小米 Note 10 Pro 開箱
開箱之前，循例都要同網友講下，到底小米 Note 10 Pro 在外型上有乜特點。事實上，在外觀上 Note 10 Pro 同 Note 10 都係一樣，機身正面用上 6.47 吋 3D 曲面 AMOLED 芒，並且屏幕擁有 400000:1 嘅高對比度，令到顯示色彩更加鮮豔，同時達到黑白更鮮明嘅效果。同時，小米 Note 10 Pro 個芒同背面都用咗康寧第五代大猩猩玻璃，令到手機無咁容易被各種外力刮花以及跌損。而機背更採用咗弧形設計，令手感更加舒服。好，外觀介紹就到呢度，而上篇文章中版主已經提到，小米 Note 10 Pro 有冰雪極光、魔法綠境以及暗夜魅影三種顏色選擇，今次版主上手嘅係冰雪極光色嘅 Note 10 Pro，同華為 P30 Pro 嘅極光色相似，即刻同大家做個簡單開箱。
呢個就係小米 Note 10 Pro 包裝盒。
包裝盒側面寫上「MI Note 10 Pro」。
開箱！跟機主要配件有 USB Type C 線、充電火牛及透明保護套。
手機支持 30W 快速充電，而跟機火牛亦都支持 10V / 3A 輸出。
6.47 吋 3D 曲面 AMOLED 芒，有窄邊框，對比度達 400000:1。
水滴瀏海放置 32MP 前置鏡頭。
冰雪極光係咁嘅顏色。
五個主鏡頭，其中一個係 108MP，並且見到有雙 LED 閃光燈。
左側上方有音量鍵以及開關鍵，而下方則有 SIM 卡插槽。
機底是 3.5mm 耳機孔、喇叭以及 Type C 插槽。小米 Note 10 Pro 效能跑分測試
配置部分，小米 Note 10 Pro 配備咗 Qualcomm Snapdragon 730G 處理器，呢粒處理器並非旗艦級，而是屬於中階級別，但畢竟效能不算小米 Note 10 Pro 賣點，而係佢個相機，況且 S730G 處理器其實性能唔差，安兔兔跑分都有廿六萬多，直逼 S845 舊代旗艦 U，都已經睇得，又用得，打機都一樣得。除咗安兔兔跑分測試 CPU、GPU 效能，版主亦會用 AndroBench 5 測試 ROM 的連續 / 讀寫速度，有關成績睇埋落去自有分曉！
▲ 左圖為安兔兔跑分的成績，而右圖則為 AndroBench 5 的成績。先講咗安兔兔，跑分結果為 261321 分，當中的 CPU 成績有 94670 分，而 GPU 成績則有 70925 分，呢個成績拍得住舊代旗艦處理器 S845 嘅分數。而 AndroBench 5 係用嚟測試 ROM 嘅連續 / 隨機讀寫速度，當中就以隨機讀寫速度更為重要，因為會直接影響到使用體驗，隨機讀取速度 122.47 MB/s，隨機寫入速度則為 114.7 MB/s，呢兩者嘅速度都比起旗艦級嘅三星 Galaxy Note10 快 (根據 ePrice 測試記錄，Note10 隨機讀寫速度分別為 95.91 MB/s 以及 115.12 MB/s)。
1 億像素，DxOMark 最高分！小米 Note 10 Pro 比拼華為 Mate 30 Pro
如頭先所講，小米 Note 10 Pro 嘅賣點應該係相機先啱，配備五個主鏡頭，分別為 1.08 億像素超高解像度主鏡頭、500 萬像素長焦鏡頭、1200 萬像素人像鏡頭、2000 萬像素廣角鏡頭以及 200 萬像素微距鏡頭，呢五個鏡頭組合提供 0.6 倍至 50 倍無縫變焦嘅體驗。跟小米 Note 10 唔同之處，在於小米 Note 10 用上七片式鏡頭，而小米 Note 10 Pro 則用上八片式鏡頭，相比起七片式鏡頭能夠捕捉到更清楚、更銳利嘅影像，其相機實力之高，甚至仲拍得住華為 Mate 30 Pro，DxOMark 評分同為 121 分，而四千樓下價位嘅手機嚟講，算係超級不錯。
根據 DxOMark 的評價，小米 Note 10 Pro (CC9 Pro 尊享版) 廣角相機變形嘅情況唔多，喺細節上保留到位，而且大部份情況下噪點控制得很好，在光線變化時嘅曝光調整亦都很不錯，同時成像色彩亦相當悅目，講到咁無敵咁，又係咪真係咁好呢？版主就找來同分嘅華為 Mate 30 Pro，同大家比拼一下兩部手機的拍攝質素。
超廣角拍攝 (左：小米 Note 10 Pro；右：華為 Mate 30 Pro)
一般拍攝 (左：小米 Note 10 Pro；右：華為 Mate 30 Pro)
▲ 去到 1x 普通拍攝，喺大家都開咗 AI 相機嘅情況下，可以見到小米 Note 10 Pro 味精似乎 over 咗，顯得藍得好誇張，反觀華為 Mate 30 Pro 則比較自然一點。
5 倍 Zoom (左：小米 Note 10 Pro；右：華為 Mate 30 Pro)
夜景模式：(左：小米 Note 10 Pro；右：華為 Mate 30 Pro)
華為 Mate 30 Pro 沒有的功能 (1)：50 倍數碼變焦
雖然 50 倍 Zoom 呢個功能係由華為 P30 Pro 首推，但唔知點解去到 Mate 30 Pro，卻又閹割咗呢個功能，最盡只可以去到 30 倍 Zoom，所以呢度我就唔將兩部機比較，純粹畀大家睇下，到底小米 Note 10 Pro 影到 50 倍 Zoom 果陣，會影到啲乜。
▲ 頭先 1x 普通拍攝，咪影咗張渡海小輪相嘅，而家呢張相就正正係同一個位，用 50x Zoom 影，連船上個男人坐喺度睇緊報紙，都影得到。不過，影到還影到，但就同華為之前 P30 Pro 一樣，都係好模糊不清，就好似閉路電視果種質素咁。但 so？影到已經好屈機。
華為 Mate 30 Pro 沒有的功能 (2)：108MP 超高像素
▲ 呢個 1 億像素其實係令我印象好深刻嘅功能，本來以為用 Samsung 感光元件，質素唔方好，但實際試過之後，咦，又唔差喎，細緻度又真係相當高，不過因為都成億像素，張相尺寸大小成 2X MB 咁大。
小結
小米 Note 10 Pro 12 月 5 日開賣，香港建議零售價 $3999，以一部四千蚊有找嘅手機，雖然佢唔係旗艦機，只係一部 S730G 嘅中階機，賣呢個價以小米手機嚟講係貴，有人話，點解唔考慮小米 9T Pro 呢？$3599 起仲有 S855 旗艦 U 𠻹喎。係嘅，如果以 U 論 U，$3599 S855 同 $3999 S730G，大家都係小米，好似唔合邏輯。但無計，小米 Note 10 Pro 除咗 CPU 之外，其他相機硬件上比起小米 9T Pro 強得多，電有 5260mAh，又有 30W 快充，續航表現比小米 9T Pro 一定好好多。而相機又有五鏡頭，而且仲有全港首部 1 億像素鏡頭，實際試完又確係唔算差，咁成本大咗，賣價貴啲，都係合理。
事實上，Note 10 Pro 係我近期鮮有興趣嘅小米手機，外貌與實力都有，唔知網友又對呢部手機有無興趣呢？
小米 Note 10 Pro 在文章發表時，建議零售價為 $3999，按這裡有詳細規格及最新賣價。
