自動更新 Google Play 爆出來
若果你手中有一部小米手機香港版，又係 Google Play 更新手機嘅 App，你會發現，突然多咗一個 App 叫「Mi Pay 小米支付」。中國大陸不同手機廠都有自己嘅支付工具，不過，香港要攪呢 D 服務，一定要申請相關牌照，小米，係呢篇文章發佈時呢一刻，先唔好講根本傳聞嘅虛擬銀行牌照名單仲未出，連儲值支付工具牌照都無申請，無啦啦係全港小米手機爆呢個 App 出來，攪乜呀！最重要係，Mi Pay 其實原來一直存在於小米手機嘅 ROM 裡入面，不過沒有顯示出來。因為他們把 M iPay 放上 Google Play Store，又推出新版本，呢個 Mi Pay 自動爆出來！喂喂喂，到底小米手機香港版裡面，仲有幾多收埋咗，唔話畀用家知嘅 Apps，呢 D Apps 有無係背後做緊乜??
▲ 係香港版嘅小米手機，更新手機 App，就會爆出 Mi Pay，而呢個 App 係無得刪除。
▲ 傳聞小米都申請香港虛擬銀行牌照，但相關嘅 App 做到是是但但，電郵聯絡只係一個 Gmail，咁大間公司，攪乜呀！
▲ Mi Pay 要用手機號碼登記，但未見有實名頁面。
▲ Mi Pay 可以做 Bill Payment
▲ Mi Pay 會存取你嘅聯絡人，仲會可以控制撥打電話。
小米回應：
「Mi Pay （小米支付）是小米的流動支付應用程式，屬預載於MIUI的系統應用。由於Mi Pay尚未於大部分國際市場推出，所以在國際版MIUI中該程式已被隱藏，亦因為小米即將在印度推出Mi Pay服務，故此導致Mi Pay程式錯誤地出現在部分其他地區用戶的小米手機中。我們的技術團隊在加緊更新恢復，並會在第一時間通知用戶。在此，為我們的失誤及給用戶帶來的困擾真誠致歉。」