紅米 Note 9 Pro 開箱睇外觀
作為一部紅米手機，紅米 Note 9 Pro 維持係千元價格，只需 $1899 就有交易，價錢上係幾抵玩嘅。但老實講，手機外觀就一般般，有 6.67 吋 20:9 大芒，用咗穿窿芒設計，機背有四個主鏡頭，感覺係一部無乜特別嘅手機。有少少失望嘅係，原先睇官圖以為會係好似華為 P40 Pro、TCL 10 Pro 咁，用上霧面磨砂面，但原來都只係用玻璃機背，版主期待今年內，小米會出一部用上磨砂面嘅手機。畀你揀，你會揀玻璃面，定磨砂面？唔講咁多，開咗箱再講！
紅米 Note 9 Pro 包裝盒
跟機會有 USB 線、充電火牛、軟膠保護套、SIM 卡針。
火牛支持最高 33W 快充。
6.67 吋大芒。
穿窿芒設計，放置前置鏡頭
我手上嘅係白色版本。
有四個主鏡頭。
底部有 Type C 插槽同埋 3.5mm 耳機孔。
左側有 SIM 卡槽。
右邊有支持指紋辨識的電源鍵以及音量鍵。S720G 係咩料子？速睇紅米 Note 9 Pro 跑分效能
紅米 Note 9 Pro 配備了 Qualcomm Snapdragon 720G 處理器，內置 6GB RAM 以及 128GB ROM，電池容量有 5020mAh，並支持 30W 快速充電。平時手機 7 系 U，見得多都係 S710 呀、S730 呀，但今次就用上 S720G，係乜料子？版主就用安兔兔評測以及 AndroBench 5 跑分軟件，去測試一下手機的效能。
▲ 根據安兔兔評測跑分結果，配備 S720G、6GB RAM、128GB ROM 的紅米 Note 9 Pro，總分有 277960 分，當中的 CPU 成績有 101039 分，而 GPU 成績有 71054 分。比較返 Daniel 分享、用上 S730G 處理器的小米 Note 10 Lite，S720G 的跑分成績居然係比 S730G 還要高。
▲ 至於 AndroBench 5 係用嚟測試 ROM 嘅讀寫速度，連續讀取 / 寫入速度分別有 478.24 MB/s 以及 195.17 MB/s，符合 UFS 2.1 的標準；而影響用家使用體驗嘅隨機讀取 / 寫入速度，則有 109.38 MB/s 以及 55.16 MB/s，理論上唔會話十分順暢，但使用時都唔會有好窒嘅感覺。
配四個主鏡頭！紅米 Note 9 Pro 相機實拍
紅米 Note 9 Pro 同小米 Note 10 Lite 一樣，都係有四個主鏡頭，兩者配置上都好接近，大家都係有 6400 萬像素高解像度鏡頭同埋 800 萬像素超廣角鏡頭，不過小米 Note 10 Lite 嘅超廣角鏡頭會再 Wide 少少，支持 120 度視角，而紅米 Note 9 Pro 則支持 118 度視角，但實際唔會相差太遠。至於其餘兩個鏡頭，小米 Note 10 Lite 就有 500 萬像素景深鏡頭同 200 萬像素微距鏡頭，而紅米 Note 9 Pro 就剛好調返轉，有 500 萬像素微距鏡頭同 200 萬像素景深鏡頭。兩者嘅微距鏡頭都係支持最近 2cm 嘅拍攝距離，就算包裝盒上嘅細字，都可以近距離影得到。
以下就畀幾張紅米 Note 9 Pro 影出嚟嘅相畀大家睇：
標準拍攝
▲ 以一部千元手機嚟講，我覺得佢相機算係做得唔錯，就算放大嚟睇，都唔會覺得有好多噪點，而且色準算幾唔錯。
超廣角拍攝
▲ 不過一到超廣角拍攝，就有少少出事，縮圖無限好，但放大會見到有少許模糊的情況。
2x Zoom 拍攝
10x Zoom 拍攝
▲ 紅米 Note 9 Pro 最多支持 10x 數碼變焦，版主喺 The One 19 樓影過去 iSQUARE，你可以見到大廈上嘅字都睇得清楚。
64MP 超高解像度拍攝
▲ 64MP 高像素鏡頭影出嚟嘅相，放大睇反而覺得不及標準拍攝清晰。
微距拍攝
▲ 支持最近 2cm 微距拍攝，包裝盒上細字都可以近距離拍得好清楚。
小結
好快咁玩完紅米 Note 9 Pro，我覺得其實跟同場發表嘅小米 Note 10 Lite，並唔係真係相差好遠，雖然外型係有分別，但效能上就不相伯仲，而且紅米 Note 9 Pro 反而仲有少少比小米 Note 10 Lite 效能還要高。而相機方面，以一部 $2000 都唔使嘅千元手機，我會覺得呢部手機影相算係幾唔錯，絲毫唔覺得係一部千元手機影出嚟嘅相，無論色準、細緻度方面，我覺得都屬於可以接受嘅範圍，又可以玩齊超廣角、微距等功能。如果紅米 Note 9 Pro 同小米 Note 10 Lite 畀我揀，我會揀前者，反正唔係相差太遠，慳返六舊水仲好啦～你又點揀呢？紅米 Note9 Pro 在文章發表時，建議零售價為 $1899，按這裡有詳細規格及最新賣價。