小米 POCO M3 開箱：皮革機背，設計有心
呢篇開箱文章，只會針對外觀同相機，跟大家分享，至於跑分方面，會喺稍後再補充。首先講下外觀，小米 POCO M3 採用咗 6.53 吋 FHD+ 芒，正面就好難有突破，都係水滴設計囉，不過背面版主個人幾 Like，本身部機畀我第一印象，會諗起當日魅族 Pro 7 系列，因為佢個 POCO Logo 都係好似 MEIZU 一樣咁打直排列，但睇耐咗又令我聯想到 ASUS 2017 年推出嘅 ZenFone AR，都係用上相似嘅皮革材質，而呢種材質畀我感覺係相當耐撞，同埋唔會咁易痴手指紋。整體設計係幾有心，幾有睇頭。顏色方面會有黑、黃、藍三種顏色。
包裝盒。
內有透明膠套、卡針、USB線、火牛等配件。
手機支持 18W 快充，隨機附 22.5W 火牛。
6.53 吋屏幕。
皮革機背，有打直嘅 POCO logo。
三個主鏡頭。
音量鍵以及合拼指紋辨識嘅電源鍵。
真三卡。
3.5mm 耳機孔。小米 POCO M3 相機拍出乜質素嘅相？
相機方面，點解我 intro 會講到「三鏡頭稍嫌嘥咗」？原因係，雖然佢係有三鏡頭，但佢個三鏡頭係 48MP 標準 + 2MP 微距 + 2MP 景深嘅組合，但就無一部手機應有嘅超廣角鏡頭。同埋玩過呢部 POCO M3，相機功能真係無乜，之前 POCO X3 啲玩味功能，好似魔法換天、長曝光等等，呢部手機通通都無。當然，呢部手機比起 POCO X3 更加平價，無咗呢啲功能，又唔知大家接唔接受到。補充一點，唔知係咪 S662 處理器嘅問題，版主用相機拍攝嘅時候，會 feel 到有啲窒，而 Night Mode 亦要 Load 一啲時間，呢個係我試玩完嘅小感受。講完我嘅上手感覺，以下版主就畀大家睇下呢部手機拍出嚟嘅夜拍成像，雖然部機咁平大家唔應該有期望，但都可以畀大家睇下係咪夠用。
標準拍攝 (左) VS 夜景拍攝 (右)
48MP 高像素拍攝
▲ 高像素代表可以保留到更多細節，而我哋將張相放大嚟睇 (如下圖)，可以見到船上面嘅字都仲可以睇到清楚，線條都算係實淨，算係咁啦。
小結
老實，版主唔係玩咗部機好耐，都係啱啱 6 點幾先開始掂部機，用咗唔夠一個鐘，所以只能分享下我個感覺，就係佢係一部有心設計嘅手機，而且個 specs 望落都唔差，有真三卡，有 6000mAh 大電，有 18W 快充等等，但無 NFC，同埋可能粒 S662 處理器真係唔多夠快，我用完第一印象係有點窒，尤其是係用相機嘅時候。不過，相機質素以一部千元手機嚟講，我又覺得收貨。最後，呢部手機賣幾錢？發佈會就講，有 64GB 以及 128GB 兩個版本，分別為 149 美金 (約港幣 $1155) 以及 169 美金 ($1310)，而版主收到風，香港賣嘅價錢會同美金價相當接近，大約 $10XX 以及 $12XX 左右，呢個價錢網友又點睇呢？