式會模擬固定輸出 100% 工作負荷，最後經過約 13.5 小時之後，小米 Max 3 終於都頂唔住，得出成績為 7971 分，相比具有 5000mAh 電池的 Moto E5 Plus，還要高出 4500 分，表現算是相當好呢。
小米 Max 3 雙鏡頭實拍
基本上今時今日手機鏡頭有的功能，小米 Max 3 都有，包括雙鏡頭、AI 拍攝等等。小米 Max 3 兩個鏡頭分別為 1200 萬像素以及 500 萬像素，除咗支持 Dual Pixel 對焦之外，仲會有 F1.9 光圈，再加上可識別 206 種場景的 AI 鏡頭，影出嚟個效果又是否如理想呢？即刻睇下啦！日間拍攝
▲ 周圍都是樹蔭，其實環境唔算十分光，但影出嚟依然可以清晰見到地圖上的文字。
▲ 逆光下會預設自動開啟 HDR。
▲ 放大嚟睇係有少少模糊，但千元價位的手機來說，算係咁啦！
▲ 縮圖無限好，放大有少許油畫化的情況。
▲ 小米 Max 3 都有支持人像模式，可以做到明顯的虛化效果。
夜間拍攝
▲ 昏暗環境下，油畫化情況更加明顯，然而控光表現算是不錯。
▲ 睇完以上的試相，你又滿意小米 Max 3 的相機表現嗎？
小結
試玩過小米 Max 3 之後，版主對呢部千元價位的手機，無論是效能、續航、實際使用等方面，都感到非常滿意。可惜的是，小米 Max 3 依然是用 MIUI 系統，而老實版主對呢個系統不太喜歡，如果遲下有機會出個 Android One 版本，咁就真係 perfect！相機部分，雖然始終是有瑕疵，但又未至於是不能接受的程度，諗返佢個價錢，$1999 咋喎，有大芒大電仲有效能不錯，除左小米，邊度搵？網友又對呢部小米 Max 3 有無興趣呢？會唔會考慮買返部玩下？留言講下你的睇法啦！小米 Max 3 在文章發表時，4GB + 64GB 建議零售價為 $1999，按這裡有詳細規格及最新賣價。
