國際版今晚先發表，亦即係話，呢篇文章會係版主收風嘅爆價文。而根據版主收到嘅消息，紅米 Note 11 Pro 系列一共有三個版本，分別係紅米 Note 11 Pro、紅米 Note 11 Pro 5G 以及紅米 Note 11 Pro+ 5G，三機建議零售價分別為 $2299、$2599 以及 $3299。而顏色、買機優惠等資料，下表會進一步話你知：
| 型號 | 建議零售價 | 顏色 | 買機優惠 |
| 紅米 Note 11 Pro | $2299 | 星空藍、石墨灰、極地白 | 送小米智能攝影機 2K 標準版 (建議零售價：$199) |
| 紅米 Note 11 Pro 5G | $2599 | 海洋藍、石墨灰、極地白 | 送米家負離子風筒 (建議零售價：$199) |
| 紅米 Note 11 Pro+ 5G | $3299 | 星空藍、森林綠、石墨灰 | 送紅米手環 Pro (建議零售價：$329) |
另外，據消息指，除咗紅米 Note 11 Pro 系列之外，同場仲會有部紅米 10C 推出，有石墨灰、海洋藍以及薄荷綠三色，建議零售價為 $1099。以上四款手機都會在 2022 年 4 月 6 日開賣。
那到底這幾款手機嘅規格係點，部紅米 Note 11 Pro+ 5G 又點解會賣到 $3299 咁貴呢？繼續睇落去，我哋同大家逐部講下：
紅米 Note 11 Pro
睇上面個表，大家都可以見到，紅米 Note 11 Pro 係有 4G 版同 5G 版兩個版本，不過你以為最主要唔同係網絡制式問題？你咁諗就大錯特錯，因為原來個餡都有唔同。根據我收到風嘅資料指出，紅米 Note 11 Pro 用咗 6.67 吋 FHD+ AMOLED 平面屏幕，配備 MTK Helio G96 處理器，內置 6GB RAM 以及 128GB ROM，用上三選二卡槽，支持最高 1TB microSD 擴充，電池容量為 5000mAh。相機用上四鏡頭組合，分別為 108MP 廣角 + 8MP 超廣角 + 2MP 微距 + 2MP 景深鏡頭，而前置鏡頭則為 16MP。
紅米 Note 11 Pro 5G
外觀設計語言基本上同 Note 11 Pro 差不多，都係 6.67 吋 FHD+ AMOLED 平面屏幕，不過 CPU 就換上 Qualcomm Snapdragon 695 處理器，內置 8GB RAM 以及 128GB ROM，同樣用上三選二卡槽，支持最高 1TB microSD 擴充，電池容量為 5000mAh。另外，Note 11 Pro 5G 相機只有三鏡頭，分別為 108MP 廣角 + 8MP 超廣角 + 5MP 微距鏡頭，前置鏡頭則為 16MP。
紅米 Note 11 Pro+ 5G
其實同一個系列，設計都係大同小異，都係 6.67 吋芒，支持 120Hz 屏幕刷新率，最主要唔同都係 CPU，用上 MTK 天璣 920 處理器，內置 8GB RAM 以及 256GB ROM，即內置儲存容量比其他兩部多啲，同埋相機則用上 108MP 廣角 + 8MP 超廣角 + 2MP 微距三鏡頭組合。另外，手機內置 4500mAh 電，支持高達 120W 快速充電。
紅米 10C
紅米 10C 係一部平價千元機，硬件規格無上面幾部咁高係必然，用上 6.71 吋 HD+ LCD 屏幕，配備 Qualcomm Snapdragon 680 處理器，內置 4GB RAM 以及 64GB ROM，電池容量為 5000mAh。相機用上 50MP 廣角 + 2MP 景深雙鏡頭組合，前置鏡頭則為 5MP。
